ដំណាំកសិផលខ្មែរសំខាន់ៗសម្រាប់នាំចេញបានធ្លាក់ថ្លៃ
ដំណាំកសិផលរួមមាន៖ ម្រេច ពោត ដំឡូងមី កៅស៊ូ ជាដើម បានធ្លាក់ថ្លៃ និងគ្មានទីផ្សារនាំចេញ។ ក្នុងនោះតម្លៃដំឡូងមីស្រស់ត្រូវបានគេរាយការណ៍មកថា ធ្លាក់ថ្លៃអាក្រក់បំផុតមិនធ្លាប់មានដោយក្នុងមួយគីឡូធ្លាក់ចុះមកត្រឹម១០០រៀល។ ទន្ទឹមនឹងការធ្លាក់ថ្លៃនេះ ក្រសួងកសិកម្មបានអះអាងពីវិធានការដែលអាចសង្គ្រោះបានទាន់ពេលវេលា។
ចុះផ្សាយនៅថ្ងៃ៖
ស្តាប់ - ០១:៣៩
អ្នកនាំពាក្យក្រសួងកសិកម្មលោក ឡោ រស្មី ពន្យល់ថា មូលហេតុដែលនាំឲ្យដំណាំកសិផលទាំងនេះធ្លាក់ថ្លៃដោយសារតែ ការនាំចេញទៅក្រៅប្រទេសមិនទាន់ត្រឹមត្រូវតាមស្តង់ដាដែលបានកំណត់។ អ្វីដែលជាតម្រូវការស្តង់ដានោះគឺការដាំដុះមានការទទួលស្គាល់ថា គ្មានប្រើប្រាស់សារជាតិគីមី តែប្រើជីធម្មជាតិ។ ជាក់ស្ដែងតម្លៃម្រេចនៅកំពតដែលជាទំនិញសម្គាល់ភូមិសាស្ត្រតម្លៃនៅថេរដដែល។ តែផ្ទុយមកវិញតម្លៃម្រេចនៅត្បូងឃ្មុំដែលមិនទាន់ក្លាយជាទំនិញសម្គាល់ភូមិសាស្ត្របានធ្លាក់ថ្លៃ។
ដោយឡែកចំពោះដំណាំកៅស៊ូបច្ចុប្បន្ននេះ ១តោនស្ថិតនៅក្នុងតម្លៃ១៦០០ដុល្លារដែលមុនបន្តិចចន្លោះខែ៤ទៅខែ៥កៅស៊ូមានតម្លៃជិត២០០០ដុល្លារក្នុង១តោន។ នេះបណ្ដាលមកពីការនាំចេញទៅប្រទេសលើសតម្រូវការ។
ចំណែកតម្លៃដំឡូងមីបច្ចុប្បន្ននេះ១តោនស្ថិតនៅក្នុងតម្លៃ១១០ដុល្លារ ខណៈដែលឆ្នាំទៅមិញ១តោនមានតម្លៃ១៧០ដុល្លារ។ ទន្ទឹមនឹងនេះ ពីខេត្តប៉ៃលិនមកវិញប្រជាពលរដ្ឋបានរអ៊ូរទាំថា តម្លៃដំឡូងមីបានធ្លាក់ចុះអាក្រក់បំផុតមិនធ្លាប់មានក្នុង១គីឡូក្រាមតម្លៃ១០០រៀលសម្រាប់ដំឡូងមីស្រស់។ ប្រឈមបញ្ហានេះកសិករបានបន្ថយការដាំដំឡូងមីជាបណ្ដើរៗ ហើយអ្នកខ្លះទៀតធ្វើចំណាកស្រុកទៅរកការងារធ្វើនៅក្រៅប្រទេស។
ចំពោះដំណាំពោតវិញ លោក ឡោ រស្មី បានគូសបញ្ជាក់ថា ត្បិតធ្លាក់បន្តិចមែនតែត្រូវប៉ាន់សម្រាប់តម្រូវការក្នុងស្រុក ព្រោះរោងចក្រផលិតចំណីសត្វក្នុងស្រុកបានប្រមូលទិញ។ តែយ៉ាងណាក៏ដោយ បើតាមជំហររបស់ក្រសួងកសិកម្មការធ្លាក់ថ្លៃនេះក្រសួងនៅតែសង្គ្រោះទាន់ពេលវេលាតាមរយៈការរកទីផ្សារអន្តរជាតិក្នុងការលក់ផលិតផលកសិកម្មនេះតាមរយៈការវេចខ្ចប់នានាដែលគេចង់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ