វត្តមានអ្នកសង្កេតការណ៍ACU បន្លាចទាំងបេក្ខជនប្រឡង និងគ្រូគណៈមេប្រយោគ
បន្ទាប់ពីអញ្ជើញបើកកញ្ចប់វិញ្ញាសារ និងត្រួតពិនិត្យមណ្ឌលប្រលង នៅវិទ្យាល័យព្រះស៊ីសុវត្ថិ ក្នុងរាជធានីភ្នំពេញ នៅព្រឹក នេះ លោក ហង់ ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានថ្លែងចំណាប់អារម្មណ៍ថា ការប្រឡងសញ្ញាបត្រមធ្យមសិក្សាទុតិយភូមិ និងបំពេញវិជ្ជា ឆ្នាំ២០១៦នេះ មានការប្រែប្រួលល្អជាងឆ្នាំមុន ចំពោះការយកសំណៅឯកសារ ចូលមណ្ឌលប្រលង និងការត្រៀមខ្លួនរបស់បេក្ខជន។ ដោយឡែក អ្នកស្រី អ៊ុក ឆាយ៉ាវី ប្រធានស្តីទីសមាគមគ្រូបង្រៀនកម្ពុជាឯករាជ្យ ដែលសង្កេតការណ៍ប្រលងពីខាងក្រៅមណ្ឌល សម្តែងក្តីបារម្ភថា វត្តមានអ្នកសង្កេតការណ៍ មកពីអង្គភាពប្រឆាំងអំពើពុករលួយ អាចបង្កើនសម្ពាធទៅលើបេក្ខជន និងគ្រូគណៈមេប្រយោគ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៤
រដ្ឋមន្រ្តីក្រសួងអប់រំ យុវជន និងកីឡា លោក ហង់ ជួន ណារ៉ុន បានថ្លែងថា នៅព្រឹកថ្ងៃទី២២ សីហា នេះថា គ្មានការនាំឯកសារមេរៀនចូល មណ្ឌលប្រលងវិទ្យាល័យព្រះស៊ីសុវត្ថិទាល់តែសោះ បើធៀបនឹងឆ្នាំមុនៗ នៅមានសិស្សខ្លះនាំសំណៅឯកសារមេរៀនចូលមណ្ឌលប្រលង ដូច្នេះវាស្តែងអោយឃើញថា បេក្ខជនមានទំនុកចិត្ត និងរៀនបានច្រើនជាងឆ្នាំមុនៗ។
មិនខុសគ្នាទេ ទាំងសមាគមគ្រូបង្រៀនកម្ពុជាឯករាជ្យ ថ្នាក់ដឹកនាំមន្រ្តីសង្កេតការណ៍ មកពីសហភាពសហព័ន្ធយុវជនកម្ពុជា អង្គភាពប្រឆាំងអំពើពុករលួយ អាជ្ញាធរមូលដ្ឋាន សុទ្ធតែសាទរចំពោះការផ្លាស់ប្តូរឥរិយាបថជាវិជ្ជមានរបស់សិស្សានុសិស្សនាសម័យប្រលងឆ្នាំ២០១៦នេះ។ ប៉ុន្តែ អ្នកស្រី អ៊ុក ឆាយ៉ាវី ប្រធានស្តីទីរបស់សមាគមគ្រូបង្រៀនកម្ពុជាឯករាជ្យ បានសម្តែងក្តីបារម្ភថា វត្តមាន អ្នកសង្កេតការណ៍ ជាយុវជនយ៉ាងច្រើន មកពីអង្គភាពប្រឆាំងអំពើពុករលួយ ដែលត្រួតពិនិត្យចាប់ពីច្រកចេញ-ចូលមណ្ឌល ក្នុងបរិវេណមណ្ឌលប្រលង និងបន្ទប់ប្រលង បានបង្កើនភាពតានតឹងសម្រាប់បេក្ខជន និងគណៈកម្មការត្រួតពិនិត្យការប្រលងទៅវិញ។ អ្នកស្រី បញ្ជាក់ថា បេក្ខជន និងគណៈប្រយោគ ដែលភាគខ្លះជាគ្រូបង្រៀនរបស់អ្នកសង្កេតការណ៍ផងនោះ មានសម្ពាធ ដោយសារ ពួកគាត់មានអារម្មណ៍ថា ត្រូវគេឃ្លាំមើល ដូចជាចំណាត់ខ្មាំង។
ឆ្លើយតបនឹង ការលើកឡើងនេះ លោក រស់ សាលីន អ្នកនាំពាក្យក្រសួងអប់រំ ចាត់ទុកថា ការលើកឡើងអំពីផលរំខាន ដោយសារអ្នកសង្កេតការណ៍ វាជាចេតនាមួយផ្សេងរបស់អ្នកលើកឡើង។ អ្នកនាំពាក្យក្រសួងអប់រំ បានបន្ថែមថា អាចមានការរំខានតិចតួចបំផុត ដោយសារបេក្ខជន អង្គុយក្នុងបន្ទប់ តាមលេខតុរៀងខ្លួន បំពេញកិច្ចការប្រលង ដោយឡែកមេប្រយោគ អនុរក្ស ក៏បំពេញការងាររបស់ខ្លួន ហើយអ្នកសង្កេតការណ៍ ដើរមើល នៅក្រៅបន្ទប់ទេ មិនពាក់ព័ន្ធដល់ការរំខានឡើយ។ វត្តមានអ្នកសង្កេតការណ៍ គឺដើម្បីអនុញ្ញាតអោយសិស្សប្រលងដោយសមត្ថភាពខ្លួនឯង រក្សាបរិយាកាសស្ងប់ស្ងាត់ ច្បាស់លាស់ និងធានាប្រសិទ្ធិភាពដំណើរការប្រលង។
គួររំលឹកថា សម័យប្រលងបាក់ឌុប ឆ្នាំ២០១៦ នេះ ក្រសួងអប់រំ រួមនឹង អង្គភាពប្រឆាំងអំពើពុករលួយ អង្គការសង្គមស៊ីវិល បានដាក់ពង្រាយអ្នកសង្កេតការណ៍ស្មគ្រចិត្តជាង ៦០០០នាក់ ដើម្បីត្រួតពិនិត្យការប្រលង ដែលមានបេក្ខជនសរុប ជាង ៩៣,៧៥២នាក់ ក្នុងនោះបេក្ខនារី មានជាង ៤៥,២៣៧នាក់ ចែកជា ១៥៧មណ្ឌល ឬ ៣,៧៣១បន្ទប់ ទូទាំង ២៥រាជធានី ខេត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ