អង្គការសុខភាពពិភពលោកទទួលស្គាល់ពីការលុបបំបាត់ជំងឺត្រាក់កូមនៅកម្ពុជា
កម្ពុជាទើបតែបានទទួលលិខិតពីអង្គការសុខភាពពិភពលោក ទទួលស្គាល់ពីការលុបបំបាត់ជំងឺភ្នែក «ត្រាក់កូម» នៅកម្ពុជា។ នេះបើតាមសេចក្ដីប្រកាសព័ត៌មានរបស់ក្រសួងសុខាភិបាល ចុះថ្ងៃទី១២ តុលាកន្លងទៅ។ សម្រាប់ក្រសួងសុខាភិបាល ការលុបបំបាត់ជំងឺត្រាក់កូម ដែលជាបញ្ហាសុខភាពសាធារណៈមួយ គឺជាសមិទ្ធិផលដ៏ធំធេងថ្មីមួយទៀតរបស់កម្ពុជា។
ចុះផ្សាយនៅថ្ងៃ៖
ស្តាប់ - ០២:៣៨
ជំងឺត្រាក់កូម គឺជាជំងឺភ្នែកដែលកើតឡើងដោយការឆ្លងមេរោគបាក់តេរី ក្លាមីដ្យា ត្រាកូម៉ាទីស។ វាគឺជាជំងឺឆ្លងនាំមុខគេនៅលើពិភពលោក ដែលបណ្ដាលឲ្យអ្នកជំងឺងងឹតភ្នែក។ មេរោគនៃជំងឺនេះ ឆ្លងតាមរយៈកង្វះអនាម័យ សត្វរុយដែលទុំលើភ្នែកឬច្រមុះអ្នកជំងឺ ឬការប៉ះពាល់ដោយផ្ទាល់ទឹកភ្នែកឬពពឹកភ្នែករបស់អ្នកជំងឺជាពិសេសក្មេងតូចៗ។
អង្គការសុខភាពពិភពលោកទទួលស្គាល់ការលុបបំបាត់ជំងឺត្រាក់កូម ថាលែងជាបញ្ហាសុខភាពសាធារណៈនៅក្នុងប្រទេសមួយ លុះត្រាតែកុមារអាយុពី១ដល់៩ឆ្នាំ មានចំនួនតិចជាង៥% មានរោគសញ្ញាជំងឺត្រាក់កូម, ប្រជាជនអាយុលើសពី១៥ឆ្នាំ ក្នុងទម្រង់ជំងឺត្រាក់កូមប្រែងចាក់ភ្នែកធ្ងន់ធ្ងរ មានអត្រាតិចជាង ០,២% និងប្រព័ន្ធសុខាភិបាលអាចកំណត់និងគ្រប់គ្រងគ្រប់ករណីថ្មីនៃជំងឺប្រែងចាក់ភ្នែក។
តំណាងអង្គការសុខភាពពិភពលោកប្រចាំកម្ពុជា លោក វេជ្ជបណ្ឌិត លូវ យ៉ុងហ្គ័រ បានលើកឡើងថា ការលុបបំបាត់ជំងឺត្រាក់កូម និងទទួលបានការបញ្ជាក់ពីអង្គការសុខភាពពិភពលោក គឺជាការជំនះឧបសគ្គបញ្ហាសុខភាពសាធារណៈថ្មីមួយទៀតរបស់កម្ពុជា។ បើតាមលោកវេជ្ជបណ្ឌិត លូវ យ៉ុងហ្គ័រ ការចម្លងជំងឺត្រាក់កូម បង្កផលប៉ះពាល់ម្ដងហើយម្ដងទៀតដល់កុមារនិងសហគមន៍ ដែលអាចឈានទៅដល់ការងងឹតភ្នែកមិនអាចព្យាបាលបាន។ ហើយការពិការភ្នែកឬងងឹតភ្នែក ជាលទ្ធផលធ្ងន់ធ្ងរក្នុងបទពិសោធន៍ជីវិតរបស់អ្នកជំងឺផ្ទាល់ និងគ្រួសាររបស់ពួកគេ ដែលជាធម្មតា ជាអ្នកក្រីក្របំផុត។
ចំណែកលោករដ្ឋមន្ដ្រីក្រសួងសុខាភិបាល ម៉ម ប៊ុនហេង ចាត់ទុកការទទួលស្គាល់របស់អង្គការសុខភាពពិភពលោកពីការលុបបំបាត់ជំងឺត្រាក់កូម គឺជាសមិទ្ធិផលថ្មីមួយទៀត ដែលរដ្ឋាភិបាលកម្ពុជាសម្រេចបាន ដោយមានការចូលរួមខ្ពស់ពីប្រជាពលរដ្ឋកម្ពុជា។ លោកបញ្ជាក់ទៀតថា ក្រសួងសុខាភិបាល ត្រៀមខ្លួនរួចជាស្រេចដើម្បីចែករំលែកបទពិសោធន៍នេះ ដល់ប្រទេសនានាក្នុងតំបន់ ក៏ដូចជាពិភពលោក។
បន្ថែមពីលើនេះ ក្រសួងសុខាភិបាលកំពុងតែអនុវត្តកម្មវិធីតាមដានជំងឺប្រែងចាក់ភ្នែក ដើម្បីធានាថា គ្រប់អ្នកជំងឺដែលបានរកឃើញថាមានជំងឺប្រែងចាក់ភ្នែក ត្រូវទទួលបានការព្យាបាលភ្លាមៗ។ សូមជម្រាបជូនថា ចាប់តាំងពីឆ្នាំ២០០០រហូតមក ក្រសួងសុខាភិបាលបានវះកាត់ជំងឺប្រែងចាក់ភ្នែកបានជាង១ម៉ឺនករណី។ ក្រសួងសុខាភិបាលបញ្ជាក់ថា ខ្លួននឹងធ្វើការជាមួយអង្គការសុខភាពពិភពលោកបន្តទៀត ដើម្បីដោះស្រាយបញ្ហាប្រឈមនានាក្នុងការតាមដានរកឲ្យឃើញ និងគ្រប់គ្រងជំងឺប្រែងចាក់ភ្នែក ក៏ដូចជាបញ្ហាសុខភាពសាធារណៈដទៃផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ