វិស័យសារព័ត៌មានកម្ពុជាប្រសើរឡើង ប៉ុន្តែឧបសគ្គនៅតែមាន
ចុះផ្សាយនៅថ្ងៃ៖
ស្តាប់ - ០៤:៣២
នៅក្នុងឱកាសទិវាសេរីភាពសារព័ត៌មាន ថ្ងៃទី៣ឧសភា អង្គការអន្ដរជាតិផ្នែកសារព័ត៌មានបានវាយតម្លៃថា សេរីភាពសារព័ត៌មាននៅកម្ពុជាក្នុងឆ្នាំ២០១៥នេះ មានភាពប្រសើរឡើងបើធៀបទៅនឹងឆ្នាំ២០១៤កន្លងទៅ។ អ្នកដែលធ្វើការនៅក្នុងវិស័យសារព័ត៌មានខ្លួនឯង ក៏បានទទួលស្គាល់ពីភាពប្រសើរឡើងនេះផងដែរ។ ប៉ុន្តែថា ភាពប្រសើរឡើងនេះ កើតឡើងទន្ទឹមនឹងឧបសគ្គមួយចំនួន ដែលទាមទារឲ្យមានការយកចិត្តទុកដាក់ជាចាំបាច់។
មួយឆ្នាំចុងក្រោយនេះ ការប្រែប្រួលជាវិជ្ជមានមួយចំនួនត្រូវបានគេប្រទះឃើញ នៅក្នុងវិស័យសារព័ត៌មានកម្ពុជា។ ថ្មីៗនេះ អង្គការអ្នកកាសែតគ្មានព្រំដែន ដែលជាអង្គការអន្ដរជាតិផ្នែកសារព័ត៌មាន បានវាយតម្លៃថា សេរីភាពសារព័ត៌មាននៅកម្ពុជាក្នុងឆ្នាំ២០១៥នេះ មានភាពប្រសើរឡើង បើធៀបទៅនឹងឆ្នាំ២០១៤កន្លងទៅ។ ភាពប្រសើរឡើងនេះ សូម្បីតែអ្នកដែលធ្វើការនៅក្នុងវិស័យសារព័ត៌មានខ្លួនឯង ក៏បានទទួលស្គាល់ដែរ។
កំណែទម្រង់វិស័យសារព័ត៌មាននៅក្រោយការបោះឆ្នោតជាតិអាណត្តិទី៥ ទំនងជាហេតុផលមួយដែលរួមចំណែកធ្វើឲ្យវិស័យសារព័ត៌មាននៅកម្ពុជាប្រសើរឡើង។
ជាបឋម គឺការតែងតាំងឲ្យមានអ្នកនាំពាក្យនៅតាមក្រសួង ស្ថាប័នរដ្ឋ។ អ្នកនាំពាក្យនៅតាមស្ថាប័នរដ្ឋជាច្រើន បានផ្ដល់ការសហការផ្ដល់ព័ត៌មានយ៉ាងល្អប្រសើរជាមួយអ្នកកាសែត។ បើទោះបីជាអ្នកនាំពាក្យនៅតាមស្ថាប័នមួយចំនួននៅមិនទាន់ចេះធ្វើការឲ្យបានរលូនល្អជាមួយអ្នកកាសែតក៏ដោយ ក៏យ៉ាងហោចណាស់ ប្រភពព័ត៌មានពីសំណាក់អាជ្ញាធរ បាននិងកំពុងបន្លឺសំឡេងនៅក្នុងប្រព័ន្ធផ្សព្វផ្សាយឯករាជ្យជាបន្តបន្ទាប់។ និន្នាការថ្មីនេះ គឺខុសស្រឡះពីពេលមុន ដែលសំឡេងរបស់អាជ្ញាធរមិនសូវមានវត្តមានក្នុងប្រព័ន្ធផ្សព្វផ្សាយឯករាជ្យនោះឡើយ។
ក្រៅពីបង្កើតឲ្យមានអ្នកនាំពាក្យនៅតាមក្រសួងស្ថាប័នរដ្ឋហើយ រដ្ឋាភិបាលកម្ពុជាក៏កំពុងតែព្យាយាមអភិវឌ្ឍខ្លួនឲ្យក្លាយជារដ្ឋាភិបាលអេឡិចត្រូនិកយ៉ាងពេញលេញ តាមរយៈការធ្វើបច្ចុប្បន្នភាពជាទៀងទាត់នូវគេហទំព័រនិងបណ្ដាញសង្គមរបស់ខ្លួន។ សកម្មភាពនេះ បានរួមចំណែកយ៉ាងច្រើនដល់ការទទួលបានព័ត៌មានរបស់អ្នកកាសែត។ គួរកត់សម្គាល់ថា ការផ្លាស់ប្ដូរអស់ទាំងនេះ កើតឡើងទន្ទឹមគ្នានឹងការរៀបចំបង្កើតច្បាប់ស្ដីពីសិទ្ធិទទួលបានព័ត៌មាន។ ច្បាប់ស្ដីពីសិទ្ធិទទួលបានព័ត៌មានដែលជាសេចក្ដីសង្ឃឹមនិងក្ដីបារម្ភរបស់អ្នកកាសែត។
សញ្ញាវិជ្ជមានមួយទៀត ដែលអាចពន្យល់អំពីភាពប្រសើរឡើងនៃវិស័យសារព័ត៌មាននាពេលចុងក្រោយនេះដែរនោះ គឺវត្តមាននៃទូរទស្សន៍របស់បក្សប្រឆាំង ដែលត្រូវបានអះអាងថា នឹងលេចចេញជារូបរាងនៅក្នុងឆ្នាំ២០១៥នេះ។ ប្រសិនជាត្រូវបង្កើតឡើងដោយជោគជ័យមែននោះ ប៉ុស្តិ៍ទូរទស្សន៍ដែលមានសមានចិត្តជាមួយគណបក្សប្រឆាំងនេះ នឹងនាំមកនូវភាពចម្រុះដល់វិស័យសារព័ត៌មាន និងប្រព័ន្ធផ្សព្វផ្សាយនៅកម្ពុជា។
បន្ថែមពីលើកំណែទម្រង់របស់ស្ថាប័នរដ្ឋ ក្រុមហ៊ុនឯកជនដែលវិនិយោគលើវិស័យសារព័ត៌មាន ក៏បានបង្ហាញពីការប្ដេជ្ញាចិត្តច្រើនជាងមុន ក្នុងការបង្កើនគុណភាពព័ត៌មានរបស់ខ្លួនផងដែរ។ ក្នុងនោះ គេសង្កេតឃើញថា ក្រុមហ៊ុនព័ត៌មានស្ទើរតែទាំងអស់ មិនថាមាននិន្នាការគាំទ្រគណបក្សនយោបាយណាមួយទេ គឺសុទ្ធសឹងតែបានធ្វើកំណែទម្រង់ផ្ទៃក្នុង ព្រមទាំងពង្រឹងវិជ្ជាជីវៈរបស់ខ្លួន ក្នុងគោលដៅប្រកួតប្រជែងនៅក្នុងទីផ្សារព័ត៌មានដែលកំពុងមានហាងឆេងខ្ពស់នាពេលសព្វថ្ងៃនេះ។
ការវិវត្តថ្មីៗដូចដែលបានលើកឡើងខាងដើម គឺជាសញ្ញាណវិជ្ជមានដ៏ប្រសើរ នៅក្នុងវិស័យសារព័ត៌មានកម្ពុជា។ ប៉ុន្តែថា ភាពប្រសើរឡើងនេះ កើតឡើងទន្ទឹមនឹងឧបសគ្គមួយចំនួន ដែលចាំបាច់ត្រូវយកចិត្តទុកដាក់។ ក្នុងនោះ ការគំរាមកំហែង ការវាយប្រហារ និងអំពើឃាតកម្មជាដើម នៅតែជាក្ដីបារម្ភសម្រាប់អ្នកកាសែតនៅកម្ពុជា។ ជាមួយគ្នានេះ ការដាក់សម្ពាធពីអាជ្ញាធរ ព្រមទាំងបណ្ដឹងព្រហ្មទណ្ឌទៅលើអ្នកកាសែតនៅតែកើតឡើងជារឿយៗ ខណៈដែលអ្នកកាសែតគ្មានសហជីពដើម្បីគាំទ្រផ្លូវច្បាប់នៅឡើយ។
សរុបមកវិញ វិស័យសារព័ត៌មានកម្ពុជា នាមួយរយៈចុងក្រោយនេះ គឺពិតជាមានភាពល្អប្រសើរឡើងគួរឲ្យកត់សម្គាល់នៅត្រង់ចំណុចខ្លះ។ ប៉ុន្តែភាពប្រសើរឡើងនេះ មិនអាចធ្វើឲ្យមានការផ្លាស់ប្ដូរជាវិជ្ជមាននៅក្នុងវិស័យសារព័ត៌មានឡើយ ប្រសិនបើអំពើហិង្សានិងសម្ពាធផ្លូវច្បាប់ នៅតែគ្របដណ្ដប់លើសតិអារម្មណ៍របស់អ្នកកាសែតនោះ។ ដូច្នេះ ការលើកចេញនូវរបាំងដែលជាឧបសគ្គនៅក្នុងវិស័យសារព័ត៌មានដូចដែលបានលើកឡើងនេះ គឺជាវិញ្ញាសាថ្មីមួយទៀត ដើម្បីបញ្ជាក់ពីដំណើរការប្រជាធិបតេយ្យពិតប្រាកដនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ