ថៃសន្យាជាលាយលក្សណ៍អក្សរ ថាឈប់បាញ់ខ្មែរនៅព្រំដែន
កម្ពុជានិងថៃ នៅថ្ងៃសុក្រទី១៦ មករានេះ បានបញ្ចប់កិច្ចប្រជុំគណៈកម្មការព្រំដែនរួមលើកទី៩របស់ខ្លួននៅខេត្តសៀមរាប។ កិច្ចប្រជុំនៃប្រទេសជិតខាងទាំងពីរនេះ បានសម្រេចលទ្ធផលចំនួន៨ចំណុច ដែលរួមមានការបើកច្រកទ្វាព្រំដែនថ្មី ការសងមកវិញនូវវត្ថុបុរាណបន្ថែម។ ចំណែកឯការការបាញ់ពលរដ្ឋខ្មែរនៅព្រំដែន គឺត្រូវបានចុះហត្ថលេខាជាលាយលក្សណ៍អក្សរ។
ចុះផ្សាយនៅថ្ងៃ៖
ស្តាប់ - ០២:៣១
ការសន្យាឈប់បាញ់ពលរដ្ឋខ្មែរដែលឆ្លងដែនដោយខុសច្បាប់ចូលទៅទឹកដីថៃ នៅពេលនេះត្រូវបានចែងជាលាយលក្សណ៍អក្សរហើយ។ នេះជាលទ្ធផលនៃកិច្ចប្រជុំគណៈកម្មការព្រំដែនរវាងភាគីកម្ពុជា និងថៃលើកទី៩នេះ។ ក្រោយកិច្ចប្រជុំជាង១ម៉ោងកន្លះ លោក កុយ គួង បានប្រាប់អ្នកសារព័ត៌មានថា បញ្ហាបាញ់សម្លាប់ពលរដ្ឋខ្មែរនេះត្រូវបានលើកយកមកដាក់លើតុពិភាក្សា ហើយភាគីថៃដែលមានរដ្ឋមន្ត្រីក្រសួងការបរទេសលោក ថាណៈសាក់ ប៉ាទិម៉ាប្រាកន ជាតំណាង បានឯកភាពជាវិធានការឱ្យមានការល្បាតរួមគ្នារវាងកម្លាំងកម្ពុជា និងថៃនៅតាមបណ្តោយព្រំដែន។
ប៉ុន្តែក្នុងករណីឧបទ្ទវហេតុបាញ់ប្រហារកើតឡើងនោះ ការសិក្សាស្រាវជ្រាវជ្រាវជាក់លាក់មួយនឹងត្រូវអង្កេតយ៉ាងច្បាស់លាស់។ បើតាមលោកកុយ គួងដដែល រដ្ឋាភិបាលថៃកន្លងមក បានបញ្ជាដល់ថ្នាក់មូលដ្ឋានមិនឱ្យមានការបាញ់ប្រហារនោះទេ គឺតម្រូវឱ្យមានការអនុវត្តច្បាប់។ យ៉ាងណាក៏ដោយក្រសួងការបរទេសកម្ពុជាបានបញ្ជាក់ថា ប្រជាពលរដ្ឋខ្មែរមិនតិចជាង៥នាក់នោះទេ ក្នុងឆ្នាំ២០១៤នេះ ត្រូវបានស្លាប់ដោយសារចុងការណុងរបស់ទាហានថៃ។
ក្រៅពីប្រធានបទរសើបស្តីពីការបាញ់ស្លាប់ពលរដ្ឋខ្មែរនោះ កិច្ចប្រជុំរយៈពេលពីរថ្ងៃនេះ ភាគីជិតខាងទាំងពីរបានសម្រេចបើកច្រកព្រំដែនថ្មីចំនួន៤បន្ថែមទៀត គឺទី១ច្រកចេញចូលទំនិញស្ទឹងបត់ ក្នុងខេត្តបន្ទាយមានជ័យ ទី២ច្រកអានសេះ ខេត្តព្រះវិហារ ទី៣ច្រកភ្នំជី ខេត្តបាត់ដំបង និងទី៤ គឺច្រកជុំគគី ខេត្តឧត្តរមានជ័យ។ តាមកំណត់ហេតុនៃកិច្ចប្រជុំ ភាគីថៃក៏បានយល់ព្រមប្រគល់វត្ថុបុរាណដែលថៃបានរឹបអូសក្នុងតាំងពីឆ្នាំ១៩៩៩ ចំនួន១៦ដុំបន្ថែមទៀត បន្ទាប់វត្ថុបុរាណ៧ដុំរួចហើយត្រូវបានបញ្ជូនមកឱ្យកម្ពុជា ក្នុងចំណោមវត្ថុទាំង៤៣ដុំ។ បើតាមអ្នកនាំពាក្យក្រសួងការបរទសកម្ពុជាដដែល ពលករខ្មែរចំនួន៦៦ម៉ឺននាក់ ត្រូវបានរដ្ឋាភិបាលថៃចុះបញ្ជីជាពលករស្របច្បាប់រួចរាល់អស់ហើយ។
ដោយឡែកការបង្ក្រាប់ឧក្រិដ្ឋកម្មឆ្លងដែន ការបង្ក្រាបការរត់ពន្ទ ការបង្កើតតំបន់សេដ្ឋកិច្ចនៅព្រំដែនរួមគ្នារវាងកម្ពុជា-ថៃ និងការចរាចរផ្នែកកសិកម្មនៅព្រំដែន ក៏ជាលទ្ធផលនៃកិច្ចប្រជុំគណៈកម្មការព្រំដែនរវាងកម្ពុជា និងថៃលើកទី៩នេះផងដែរ។
ជាការរំលឹក កិច្ចប្រជុំគណៈកម្មការព្រំដែនអន្តររដ្ឋាភិបាលទាំងពីរនេះ ធ្លាប់បានផ្អាកកន្លងមកដោយសារតែវិបត្តផ្ទៃក្នុងប្រទេសថៃ។ ហើយកិច្ចប្រជុំឆ្នាំនេះ ប្រធានបទស្តីពីការដកទ័ពរបស់ថៃក្នុងតំបន់ប្រសាទព្រះវិហារតាមអំណាចសាលដីការទីក្រុងឡាអេនោះ ក៏មិនត្រូវបានដាក់ពិភាក្សាលើតុនោះទេ។
យ៉ាងណាក៏ដោយ ការសន្យាជាលាយលក្សរណ៍អក្សរឈប់បាញ់ពលរដ្ឋខ្មែរនៅព្រំដែន របស់ភាគីថៃនៅពេលនេះ គឺជាកាសន្យាថ្មីមួយទៀត បន្ទាប់ពីការសន្យាលនាពេលកន្លងទៅរបស់ប្រទេសថៃជិតខាង មិនមានប្រសិទ្ធភាពទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ