លោកហ៊ុន សែន បង្ហាញការគាំទ្រជាថ្មីលើបេក្ខភាពប្រធានាធិបតីអាមេរិកលោក ដូ ណាល់ត្រាំ
លោកនាយករដ្ឋមន្រ្តី ហ៊ុន សែន នៅថ្ងៃទី ៧វិច្ឆិកានេះ បានបង្ហាញការគាំទ្រជាថ្មីទៅលើបេក្ខភាពប្រធានាធិបតីអាមេរិកមកពី គណបក្សសាធារណៈរដ្ឋ លោក ដូ ណាល់ត្រាំ និងបានការពារចំពោះការវិភាគរបស់លោកកាលពីថ្ងៃទី ៤វិច្ឆិកាកន្លងទៅ។ ទន្ទឹមគ្នានេះ ប្រមុខរដ្ឋាភិបាលកម្ពុជា ក៏បានប្រតិកម្មចំពោះការរិះគន់ថា លោកបានគាំទ្របេក្ខភាព ដែលជាជនផ្តាច់ការ។
ចុះផ្សាយនៅថ្ងៃ៖
ស្តាប់ - ០២:១៨
លោកនាយករដ្ឋមន្រ្តី ហ៊ុន សែន បានថ្លែងការពារទស្សនៈរបស់លោក ដែលគាំទ្របេក្ខភាពប្រធានាធិបតីអាមេរិកលោក ដូ ណាល់ត្រាំ មកពីគណបក្សសាធារណៈរដ្ឋ ទល់នឹងលោកស្រី ហ៊ីលឡារី គ្លីនតុន បេក្ខភាពប្រធានាធិបតីអាមេរិកមកពីគណបក្សប្រជាធិបតេយ្យថា គឺជាសិទ្ធិផ្ទាល់ខ្លួនរបស់លោក។
លោកនាយករដ្ឋមន្រ្តី ហ៊ុន សែន ដែលបានថ្លែងជាសាធារណៈនៅក្នុងពិធីចែកសញ្ញាប័ត្រដល់និស្សិតបញ្ចប់ការសិក្សានៅឯមជ្ឈមណ្ឌលកោះពេជ្យកាលពីព្រឹកថ្ងៃទី ៧ វិច្ឆិកានេះថា លោកមានសិទ្ធិក្នុងការវិភាគទៅលើប៉ូលនយោបាយនៅលើពិភពលោក ដែលនឹងមានឥទ្ធិពលមកលើគោលនយោបាយការបរទេសរបស់ពិភពលោកប្រសិនបើបេក្ខភាពណាមួយជាប់ឆ្នោត។ បើទោះបីជាការវិភាគរបស់លោក បានបង្ហាញការគាំទ្រជាថ្មី ទៅលើបេក្ខភាពប្រធានាធិបតីអាមេរិកថ្មី លោក ដូ ណាល់ត្រាំ ក្តី ក៏ប៉ុន្តែលោកបានថ្លែងការពារខ្លួនថា វាជាសិទ្ធិរបស់ពលរដ្ឋអាមេរិកកាំង។
សូមជម្រាបជូនថា កាលពីថ្ងៃទី ៣ វិច្ឆិកា លោកនាយករដ្ឋមន្ត្រី ហ៊ុន សែន បានថ្លែងក្នុងពេលជួបជាមួយក្រុមឧត្តមសេនីយ៍នគរបាលកម្ពុជាថា បើបេក្ខជនប្រធានាធិបតីអាមេរិក លោក ដូណាល់ត្រាំ ឈ្នះឆ្នោត នឹងធ្វើឲ្យពិភពលោកមានសន្តិភាព ព្រោះលោក ត្រាំ ជាអ្នកជំនួញ ប៉ុន្តែលោកក៏មិនបានបដិសេធបេក្ខភាពប្រធានាធិបតីអាមេរិកលោកស្រី ហ៊ីលឡារី គ្លីនតុននោះទេ។
នៅក្នុងសុន្ទរកថាជាសាធារណៈនៅថ្ងៃនេះ លោកនាយករដ្ឋមន្រ្តី ហ៊ុន សែន ដែលកាន់អំណាចជាង ៣០ឆ្នាំនៅកម្ពុជា ក៏បានប្រតិកម្មចំពោះការរិះគន់ពីបណ្តាញផ្សព្វផ្សាយព័ត៌មានអន្តរជាតិ និងអ្នកវិភាគមួយចំនួនថា ការវិភាគរបស់លោក ដែលគាំទ្របេក្ខភាពប្រធានាធិបតីអាមេរិកលោក ដូ ណាល់ត្រាំ គឺជាការគាំទ្រទៅលើជនផ្តាច់ការ ខណៈដែលមេដឹកនាំផ្តាច់ការនៅលើពិភពលោកបានប្រកាសជំហរគាំទ្របេក្ខភាពប្រធានាធិបតីអាមេរិក លោក ដូ ណាល់ត្រាំ ដែរ ដែលក្នុងនោះរួមមាន លោក Robert Mugabe មេដឹកនាំហ្ស៊ីមប៉ាវេ, លោក Kim Jong-un មេដឹកនាំកូរ៉េខាងជើង និងលោក Vladimir Putin មេដឹកនាំរុស្ស៊ីជាដើម។ ប្រតិកម្មរបស់លោកនាយករដ្ឋមន្រ្តី ក៏ទំនងជាសំដៅទៅលើប្រធានគណបក្សប្រឆាំងលោក សម រង្ស៊ី ដែលបានផ្តល់បទសម្ភាសន៍ដល់កាសែតជាភាសាអង់គ្លេស The Cambodia Daily ដោយបានចាត់ទុកលោក ត្រាំ ថា ជាជនផ្តាច់ការ ទើបធ្វើឲ្យលោកនាយករដ្ឋមន្រ្តី ហ៊ុន សែន គាំទ្រលោកត្រាំ។
សូមបញ្ជាក់ថា ការបោះឆ្នោតជ្រើសរើសប្រធានាធិបតីអាមេរិក នឹងធ្វើឡើងនៅថ្ងៃទី ៨វិច្ឆិកា ឆ្នាំ២០១៦នេះ ដែលត្រូវនឹងថ្ងៃពុធ ទី ៩វិច្ឆិកា ម៉ោងនៅក្នុងប្រទេសកម្ពុជា។ អ្នកវិភាគជាច្រើនបានលើកឡើងថា បើទោះបីជាបេក្ខជនណាមួយជាប់ឆ្នោត ក៏គ្មានភាពវិជ្ជមានដល់កម្ពុជាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ