ខួប២៨ឆ្នាំកិច្ចព្រមព្រៀងសន្តិភាពទីក្រុងប៉ារីស ថ្ងៃ២៣ តុលាត្រូវបានលើកឡើងព្រោងព្រាតតាំងពីព្រះបរមរាជវាំង រហូតដល់អង្គការសង្គមស៊ីវិល
នៅថ្ងៃទី២៣ខែតុលាឆ្នាំ២០១៩នេះ គឺជាខួបលើកទី២៨នៃកិច្ចព្រមព្រៀងសន្តិភាពទីក្រុងប៉ារីស។ ដើម្បីអបអរសាទរដល់ទិវាជាប្រវត្តិសាស្ត្រនេះ ទាំងព្រះបរមរាជវាំង ទាំងប្រមុខរដ្ឋាភិបាលកម្ពុជា ទាំងគណបក្សនយោបាយ រួមទាំងអង្គការសង្គមស៊ីវិល បានបញ្ចេញសារផ្សេងៗគ្នា ទាក់ទងទៅនឹងព្រឹត្តិការណ៍នេះ និងមានប្រារព្ធពិធីជាសាធារណៈផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៣
ផ្តើមចេញពីព្រះបរមរាជវាំង ទំព័រហ្វេសប៊ុកផ្លូវការ Royal du Cambodge បានសរសេរថា ក្រោមព្រះរាជបូជនីយកិច្ច នៃព្រះករុណា ព្រះបាទសម្ដេចព្រះ នរោត្ដម សីហនុ ព្រះមហាវីរក្សត្រ ព្រះបរមរតនកោដ្ឋ ដោយមានរណសិរ្ស ហ្វុនស៊ីនប៉ិច ដែលបាននាំឲ្យកម្ពុជាទទួលបាននូវសុខសន្តិភាពឡើងវិញបន្ទាប់ពីសង្រ្គោមដ៏រ៉ាំរ៉ៃជាច្រើនទសវត្សរ៍ តាមរយៈការចរចាបង្រួបបង្រួមបញ្ចប់សង្រ្គោមរហូតឈានដល់ការចុះហត្ថលេខាសន្តិភាពទីក្រុងប៉ារីសពីបណ្តាភាគីធំៗ។
ជាមួយគ្នានេះ លោកនាយករដ្ឋមន្ត្រី ហ៊ុន សែន ក៏បានសរសេរនៅលើទំព័រហ្វេសប៊ុករបស់លោកនៅថ្ងៃនេះដែរថា ២៨ ឆ្នាំមុន ពោលគឺនៅថ្ងៃទី២៣ តុលា ឆ្នាំ១៩៩១ ភាគីទាំង៤ របស់កម្ពុជា បានឈានទៅចុះហត្ថលេខា លើកិច្ចព្រមព្រៀងសន្តិភាព នៅទីក្រុងប៉ារីស ប្រទេសបារាំង ក្រោមវត្តមានសាក្សីដែលមកពី១៨ប្រទេស រួមទាំងអគ្គលេខាធិការអង្គការសហប្រជាជាតិផងដែរ ដើម្បីបញ្ចប់សង្រ្គាមស៊ីវិលនៅកម្ពុជា។
សំណេរក៏បានបញ្ជាក់ផងដែរថា មុននឹងឈានមកដល់កិច្ចព្រមព្រៀងនាទីក្រុងប៉ារីស ២៣ តុលា គឺសម្តេច ហ៊ុន សែន បានជួបពិភាក្សាដំបូងបំផុតជាមួយ អតីតព្រះមហាក្សត្រខ្មែរ សម្តេចព្រះ នរោត្តម សីហនុ នៅថ្ងៃទី២ ខែធ្នូ ឆ្នាំ១៩៨៧ នៅ FERE-EN-TARDENOIS នៃប្រទេសបារាំង ដែលការចរចានេះ មានសេចក្តីប្រកាសរួមឡាយព្រះហស្តលេខាដោយ សម្តេចព្រះនរោត្តម សីហនុ និងសម្តេច ហ៊ុន សែន ហើយបន្ទាប់មកក៏មានកិច្ចចរចាបន្តរវាង សីហនុ-ហ៊ុន សែន លើកទី២ ប្រព្រឹត្តឡើងនៅថ្ងៃទី ២០-២១ ខែមករា ឆ្នាំ១៩៨៨ នៅ SAINT-GERMAIN-EN-LAYE ប្រទេសបារាំង និងនៅទីកន្លែងផ្សេងៗមួយចំនួនទៀត។ លោក ហ៊ុន សែន ក៏បានរំលេចពីការអូសបន្លាយសង្រ្គាមស៊ីវិលនៅកម្ពុជា បង្កដោយភាគីកម្ពុជាប្រជាធិបតេយ្យ (ប៉ុល ពត) ព្រមទាំងរំលេចនូវនយោបាយ ឈ្នះ-ឈ្នះ របស់លោក ដែលនាំមកនូវការបញ្ចប់សង្រ្គាមស៊ីវិលទាំងស្រុងនៅឆ្នាំ១៩៩៨។
ដោយឡែក អតីតគណបក្សសង្គ្រោះជាតិវិញ នៅថ្ងៃនេះដែរ បានចេញសេចក្តីថ្លែងការណ៍មួយ ដោយធ្វើការអំពាវនាវដល់ភាគីពាក់ព័ន្ធទាំងអស់ ជាពិសេសប្រទេសហត្ថលេខី នៃកិច្ចព្រមព្រៀងត្រូវបំពេញកាតព្វកិច្ចរបស់ខ្លួន និងអនុវត្តឲ្យបានពេញលេញ តាមស្មារតីនៃកិច្ចព្រមព្រៀងសន្តិភាពទីក្រុងប៉ារីស ដោយមានការពិភាក្សាជាបន្ទាន់ ក្នុងគោលបំណងអនុម័តនូវវិធានសមស្របទាំងឡាយ ដើម្បីធានានូវការប្តេជ្ញាចិត្តរបស់សហគមន៍អន្តរជាតិ និងគ្រប់ភាគីពាក់ព័ន្ធ ក្នុងការស្តារ និងរកដំណោះស្រាយចំពោះវិបត្តិនយោបាយបច្ចុប្បន្ន។
នៅថ្ងៃនេះដែរ គណបក្សប្រជាធិបតេយ្យមូលដ្ឋាន ក៏បានឆ្លៀតយកឱកាសថ្ងៃ២៣តុលានេះ ចេញសេចក្តីថ្លែងការណ៍ ទាក់ទងទៅនឹងការរក្សា EBA និងលើកកម្ពស់សេរីភាពនយោបាយ ដែលនេះ គឺជាការឆ្លុះបញ្ចាំងនូវស្មារតីនៃកិច្ចព្រមព្រៀងសន្តិភាពទីក្រុងប៉ារីស។
ទន្ទឹមគ្នានេះ ក្រុមអង្គការសង្គមស៊ីវិលនៅព្រឹកនេះដែរ ក៏បានរៀបចំធ្វើពិធីអបអរកិច្ចព្រមព្រៀងសន្តិភាពទីក្រុងប៉ារីស ២៣តុលា នៅទីលានប្រជាធិបតេយ្យ ដោយមានការចូលរួមពីតំណាងស្ថានទូតអាមេរិកប្រចាំប្រទេសកម្ពុជាផងដែរ។ ក្រោមប្រធានបទ «២៣ តុលា នាំមកនូវការរួបរួមជាតិ សន្តិភាព ប្រជាធិបតេយ្យ និងការអភិវឌ្ឍ” ក្រុមអង្គការសង្គមស៊ីវិលបានលើកឡើងពីប្រវត្តិនៃកិច្ចព្រមព្រៀងសន្តិភាព ថ្ងៃ២៣តុលា និងការវិវត្តន៍នយោបាយខ្មែរក្រោយថ្ងៃ២៣តុលាឆ្នាំ១៩៩១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ