ADB ជួយកម្ពុជានិងប្រទេសក្រីក្រក្នុងអាស៊ានឲ្យមានសន្ទុះ
ធនាគារអភិវឌ្ឍន៍អាស៊ី ( ADB)និងរដ្ឋាភិបាលប្រទេសអូស្ដ្រាលី បានប្រកាសផ្ដល់ជំនួយរួមគ្នាក្នុងទឹកប្រាក់ ១០,៥ លានដុល្លារ ដើម្បីលើកកម្ពស់ការអភិវឌ្ឍវិស័យឯកជននៅតាមបណ្ដាប្រទេសមហាអនុតំបន់មេគង្គ (GMS)គឺកម្ពុជា ឡាវ មីយ៉ាន់ម៉ា និងវៀតណាម។ ជំនួយនេះមានគោលដៅជួយឲ្យបណ្តាប្រទេសក្រីក្រទាំងនេះអាចមានលទ្ធភាព ធ្វើសមាហរណកម្មក្នុងសហគមន៍សេដ្ឋកិច្ចឆ្នាំ ២០១៥។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ការប្រកាសផ្តល់ជំនួយនេះត្រូវបានធ្វើឡើងតាមរយៈសេចក្តីប្រកាសព័ត៌មានមួយពីទីក្រុងម៉ានីល ប្រទេសហ្វីលីពីននៅថ្ងៃទី៤ធ្នូនេះ។ លោក Eric Sidgwick នាយក ADB ប្រចាំប្រទេសកម្ពុជាមានប្រសាសន៍ថា “វិស័យឯកជននៅកម្ពុជា ឡាវ មីយ៉ាន់ម៉ា និងវៀតណាម នៅមិនទាន់មានការអភិវឌ្ឍពេញលេញនៅឡើយទេ។ ដូច្នេះវាមានភាពចាំបាច់ជាបន្ទាន់មួយក្នុងការជួយកែលំអបរិយាកាសប្បញ្ញត្ដិកម្មនានាដើម្បីឲ្យធុរកិច្ចក្នុងបណ្តាប្រទេសទាំងនោះកាន់តែមានសមត្ថភាពប្រកួតប្រជែងជាងមុន។
លោកបន្តថា បញ្ហានេះរឹតតែមានសារៈសំខាន់ទៅទៀត នៅពេលដែលសហគមន៍សេដ្ឋកិច្ចអាស៊ានចាប់ផ្ដើមដំណើរការ ដែលគេរំពឹងថានឹងនាំមកនូវឱកាសថ្មីៗថ្នាក់តំបន់ជាច្រើនសម្រាប់ក្រុមហ៊ុននៅក្នុងមហាអនុតំបន់មេគង្គ។ ក្នុងន័យនេះ ធនាគារអភិវឌ្ឍអាស៊ី និងប្រទេសអូស្ត្រាលីក៏បានសម្រេចផ្ដល់ជំនួយរួមគ្នាក្នុងទឹកប្រាក់ ១០,៥ លានដុល្លារដើម្បីលើកកម្ពស់ការអភិវឌ្ឍវិស័យឯកជននៅក្នុងប្រទេស កម្ពុជា ឡាវ មីយ៉ាន់ម៉ា និងវៀតណាម។ ទឹកប្រាក់នេះរួមមាន ជំនួយបច្ចេកទេសរបស់ ADB ក្នុងទម្រង់ជាជំនួយឥតសំណងចំនួន៥០ម៉ឺនដុល្លារ និងការផ្ដល់ហិរញ្ញប្បទាន ១០ លានដុល្លារពីរដ្ឋាភិបាលអូស្ដ្រាលី។
ការប្រកាសផ្តល់ជំនួយនេះក៏បានធ្វើឡើងនៅមុនកិច្ចប្រជុំកំពូលលើកទី ៥ នៃមហាអនុតំបន់មេគង្គ ដែលគ្រោងធ្វើនៅថ្ងៃទី ១៩-២០ ខែ ធ្នូ នៅទីក្រុងបាងកក ប្រទេសថៃ។ សេចក្តីប្រកាសព័ត៌មានរបស់ធនាគារអភិវឌ្ឍអាស៊ីឲ្យដឹងថា បរិយាកាសប្បញ្ញត្ដិកម្ម ដែលរឹងមាំ និងផ្ដល់នូវភាពយុត្ដិធម៌ មានសារៈសំខាន់យ៉ាងខ្លាំង ចំពោះការ អភិវឌ្ឍសហគ្រាសខ្នាតតូច និងមធ្យម (SMEs) ដែលមានរហូតដល់ ៩០% នៃសហគ្រាសទាំងអស់ និងដែលផ្ដល់ការងារ ៧៥%។ ប៉ុន្តែ ជារឿយៗវិស័យនេះ ជួបប្រទះនឹងការលំបាក ដើម្បីទទួលបានការគាំទ្រផ្នែកហិរញ្ញវត្ថុ និងសេវាគាំទ្រដទៃទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ