តំបន់អារ៉ែងខេត្តកោះកុង នឹងមានសេវាទូរសព្ទនិងអ៊ីនធឺណេតនាពេលដ៏ខ្លីខាងមុខ
ប្រជាពលរដ្ឋនៅតំបន់អារ៉ែង ស្ថិតក្នុងស្រុកថ្មបាំង ខេត្តកោះកុង នឹងមានសេវាទូរសព្ទក៏ដូចជាប្រព័ន្ធអ៊ីនធឺណេតប្រើប្រាស់នាពេលដ៏ខ្លីខាងមុខ។ នេះគឺជាការប្រកាសរបស់លោក ម៉ូវ ចរិយា ប្រធាននិយ័តករទូរគមនាគមន៍កម្ពុជា ទៅកាន់ប្រជាពលរដ្ឋនៅតំបន់អារ៉ែង ខណៈពេលលោកអញ្ជើញចុះទៅទីនោះ ចាប់ពីថ្ងៃទី២៣ ដល់ថ្ងៃទី២៥ខែសីហាកន្លងទៅ។
ចុះផ្សាយនៅថ្ងៃ៖
ស្តាប់ - ០១:៥៦
ប្រធាននិយ័តករទូរគមនាគមន៍កម្ពុជា មិនបានអញ្ជើញទៅតំបន់អារ៉ែងតែឯងទេ ប៉ុន្តែលោកបានដឹកនាំមន្ដ្រីជំនាញ ព្រមទាំងក្រុមហ៊ុនឯកជនមួយចំនួនទៀតដើម្បីសិក្សាពីលទ្ធភាព ក៏ដូចជាទីតាំងសម្រាប់តម្លើងបណ្ដាញសេវាទូរសព្ទចល័តនិងសេវាអ៊ីនធឺណេត នៅតំបន់អារ៉ែង។ ក្រុមហ៊ុនឯកជនទាំងនោះមានដូចជា ក្រុមហ៊ុនបណ្ដាញសេវាទូរសព្ទចល័ត (Cellcard, Smart, Viettel, និង qb), ក្រុមហ៊ុនសេវាអ៊ីនធឺណេត (Ezecom, និង TC), ក្រុមហ៊ុនបណ្ដាញខ្សែកាប្លិ៍អុបទិក ព្រមទាំងក្រុមហ៊ុនសាងសង់អង់តែន។
តាមរយៈដំណើរចុះទៅតំបន់អារ៉ែងនេះ ប្រធាននិយ័តករទូរគមនាគមន៍ លោក ម៉ូវ ចរិយា បានជំរុញឲ្យភាគីពាក់ព័ន្ធពន្លឿនការងារតម្លើងសេវាទូរសព្ទនិងអ៊ីនធឺណេតនេះឲ្យបានឆាប់រហ័សជូនប្រជាពលរដ្ឋ។ សម្រាប់ប្រធាននិយ័តករទូរគមនាគមន៍កម្ពុជារូបនេះ ប្រព័ន្ធទូរសព្ទនិងសេវាអ៊ីនធឺណេត មានសារៈសំខាន់ណាស់ ក្នុងការផ្ដល់ភាពងាយស្រួលដល់ការទាក់ទងរបស់ប្រជាពលរដ្ឋ ពិសេសគឺរួមចំណែកទាក់ទាញភ្ញៀវទេសចរ ឲ្យទៅកម្សាន្តនៅតំបន់អារ៉ែងកាន់តែច្រើន។
ទាក់ទងនឹងគម្រោងតម្លើងសេវាទូរសព្ទនិងអ៊ីនធឺណេតនៅតំបន់អារ៉ែងនេះ លោក អ៊ិន គង់ជិត មន្ដ្រីសម្របសម្រួលអង្គការលីកាដូប្រចាំខេត្តកោះកុង បានសម្ដែងការស្វាគមន៍។ លោក អ៊ិន គង់ជិត គូសបញ្ជាក់ថា ពេលមានសេវាទូរសព្ទនិងអ៊ីនធឺណេត បូករួមនឹងផ្លូវធ្វើដំណើរងាយស្រួល នោះតំបន់អារ៉ែងនឹងក្លាយខ្លួនទៅជាតំបន់អេកូទេសចរណ៍ដ៏ទាក់ទាញសម្រាប់ភ្ញៀវជាតិនិងអន្ដរជាតិ ជាក់ជាពុំខាន។
សូមជម្រាបជូនថា រហូតមកទល់ពេលនេះ ប្រជាសហគមន៍នៅជ្រលងអារ៉ែង ខេត្តកោះកុង គ្មានសេវាទូរសព្ទប្រើប្រាស់ទេ កុំថាឡើយដល់ប្រព័ន្ធអ៊ីនធឺណេត។ ដើម្បីទាក់ទងមកពិភពខាងក្រៅ ប្រជាសហគមន៍នៅតំបន់អារ៉ែង ត្រូវធ្វើដំណើរតាមផ្លូវដ៏លំបាកប្រមាណ២០គីឡូម៉ែត្រទៅទីរួមស្រុកថ្មបាំង ព្រោះសេវាទូរសព្ទនិងអ៊ីនធឺណេតមានត្រឹមតែនៅស្រុកថ្មបាំងប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ