វិទ្យុ ABC អូស្រ្តាលី ប្រកាសបិទកម្មវិធីផ្សាយភាសាខ្មែរ, ភូមា, វៀតណាម និងបារាំងដែលផ្សាយទៅអាស៊ី និងប៉ាស៊ីហ្វិក
ស្ថាប័នសោតទស្សន៍ ABC អូស្រ្តាលី នឹងបិទលែងដំណើការកម្មវិធីផ្សាយជាភាសាខ្មែរ ភូមា វៀតណាម និងបារាំង ដែលផ្សាយទៅអាស៊ី និងប៉ាស៊ីហ្វិក។ ការប្រកាសយ៉ាងដូច្នេះ ត្រូវបានថ្នាក់ដឹកនាំ ស្ថាប័នសោតទស្សន៍ ABC អូស្រ្តាលី បញ្ជាក់ថា ស្ថាប័នរបស់ខ្លួនបានផ្លាស់ប្តូរ ការផ្ដោតយុទ្ធសាស្ដ្រថ្មីលើភាសាធំៗដូចជាភាសាចិនកុកងឺ, ភាសាឥណ្ឌូណេស៊ី និងភាសាប៉ាពួនូវ៉ែលហ្គីណេហើយចាំបាច់ត្រូវបិទភាសាតូចៗវិញ។
ចុះផ្សាយនៅថ្ងៃ៖
ស្តាប់ - ០២:០៥
ទីបំផុតទៅ ស្ថាប័នសោតទស្សន៍ ABC អូស្រ្តាលី ដែលបានបម្រើការងារផ្តល់សេវាកម្មព័ត៌មាន អស់រយៈពេលជាង ២ ទសវត្សន៍ កាលពីថ្ងៃទី ១៧ ខែ វិច្ឆិកា បានប្រកាសបិទការផ្សាយភាសាបរទេសចំនួន ៣ ទៅតំបន់អាស៊ី ចាប់ពីដើមខែ ធ្នូ តទៅ។ ភាសាទាំងបីនោះរួមមាន៖ ភាសាខ្មែរ ភាសាភូមា ភាសាវៀតណាម។ ចំណែកឯភាសាបារាំងវិញ ដែលផ្សាយទៅប្រទេសមួយចំនួននៅក្នុងតំបន់ប៉ាស៊ីហ្វិក នឹងបិទឈប់ដំណើរការនៅខែកុម្ភៈឆ្នាំ២០១៧ ដោយសារតែនៅមានកិច្ចព្រមព្រៀងសហការជាមួយទូរទស្សន៍បារាំងនៅមានសុពលភាពនៅឡើយសម្រាប់ភាសានេះ។
ថ្នាក់ដឹកនាំអង្គភាព ABC International ឲ្យដឹងថាការផ្លាស់ប្ដូរនេះនឹងផ្ដល់លទ្ធភាពឲ្យមានការបង្កើតកម្មវិធីចម្រុះជាច្រើនដល់ប្រិយមិត្ដអ្នកស្ដាប់ និងទស្សនាសម្រាប់ភាសាធំៗទាំងបីដែលនៅសល់ ដោយនឹងបម្រើផលប្រយោជន៍ច្រើនទូលំទូលាយដល់ពលរដ្ឋក្នុងតំបន់ដែលនិយាយភាសាបីនេះជាងពេលសព្វថ្ងៃ។ ជាការកត់សម្គាល់ នៅឆ្នាំ ២០១៤ ថវិកាសម្រាប់ស្ថាប័នសោតទស្សន៍ ABC អូស្ដ្រាលី ត្រូវបានកាត់បន្ថយ ហើយតាំងពីពេលនោះភាសាទាំង៤នេះដែលផ្សាយទៅអាស៊ី និងប៉ាស៊ីហ្វិកមានបុគ្គលិកធ្វើការតែម្នាក់គត់ទេសម្រាប់ភាសានីមួយៗ ហើយក៏មិនមានអ្នកយកព័ត៌មាននៅតាមប្រទេសនីមួយៗដែរ។
សូមបញ្ជាក់ថា កាលពីថ្ងៃទី ១០ ខែ វិច្ឆិកា រដ្ឋមន្រ្ដីក្រសួងព័ត៌មាន បានស្នើសុំឱ្យវិទ្យុអូស្រ្ដាលី បន្ដបើកដំណើរការផ្សាយព័ត៌មានរបស់ខ្លួននៅក្នុងប្រទេសកម្ពុជា ដើម្បីចូលរួមជួយលើក កម្ពស់ការយល់ដឹង និងផ្ដល់ព័ត៌មានប្រកបដោយវិជ្ជាជីវៈ ជូនដល់ប្រជាជនកម្ពុជា។ ការស្នើសុំនេះ ធ្វើឡើងក្នុងជំនួបពិភាក្សាការងារជាមួយ នាយកសារជីវកម្មសោតទស្សន៍អូស្រ្តាលី ទទួលបន្ទុកផ្សព្វផ្សាយអន្តរជាតិ(ABC) នឹងរដ្ឋមន្រ្តី ក្រសួងព័ត៌មាន លោក ខៀវ កាញារីទ្ធ។ លោក ខៀវ កាញារីទ្ធ បន្តថា កន្លងមកវិទ្យុនេះ បានផ្សាយព័ត៌មាន ប្រកបដោយវិជ្ជាជីវៈ ដែលអាចធ្វើឱ្យប្រជាពលរដ្ឋកម្ពុជាបានយល់ដឹងកាន់តែច្បាស់អំពីសារៈសំខាន់ នៃព័ត៌មាន និងអាចធ្វើការផ្គូរផ្គងតុល្យភាពនៃដំណឹងផងដែរ។
Radio Australia បានចាប់ផ្ដើមផ្សាយកម្មវិធីជាភាសាខ្មែរនៅឆ្នាំ១៩៩២ ហើយ សោតទស្សន៍អូស្រ្ដាលី បានធ្វើកិច្ចសហប្រតិបត្តិការជាមួយក្រសួងព័ត៌មាន ក្នុងកម្មវិធីសន្ទនាមតិ និងកម្មវិធីស្ដីពីជីវិតយើង សង្គមយើង នៅវិទ្យុជាតិកម្ពុជា តាមបណ្ដាខេត្ដចំនួន ៤ រួមមាន ខេត្ដបាត់ដំបង កំពត សៀមរាប និងខេត្ដកំពង់ចាម។ មាតិកា និងកម្មវិធីផ្សាយរបស់ Radio Australia ត្រូវបានផលិតឡើងសម្រាប់មហាជនដែលជាមិត្ដអ្នកស្ដាប់ និងអាននៅក្នុងតំបន់អាស៊ី និងប៉ាស៊ីហ្វិក ដោយមានផ្សាយចេញជាច្រើនភាសាមានដូចជាភាសាអង់គ្លេស, ភូមា, ចិនកុកងឺ, ឥណ្ឌូណេស៊ី, បារាំង, ខ្មែរ, ប៉ាពួនូវ៉ែលហ្គីណេ និងវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ