កម្ពុជាត្រូវការពេលវេលាមធ្យមក្នុងការបណ្តុះបណ្តាលជំនាញបន្ថែម
នៅដំណាច់ឆ្នាំ២០១៥ ប្រទេសកម្ពុជានឹងធ្វើសមាហរណកម្មសេដ្ឋកិច្ចទៅក្នុងសហគមន៍អាស៊ាន ជាមួយគ្នានេះប្រទេសកម្ពុជាដែលបានបោះជំហ៊ានយឺតយ៉ាវជាងគេនៅក្នុងសហគមន៍នេះ មានបញ្ហាប្រឈមជាច្រើន ដែលត្រូវដោះស្រាយ។ ក៏ប៉ុន្តែអ្នកវិភាគសេដ្ឋកិច្ចកម្ពុជាមើលឃើញថា កម្ពុជាត្រូវចំណាយពេលវេលាកំរិតមធ្យមបន្ថែមទៀតលើ ការពង្រឹងសមត្ថភាពនិងគុណភាពការងារ ខណៈដែលជំហ៊ានដំបូង ប្រទេសមួយនេះត្រូវប្រឹងប្រែងរត់តាមគេជាមុនសិន មុនសមាហរណកម្មអាស៊ានទាំងស្រុងឬគ្រប់ផ្នែកឈានចូលមកដល់។
ចុះផ្សាយនៅថ្ងៃ៖
ស្តាប់ - ០២:៣៣
លោកនាយករដ្ឋមន្ត្រីហ៊ុន សែន កាលពីរសៀលថ្ងៃទី២២តុលា នៅក្នុងពិធីប្រកាសផ្សព្វផ្សាយ និងដាក់អោយអនុវត្តគោលនយោបាយជាតិស្តីពីមុខរបរនិងការងារឆ្នាំ២០១៥-២០២៥ បានលើកឡើងពីការរក្សាបាននូវភាពរឹងមាំនៃនយោបាយនិងម៉ាក្រូសេដ្ឋកិច្ចកម្ពុជារយៈពេលពីរទសវត្សកន្លងទៅនេះ។
កំលាំងពលកម្មកម្ពុជាបានកើនឡើងចំនួនជាង៣២០ ០០០នាក់ ក្នុងមូយឆ្នាំ ហើយអត្រាគ្មានការងារធ្វើ ត្រូវបានកាត់បន្ថយមកក្រោម១ភាគរយ ក្នុងនោះក៏មានស្ត្រី យុវជន ជនពិការនិងជនងាយរងគ្រោះ ក៏ត្រូវបានជម្រុញនៅក្នុងវិស័យការងារ។
ទន្ទឹមនឹងមោទនភាពនេះ ប្រមុខរដ្ឋាភិបាលខ្មែរក៏បានលើកឡើងពីចំណុចមួយចំនួនដែលជាការប្រឈមផងដែរ ដូចជាកំណើនការងារភាគច្រើន កើតនៅក្នុងវិស័យកសិកម្ម និងវិស័យ ក្រៅប្រព័ន្ធ ដោយសារមូលដ្ឋានកំណើននៅមានលក្ខណៈតូចចង្អៀត ហើយដែលមានការពឹងផ្អែកលើវិស័យសំណង់ កសិកម្ម កាត់ដេរ និងទេសចរណ៍ ដែលលោកយល់ថាវិស័យទាំងនេះបានស្រូបយកបានមួយកំរិតកំលាំងពលកម្មគ្មានជំនាញ ហើយទទួលមកវិញនូវបទពិសោធន៍ការងារតិចតួច។
ជាមួយគ្នានេះ លោកស្រី ចន្ធី អ្នកវិភាគសេដ្ឋកិច្ចកម្ពុជាលើកឡើងថា កម្ពុជានៅមិនមាន សមត្ថភាពជំនាញអាចប្រកួតប្រជែងជាមួយសមាជិកអាស៊ានដទៃទៀតនៅឡើយ ជាពិសេសធនធានមនុស្សលើវិស័យឧស្សាហកម្មធន់ធ្ងន់ ដោយសារតែយុវជនខ្មែរនាំគ្នារៀនតែផ្នែកគ្រប់គ្រង។ ដូច្នេះចង់មិនចង់កម្ពុជានឹងមានការចាញ់ប្រៀបគេ នៅក្នុងជំហ៊ានដំបូងនៃការច្របាច់ចូលគ្នាលើវិស័យការងារ។
ទោះយ៉ាងនេះក្តី លោកស្រី ចន្ធី គាំទ្រចំពោះការធ្វើសមាហរណកម្មនេះ ដោយសារវាអាចជួយជម្រុញធនធានពលកម្មពីប្រទេសកម្ពុជាឲ្យរត់តាមគេ វាជាការប្រសើរ។ហើយម៉្យាងទៀតកម្ពុជាទំនងជាត្រូវការពេលវេលាមធ្យមមួយ ក្នុងការប្រឹងប្រែងបន្ថែមលើគុណភាព នេះចំពោះវិស័យ ទីផ្សារការងារ។ ក៏ប៉ុន្តែចំពោះវិស័យផ្សេងៗទៀត លោកយល់ថាប្រទេសកម្ពុជាក៏អាចមានសមត្ថភាពប្រកួតប្រជែងជាមួយប្រទេសជាសមាជិកអាស៊ានមួយចំនួនផងដែរ។
សូមបញ្ជាក់ថាដើម្បីជំនះបាននូវបញ្ហាប្រឈម រដ្ឋាភិបាលបានរៀបចំនិងដាក់ចេញគោលនយោបាយជាតិស្តីពីមុខរបរនិងការងារឆ្នាំ២០១៥-២០២៥នេះ ដោយមានគោលបំណងសំខាន់៣ គឺ ការបង្កើនឱកាសការងារសមរម្យ និងមានផលិតភាពការងារខ្ពស់ ការជំរុញការអភិវឌ្ឍជំនាញ និងធនធានមនុស្ស និងការពង្រឹងអភិបាលកិច្ចទីផ្សារការងារផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ