គណបក្សប្រជាជននឹងវិសោធនកម្មច្បាប់គណបក្សនយោបាយ
លោកនាយករដ្ឋមន្ត្រីហ៊ុន សែន កាលពីថ្ងៃម្សិលមិញបានប្រកាសស្នើឱ្យសមាជិកគណបក្សប្រជាជនកម្ពុជាយកច្បាប់ ស្តីពីគណបក្សនយោបាយទៅវិសោធនកម្មដើម្បីបន្ថែមថាអ្នកដែលជាទណ្ឌិតគឺមិនអាចធ្វើជាប្រធាន ឬអនុប្រធានបក្សនយោបាយបានឡើយ។ គណបក្សសង្គ្រោះជាតិ ការធ្វើវិសោធនកម្មនេះនឹងធ្វើឱ្យប្រជាធិបតេយ្យនៅកម្ពុជានឹងដើរថយក្រោយ។ ទន្ទឹមនឹងនេះ ក្រុមអ្នកវិភាគនៅកម្ពុជា បានព្រួយបារម្ភយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
មិនបង្អង់ឡើយគណៈអចិន្ត្រៃយ៍គណបក្សប្រជាជនកម្ពុជានឹងធ្វើលើការងារនេះដោយយកច្បាប់ស្តីពីគណបក្សនយោបាយទៅឱ្យសភាធ្វើវិសោធនកម្ម ប៉ុន្តែគណបក្សមិនទាន់បញ្ជាក់ពីកាលបរិច្ឆេទនៃវិសោធនកម្មនេះនៅឡើយទេ។ នេះជាការបញ្ជាក់ពីលោកប៉ែន បញ្ញា សមាជិកគណៈកម្មាធិការអចិន្ត្រៃយ៍គណបក្សប្រជាជនកម្ពុជា និងជាប្រធានគណៈកម្មការនីតិកម្មរបស់រដ្ឋសភា។
ការធ្វើវិសោធនកម្មនេះ គឺចង់សំដៅទៅលើលោក សម រង្ស៊ីប្រធានគណបក្សសង្គ្រោះជាតិដែលជាទណ្ឌិត។ លោក ប៉ែន បញ្ញា បន្ថែមថា ការស្នើវិសោធនកម្មនេះ ជាចេតនាត្រឹមត្រូវព្រោះថ្នាក់ដឹកនាំគណបក្សកាន់អំណាចចង់ឱ្យពលរដ្ឋធម្មតាមិនមែនទណ្ឌិតជាប្រធាន ឬអនុប្រធានគណបក្សនយោបាយ។ បន្ថែមពីនេះ ក្រុមអ្នកនាំពាក្យគណបក្សប្រជាជនកម្ពុជា បានបញ្ជាក់ថា មែនទែនទៅលោក សម រង្ស៊ី គឺបានបាត់បង់សិទ្ធិនយោបាយរួចទៅហើយតាមច្បាប់របស់កម្ពុជាព្រោះថា លោកគឺជាទណ្ឌិត។
គណបក្សសង្គ្រោះជាតិវិញ បានលើកឡើងថាយុទ្ធសាស្ត្ររបស់បក្សកាន់អំណាចនេះ គឺនឹងធ្វើឱ្យលិទ្ធិប្រជាធិបតេយ្យនៅកម្ពុជានឹងដើរថយក្រោយនៅពេលដែលបក្សកាន់អំណាចចង់ធ្វើច្បាប់ដើម្បីគាបសង្កត់ប្រធានបក្សកាន់អំណាចយ៉ាងដូចនេះ។ លោកអេង ឆៃអ៊ាង អ្នកនាំពាក្យគណបក្សបានបន្ថែមថា យុទ្ធវិធីចង់បញ្ចប់ជីវិតនយោបាយលោកសម រង្ស៊ីរបស់បក្សកាន់អំណាចគឺមិនមានប្រសិទ្ធភាពនោះទេ ព្រោះសង្គមប្រជាធិបតេយ្យជីវិតអ្នកនយោបាយអាស្រ័យលើការគាំទ្ររបស់ប្រជាពលរដ្ឋ។
បន្ថែមលើចេតនាវិសោធនកម្មច្បាប់ស្តីពីគណបក្សនយោបាយនេះទៀត ស្ថានការណ៍នយោបាយនៅកម្ពុជាកាន់តែតានតឹងខ្លាំងឡើងៗ ព្រោះថាគណបក្សប្រជាជនបានវិសោធនកម្មលុបចោលវប្បធម៌សន្ទនារវាងបក្សទាំងពីរ ហើយទាំងនាយករដ្ឋមន្ត្រី និងមន្ត្រីជាន់ខ្ពស់នៅតែបន្តផ្តល់ និងមានបំណងបង្កកទ្រព្យសម្បត្តិលោកសម រង្ស៊ីថែមទៀតផង។ ទន្ទឹមនឹងនេះ លោក សម រង្ស៊ីនៅតែបន្តវាយហារត្រង់ៗ និងឌឺដងមកលើលោកនាយករដ្ឋមន្ត្រីហ៊ុន សែន និងថ្នាក់ដឹកនាំគណបក្សប្រជាជនបន្តទៀត។
ចំពោះស្ថានភាពបែបនេះ ក្រុមអ្នកវិភាគនៅកម្ពុជា មានជាអាថ៌លោក អ៊ូ វីរៈ មានការព្រួយបារម្ភខ្លាំងចំពោះអ្នកនយោបាយដែលប្រើប្រាស់វិធីកំទេចដៃគូរប្រកួតយ៉ាងដូច្នេះ។ ហើយថា ស្ថានភាពនេះ នឹងធ្វើឱ្យប្រជាពលរដ្ឋ និងអ្នកវិនិយោគតឹងទ្រូងខ្លាំង និងព្រួយបារម្ភយ៉ាងខ្លាំង។ អ្នកវិភាគបានមើលឃើញថា ច្បាប់ដែលប្រឆាំងនឹងបុគ្គលជាជាងច្បាប់ដែលបម្រើផលប្រយោជនជាតិជារួមនេះ នឹងធ្វើឱ្យពលរដ្ឋអស់ជំនឿលើរដ្ឋាភិបាលនៃគណបក្សកាន់អំណាចកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ