កុមារខ្មែរក្រីក្រអាចប្រឈមនឹងបញ្ហាសុខមាលភាព ប្រសិនបើគន្ធបុប្ផាបាត់បង់និរន្តរភាព
ចុះផ្សាយនៅថ្ងៃ៖
ស្តាប់ - ០៥:១៨
លោកវេជ្ជបណ្ឌិត Beat Richner ស្ថាបនិកមន្ទីរពេទ្យគន្ធបុប្ផា គឺជាអ្នកមានគុណលើកុមារខ្មែរ ដោយមិនដឹងរកអ្វីមកប្រៀបផ្ទឹមបាន។ ក្នុងវ័យ ៧០ឆ្នាំ ពេលនេះលោកវេជ្ជបណ្ឌិតបានធ្លាក់ខ្លួនឈឺជាទំងន់ និងសុំលាលែងពីការងារ។ ទោះយ៉ាងណាគេនៅរំពឹងទៅលើអ្នកបន្តវេនរបស់លោក Richner ដែលជាអនុប្រធានមន្ទីរពេទ្យគន្ធបុប្ផា។ រីឯស្ថានភាពទៅថ្ងៃក្រោយថានឹងមានអ្វីកើតឡើង នៅមានភាពស្រពិចស្រពិលនៅឡើយ។ ក៏ប៉ុន្តែបន្ទុកដ៏ធ្ងន់ធ្ងរនេះ នឹងអាចធ្លាក់ទៅលើវិស័យសុខាភិបាលខ្មែរ ប្រសិនបើមានហានិភ័យណាមួយ ទាក់ទងទៅនឹងនិរន្តរភាពរបស់មន្ទីរពេទ្យសប្បុរសនេះ។
អស់រយៈពេល ២៤ឆ្នាំ លោកវេជ្ជបណ្ឌិត Beat Richner ដែលជាជនជាតិស្វីស បានចំណាយជីវិត ចុងក្រោយរបស់លោកសម្រាប់ប្រទេសកម្ពុជា។ ដោយមិនបានគិតគូរជាចំបងអំពីខ្លួនឯងនិងក្រុមគ្រួសារ បុរសសញ្ជាតិស្វីសរូបនេះ បានធ្វើការលះបង់ ដ៏ធំធេងសម្រាប់ប្រទេស និងកុមារកម្ពុជា ខណៈដែលប្រទេសនេះ បានឆ្លងកាត់ភ្នក់ភ្លើងសង្គ្រាមអស់រយៈពេល ៣០ឆ្នាំ។
រយៈជាង ២០ឆ្នាំមកនេះ មន្ទីរពេទ្យគន្ធបុប្ផា បានចំណាយអស់ថវិកា ប្រមាណជាង ៥៦០លានដុល្លារ ដោយថវិកា ៨៦,៦ភាគរយ បានមកពីការខិតខំច្នៃប្រឌិតក្នុងការរៃអង្គាសរបស់លោកវេជ្ជបណ្ឌិត Beat Richner ពីសប្បុរសជនដែលរស់នៅក្នុងប្រទេសស្វីស និងជនជាតិស្វីស។ ៨,៩ភាគរយ បានមកពីវិភាគទានរបស់រដ្ឋាភិបាលស្វីស និង ៤,៧ភាគរយគឺជាថវិកាចូលរួមវិភាគទានរបស់រដ្ឋាភិបាលកម្ពុជា។ ក្នុងការពិនិត្យនិងព្យាបាលកុមារ ជាមធ្យមមន្ទីរពេទ្យគន្ធបុប្ផាទាំង៥ ចំណាយអស់ថវិកាចំនួន ១២ម៉ឺនដុល្លារ ក្នុងមួយថ្ងៃ។
ជាទូទៅកុមារខ្មែរ ដែលមានជំងឺធ្ងន់ៗ ប្រមាណជាង ១៥លាននាក់ បានទទួលសេវាពិនិត្យ ពិគ្រោះជំងឺ និងព្យាបាលដោយឥតគិតថ្លៃពីមន្ទីរពេទ្យគន្ធបុប្ផា ប្រកបដោយគុណភាពខ្ពស់។ ស្ទើរតែទាំងអស់នៃកុមារខ្មែរដែលទៅទទួលសេវា នឹងមិនមានភ័ព្វសំណាងទេ ប្រសិនបើគ្មានមន្ទីរពេទ្យដ៏សប្បុរសមួយនេះ។
ទាំងអស់នេះ គឺបានមកដោយសារការលះបង់ដ៏ខ្ពស់បំផុតរបស់លោកវេជ្ជបណ្ឌិត Beat Richner។ ពលិកម្មដ៏ធំធេងនេះ ត្រូវបានចោទជាសំណួរគ្រប់គ្នាពីអ្នកបន្តវេន និងអនាគតមន្ទីរពេទ្យគន្ធបុប្ផា ខណៈដែលលោកវេជ្ជបណ្ឌិតកំពុងតែមានជំងឺធ្ងន់ខ្លួនឯង និងប្រកាសលាលែងពីការងារគ្រប់គ្រងមន្ទីរពេទ្យ។
បើតាមការពិនិត្យមើលដំណើរការរបស់មន្ទីរពេទ្យគន្ធបុប្ផាពីដើមមក ឃើញថាគឺជារឿងដោយឡែកពីរដ្ឋាភិបាល ដែលមន្ទីរពេទ្យនេះត្រូវមានការគិតគូរខ្លួនឯងចំពោះការងារបន្តវេន ប្រធានមន្ទីរពេទ្យ ដែលមានវ័យកាន់តែជរាទៅហើយនោះ។ ក៏ប៉ុន្តែរឿងនេះចង់មិនចង់ គឺពិតជាជាប់ទាក់ទងទៅនឹងរដ្ឋាភិបាលកម្ពុជាផងដែរ ដោយសារតែមន្ទីរពេទ្យគន្ធបុប្ផា ស្ថិតនៅក្នុងទឹកដីកម្ពុជា ហើយជួយពិនិត្យ និងព្យាបាលកុមារខ្មែរទៅទៀត តាមស្តង់ដារសុខាភិបាលមួយដែលមានប្រសិទ្ធភាពខ្ពស់។
គេនៅចាំបានថា កាលពី ៥ឆ្នាំមុន លោកវេជ្ជបណ្ឌិត Beat Richner បានបង្ហើបពីការប្រើប្រាស់ថាមពលចុងក្រោយនិងការនឿយហត់របស់លោក ដែលកាលណោះលោកមានវ័យ ៦៥ឆ្នាំ។ តាមរយៈនៃការបង្ហាញអាកប្បកិរិយាគួរឲ្យអាណិតបែបនេះ រដ្ឋាភិបាលកម្ពុជា ស្ថាប័នសាធារណៈ វិស័យឯកជន សប្បុរសជន និងពលរដ្ឋខ្មែរទូទៅ បានបំផុសចលនាម្តងមកហើយ ពីការរួមគ្នាជួយទ្រទ្រង់ហិរញ្ញវត្ថុដល់មន្ទីរពេទ្យគន្ធបុប្ផាទៅតាមលទ្ធភាព។ សកម្មភាពនេះ គឺជាការធ្វើតេស្តមួយក៏ថាបាន។ ក៏ប៉ុន្តែចលនានេះ ហាក់ដូចជារប៉េះរប៉ោះ ហើយបើពិនិត្យមើលឲ្យបានជាក់លាក់ ទឹកចិត្តដែលជួយដោយពលរដ្ឋខ្មែរខ្លួនឯង នឹងមិនអាចឆ្លើយតបទៅនឹងការចំណាយតាមស្តង់ដារ ដែលមន្ទីរពេទ្យគន្ធបុប្ផាកំពុងប្រតិបត្តិការឡើយ។
ដោយឡែកទន្ទឹមគ្នានឹងវត្តមានរបស់មន្ទីរពេទ្យគន្ធបុប្ផារយៈពេល ២៤ឆ្នាំមកនេះ រដ្ឋាភិបាលក៏មានមន្ទីរពេទ្យរដ្ឋរបស់ផងខ្លួនដែរ។ ជាទូទៅមន្ទីរពេទ្យរដ្ឋមានលក្ខណៈជាហិរញ្ញវត្ថុស្វយ័តជាពិសេសនៅភ្នំពេញ គឺការគ្រប់គ្រងបែបរដ្ឋ តែការចាយវាយលុយបែបឯកជន។ មានន័យថាជាសេវាត្រូវតែបង់លុយក្នុងកំរិតណាមួយ តែក្នុងនោះមានការបែងចែកអត្តសញ្ញាណជាជនក្រីក្រផងដែរ។ ប្រសិនបើនិរន្តរភាពរបស់មន្ទីរពេទ្យគន្ធបុប្ផានៅថ្ងៃក្រោយ មិនមានប្រសិទ្ធភាពដូច សម័យកាលលោកវេជ្ជបណ្ឌិត Beat Richner គ្រប់គ្រង គេរំពឹងថានឹងចូលទៅក្នុងផ្លូវដែលមិនអាចចៀសវាងបានគឺការគ្រប់គ្រងដោយរដ្ឋ។ ចំណុចនេះ ប្រសិនបើរដ្ឋាភិបាលខ្មែរ ជ្រើសរើសយករបៀបគ្រប់គ្រងដូចជាមន្ទីរពេទ្យរដ្ឋ នោះវានឹងបញ្ច្រាស់ពីយន្តការដែលមន្ទីពេទ្យគន្ធបុប្ផាកំពុងធ្វើសព្វថ្ងៃ។
ជាផលលំបាក គឺប្រជាពលរដ្ឋខ្មែរក្រីក្រ ដែលធ្លាប់តែនាំកូនទៅទទួលសេវាបែបមន្ទីរពេទ្យគន្ធបុប្ផា អាចនឹងប៉ះពាល់អារម្មណ៍ ហើយកុមារជាច្រើនអាចប្រឈមនឹង ការរកសេវាព្យាបាលដោយឥតគិតថ្លៃប្រកបដោយប្រសិទ្ធភាពដូចមុនលែងបាន។ បន្ទុកនេះត្រូវធ្លាក់ទាំងស្រុងទៅលើរដ្ឋាភិបាល ដែលចង់មិនចង់អាចធ្វើឲ្យសេវាសុខាភិបាលដើរថយក្រោយ ដោយសារតែអត្រាគ្រោះថ្នាក់ ដោយសារជំងឺ របស់កុមារស្ថិតក្នុងស្ថានភាពគួរព្រួយបារម្ភ។
ដូច្នេះ អ្វីដែលជាការចង់បាននឹងសង្គ្រោះបឋម គឺអាស្រ័យទៅលើសមត្ថភាពរបស់អ្នកបន្តវេនលោកវេជ្ជបណ្ឌិត Beat Richner ខណៈដែលរដ្ឋាភិបាលស្វីសបានអះអាងពីការជួយដល់មន្ទីរពេទ្យគន្ធបុប្ផាជាបន្ត។ ទោះយ៉ាងណារដ្ឋាភិបាលកម្ពុជាក៏ត្រូវត្រៀមខ្លួនជាស្រេចដែរក្នុងការរង់ចាំទទួលនូវអំរែកដ៏ធ្ងន់ធ្ងរនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ