នគរបាលប្រឆាំងបទល្មើសសេដ្ឋកិច្ចម្នាក់ដើរទារប្រាក់ប្រចាំខែពីស្ថាប័នឯកជនជាង១០០ ចុងក្រោយជាប់អន្ទាក់ ACU
អង្គភាពប្រឆាំងអំពើពុករលួយ ACU បានឃាត់ខ្លួននគរបាលសេដ្ឋកិច្ចម្នាក់ បញ្ជូនទៅកាន់តុលាការ ក្រោយពីរកឃើញថា នគរបាលរូបនេះ បានដើរទារលុយពីស្ថាប័នឯកជនជាង១០០នៅទូទាំងភ្នំពេញ។ បន្ទាប់ពីឃាត់ខ្លួននៅថ្ងៃទី២១មីនា នគរបាលរូបនេះត្រូវបានតំណាងអយ្យការចោទប្រកាន់ជាផ្លូវការហើយកាលពីម្សិលមិញ ពីបទវិតិក្រម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
នគរបាលប្រឆាំងបទល្មើសសេដ្ឋកិច្ចដែលត្រូវ ACU ឃាត់ខ្លួននេះ មានឈ្មោះ ហ៊ុយ ហឿន ជានាយរងផ្នែកសិទ្ធិអ្នកនិពន្ធនិងសិទ្ធិប្រហាក់ប្រហែល ការិយាល័យកម្មសិទ្ធិបញ្ញា នាយកដ្ឋានប្រឆាំងបទល្មើសសេដ្ឋកិច្ចនៃក្រសួងមហាផ្ទៃ។ ACU បានគូសបញ្ជាក់ឲ្យដឹងថា នគរបាលរូបនេះ បានដើរទារប្រាក់ប្រចាំខែពីក្រុមហ៊ុន សហគ្រាស បុគ្គលឯកជនផ្សេងៗនៅទូទាំងរាជធានីភ្នំពេញជាង១០០ទីតាំង ក្នុងតម្លៃចាប់ពី២ម៉ឺនរៀល រហូតដល់១ពាន់ដុល្លារអាមេរិក។ បើតាម ACU សកម្មភាពទារប្រាក់ប្រចាំខែនេះ ត្រូវបានឈ្មោះ ហ៊ុយ ហឿន ប្រព្រឹត្តជាទម្លាប់អស់រយៈពេលប្រហែល១០ខែមកហើយ ពោលគឺចាប់តាំងពីពេលដែលជននេះត្រូវបានចាត់តាំងឲ្យបំពេញការងារនៅរាជធានីភ្នំពេញមកម្ល៉េះ។
អង្គភាពប្រឆាំងអំពើពុករលួយ ACU បានតាមដានឈ្មោះ ហ៊ុយ ហឿន ដែលជានគរបាលប្រឆាំងបទល្មើសសេដ្ឋកិច្ចនេះ ពីកន្លែងមួយទៅកន្លែងមួយ ហើយបានឃើញពីសកម្មភាពទទួលលុយជាប្រចាំខែជាច្រើនលើកទៀតផង។ ចុងក្រោយនេះ ពោលគឺនៅថ្ងៃឃាត់ខ្លួនតែម្ដង ACU បានតាមទៅទាន់សកម្មភាពទទួលលុយជាក់ស្ដែងរបស់ ហ៊ុយ ហឿន នៅហាងកាហ្វេមួយកន្លែង ទើបបានសម្រេចនាំខ្លួនឈ្មោះនេះទៅកសាងសំណុំរឿងតាមនីតិវិធីទៅកាន់តុលាការតែម្ដង។ ACU បានអះអាងដែរថា សកម្មភាពទារប្រាក់របស់ឈ្មោះ ហ៊ុយ ហឿន មានការចូលរួមពីមន្ដ្រីនគរបាលប្រឆាំងបទល្មើសសេដ្ឋកិច្ចម្នាក់ទៀត ឈ្មោះ ឯម កុសល។
គួរជម្រាបជូនថា ការទាមទារប្រាក់ក្នុងនាមជាមន្ដ្រីសាធារណៈ ត្រូវបានហាមឃាត់ដោយច្បាប់។ សម្រាប់អង្គភាពប្រឆាំងអំពើពុករលួយ សកម្មភាពដូច្នេះ មិនត្រឹមតែបានធ្វើឲ្យប៉ះពាល់ដល់កិត្តិយសរបស់ស្ថាប័នជាតិ និងមន្ដ្រីសាធារណៈដទៃទៀតទេ វាក៏បានធ្វើឲ្យប៉ះពាល់ធ្ងន់ធ្ងរដល់ជំនឿទុកចិត្តរបស់ប្រជាជន និងអ្នកវិនិយោគ ទៅលើការដឹកនាំរបស់រាជរដ្ឋាភិបាលទៀតផង។
ជាការកត់សម្គាល់ បន្ទាប់ពីឃាត់ខ្លួននៅថ្ងៃទី២១មីនា នគរបាលសេដ្ឋកិច្ច ហ៊ុយ ហឿន ត្រូវបាន ACU បញ្ជូនទៅកាន់តុលាការ។ តំណាងអយ្យការនៃសាលាដំបូងក្រុងភ្នំពេញ នៅថ្ងៃទី២៣មីនា បានសម្រេចចោទប្រកាន់ជននេះជាផ្លូវការហើយ ពីបទវិតិក្រម តាមមាត្រា ៥៩២ ៥៩៣ នៃក្រមព្រហ្មទណ្ឌ និងមាត្រា៣២ នៃច្បាប់ប្រឆាំងអំពើពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ