ស្ថាបត្យករខ្មែរដ៏ល្បីល្បាញលោក វណ្ណ ម៉ូលីវណ្ណ ទទួលមរណៈភាពក្នុងវ័យ៩១ឆ្នាំ
លោក វណ្ណ ម៉ូលីវណ្ណ ស្ថាបត្យករខ្មែរដ៏ល្បីល្បាញបានទទួលមរណៈភាពហើយ កាលពីវេលាម៉ោង០៩និង៤៥នាទី ថ្ងៃទី២៨ខែកញ្ញានេះ ក្នុងជន្មាយុ៩១ឆ្នាំ ដោយជរាពាធ ។ សពលោក វណ្ណ មូលីវណ្ណ ត្រូវបានតម្កល់នៅគេហដ្ឋានរបស់លោកឯទីក្រុងសៀមរាបដើម្បីធ្វើបុណ្យតាមប្រពៃណី។ តើលោក វណ្ណ ម៉ូលីវណ្ណ ជានរណា?
ចុះផ្សាយនៅថ្ងៃ៖
ស្តាប់ - ០២:១៣
កើតនៅថ្ងៃទី២៣ខែវិច្ឆិកាឆ្នាំ១៩២៦ នៅស្រុករាម ខេត្តកំពត លោក វណ្ណ ម៉ូលីវណ្ណ គឺជា វរស្ថាបត្យករមួយរូបរបស់ខ្មែរ ដែលមានភាពល្បីល្បាញចាប់តាំងពីទសវត្សរ៍ឆ្នាំ១៩៥០។ លោកវណ្ណ ម៉ូលីវណ្ណ គឺជាបញ្ញវន្តមួយរូបដែលទទួលបានអាហារូបករណ៍ផ្នែកច្បាប់ នៅទីក្រុងប៉ារីស ប្រទេសបារាំង តែក្រោយមកលោកបានប្តូរជ្រើសរើសការសិក្សាផ្នែកស្ថាបត្យកម្មវិញ។
លោកវណ្ណ ម៉ូលីវណ្ណ បានក្លាយជាស្ថាបត្យករដ៏ល្បីល្បាញនិងមានទេពកោសល្យលើសគេ ជាពិសេសនៅក្នុងការរួមចំណែកបង្កើតស្ថាបត្យកម្មខ្មែរទំនើបនៅក្នុងសម័យសង្គមរាស្ត្រនិយម អំឡុងឆ្នាំ១៩៥៥ដល់១៩៧០ ដែលដឹកនាំដោយអតីតព្រះមហាក្សត្រខ្មែរសម្តេចព្រះនរោត្តម សីហនុ។
លោក វណ្ណ ម៉ូលីវណ្ណ ដែលជាអ្នកសីហនុនិយម បានបន្សល់ទុកនូវស្នាដៃនិងសមិទ្ធផលចំបងៗជាច្រើន ដូចជាសាលសន្និសីទចតុមុខ វិមានឯករាជ្យ ពហុកីឡាដ្ឋានជាតិអូឡាំពិក វិមានរដ្ឋចំការមន សាលមហោស្រពជាតិសុរាម្រឹត ដែលបានឆេះកាលពីឆ្នាំ១៩៩៤ វិទ្យាសា្ថនភាសាបរទេស សំណង់ស្ថានទូតខ្មែរនៅបរទេសនិងអាគារស្នាក់នៅរួមជាច្រើនទៀត។
បន្ទាប់ពីត្រលប់ពីប្រទេសបារាំងវិញកាលពីឆ្នាំ១៩៥៥ លោកវណ្ណ ម៉ូលីវណ្ណ ត្រូវបានតែងតាំងជាប្រធានស្ថាបត្យករនៅកម្ពុជា និងក្លាយជាព្រឹទ្ធបុរសដំបូងគេនៃសកលវិទ្យាល័យភូមិន្ទវិចិត្រសិល្បៈ ចាប់ពីឆ្នាំ១៩៦៥ដល់១៩៦៧។ លោក វណ្ណ ម៉ូលីវណ្ណ ក៏ធ្លាប់ធ្វើជាទេសរដ្ឋមន្ត្រី ទទួលបន្ទុកនគរូបនីយកម្មនិងសំណង់ និងជារដ្ឋមន្ត្រីក្រសួងវប្បធម៌ផងដែរ កាលពីជំនាន់អតីតរដ្ឋកម្ពុជា បន្ទាប់ពីលោកនិងក្រុមគ្រួសារ ដែលភរិយារបស់លោកជាជនជាតិស្វីស បានវិលត្រលប់ចូលប្រទេសកម្ពុជាវិញកាលពីឆ្នាំ១៩៩១។
ក្រៅពីទទួលបានការកោតសរសើរនូវស្នាដៃនិងទេពកោសល្យស្ថាបត្យកម្មគ្មានពីរថ្នាក់ជាតិហើយ លោក វណ្ណ ម៉ូលីវណ្ណ ក៏បានឈ្នះផងដែរនូវរង្វាន់ Nikkei អាស៊ី នៅឆ្នាំ២០១៣ និងរង្វាន់កិត្តិយសផ្នែកស្ថាបត្យកម្មមួយចំនួនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ