យុទ្ធនាការថ្ងៃចន្ទពណ៌ខ្មៅ សកម្មជនពីរនាក់ត្រូវបានឃាត់ខ្លួន
រហូតមកទល់ពេលនេះ សកម្មជនដីធ្លីបឹងកក់២នាក់ដែលបានចូលរួមធ្វើយុទ្ធនាការពណ៌ខ្មៅហើយត្រូវបានសមត្ថកិច្ចចាប់ខ្លួនកាលពីម្សិលមិញនោះ ពុំទាន់ត្រូវបានអាជ្ញាធរដោះលែងនៅឡើយទេ។ ក្រៅពីការឃាត់ខ្លួនសកម្មជនទាំងពីរអ្នកនេះ សកម្មជនដីធ្លីបុរីកីឡាចំនួន៤ នាក់ទៀតក៏ត្រូវបានចាប់ខ្លួនផងដែរ។ ទោះជាយ៉ាងណាក៏ដោយ សកម្មជនបុរីកីឡាទាំង៤នាក់ ត្រូវបានអាជ្ញាធរដោះលែងកាលពីល្ងាចម្សិលមិញហើយ នៅឡើយតែ អ្នកស្រី ទេព វណ្ណី និង ប៊ូវ សោភា។ ព្រឿន បញ្ញារី ជូនព័ត៌មាន
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
សកម្មជនដីធ្លីបឹងកក់ចំនួន២នាក់ គឺអ្នកស្រី ទេព វណ្ណី និង ប៊ូវ សោភា ត្រូវបានកម្លាំងសមត្ថកិច្ចខណ្ឌដូនពេញ ឃាត់ខ្លួនភ្លាមៗ នៅល្ងាចថ្ងៃទី១៥ ខែសីហា ឆ្នាំ២០១៦ ខណ:ដែលពួកគេ កំពុងធ្វើសកម្មភាពយុទ្ធនាការថ្ងៃចន្ទពណ៌ខ្មៅ។ រហូតមកទល់ពេលនេះក្រុមគ្រួសាររបស់អ្នកទាំងពីរ កំពុងតែស្វះស្វែងរកមេធាវីដើម្បីជួយអោយមានការដោះលែងផងដែរ។
គោលបំណងនៃការធ្វើយុទ្ធនាការនេះគឺដើម្បីបន្តទាមទារឲ្យដោះលែងសកម្មជនសិទ្ធិមនុស្សសមាគមអាដហុក និង មន្រ្តីគជប ព្រមទាំង ទាមទារឲ្យរដ្ឋាភិបាលស្វែងរកការពិតនៅពីក្រោយឃាតកម្មលោកកែម ឡី ។ ហើយសម្រាប់យុទ្ធនាការនៅថ្ងៃចន្ទ ទី ១៥ ខែ សីហានេះ ពួកគេក៏បានបន្ថែមនូវគោលបំណងមួយទៀតគឺទាមទារអោយ អាជ្ញាធរដោះស្រាយជម្លោះដីធ្លីនៅតំបន់បឹងកក់ ក៏ដូចជាបញ្ហាដីធ្លីរាំរៃនៅក្នុងប្រទេសខ្មែរឲ្យចប់សព្វគ្រប់ផងដែរ។ ប៉ុន្តែយុទ្ធនាការនេះ ត្រូវបានហាមឃាត់ដោយរាជរដ្ឋាភិបាលកម្ពុជា ក្រោមហេតុផលថា ជាចលនាដែលមានលក្ខណៈជាបដិវត្តពណ៌ ។
ក្នុងយុទ្ធនាការពណ៌ខ្មៅនេះ សកម្មជនដីធ្លីដែលបានចូលរួមទាំងអស់នេះមិនត្រឹមតែមានលក្ខណ:ជាការប្រមូលផ្តុំនោះឡើយ ពោលគឺពួកគេបានធ្វើរួបត្លុកជាមនុស្ស ដោយសរសេរថា មន្រ្តីពុករលួយ តុលាការ អ្នកបញ្ជាសម្លាប់ និងឃាតករ ។ នៅក្នុងនោះដែលពួកគេបានយករូបត្លុក ទាំងនេះទៅកប់ចោលនៅក្នុងរណ្តៅដែលជីករួច ស្ថិតនៅទីតាំងបឹងកក់ សង្កាត់ស្រះចក ខណ្ឌដូនពេញ។
ជាមួយគ្នានេះ ជនបរទេសម្នាក់ក៏ត្រូវបានសមត្ថកិច្ចឃាត់ខ្លួនបញ្ជូនទៅកាន់ផ្នែកអន្តោប្រវេសន៍ផងដែរខណៈដែលគាត់កំពុងថតយកសកម្មភាពនៃការតវ៉ាអោយមានការដោះលែង សកម្មជនទាំងពីរនាក់នេះ ក្រោមហេតុផលថា ជនបរទេសម្នាក់នេះមិនមាន លិខិតឆ្លងដែន និងឯកសារពាក់ព័ន្ធច្បាស់លាស់សម្រាប់ការស្នាក់នៅប្រទេសកម្ពុជា។
គួររំលឹកថា យុទ្ធនាការថ្ងៃចន្ទពណ៌ខ្មៅត្រូវបាន ប្រជាសហគមន៍ដីធ្លី និង មន្ត្រីសង្គមស៊ីវិលធ្វើឡើង ដើម្បី សុំដោះលែងមន្រ្តីសិទ្ធិមនុស្ស អាដហុក លោក នី សុខា លោក ណៃ វ៉ង់ដា លោក យី សុខសាន្ត និង អ្នកស្រី លឹម មុន្នី និងមន្រ្តី គ.ជ.ប លោក នី ចរិយា ដែលរងការចោទ ពីបទសូក ប៉ាន់ សាក្សីនិងសមគំនិត ក្នុងអំពើសូកប៉ាន់សាក្សីទាក់ទងសំណុំរឿងលោក កឹម សុខា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ