កំណាត់ផ្លូវសំខាន់ៗនៅភ្នំពេញត្រូវហាមឃាត់មិនឲ្យហែក្បួនពេលឃោសនាបោះឆ្នោត
កំណាត់ផ្លូវនិងទីសាធារណៈសំខាន់ៗ ក្នុងរាជធានីភ្នំពេញ ត្រូវបានហាមឃាត់ទុកជាមុន មិនឲ្យគណបក្សនយោបាយហែក្បួនឃោសនាបោះឆ្នោត ជ្រើសរើស ក្រុមប្រឹក្សាឃុំសង្កាត់ ដែលនឹងមកដល់នៅថ្ងៃទី ២០ឧសភាខាងមុខនេះទេ។ ហេតុផលរបស់សាលារាជធានីភ្នំពេញគឺ ធានាសន្តិសុខ និងសណ្ដាប់ធ្នាប់សាធារណៈសម្រាប់គណបក្សនយោបាយ។ ម្យ៉ាងទៀតដើម្បីបញ្ចៀសការកកស្ទះចរាចរផង។ នេះគឺជាការជូនដំណឹងរបស់សាលារាជធានីភ្នំពេញផ្ញើទៅកាន់ស្ថាប័នជាតិរៀបចំការបោះឆ្នោត។ តែសម្រាប់អង្គការសង្គមស៊ីវិលធ្វើការផ្នែកបោះឆ្នោតបានហៅបម្រាបនេះថា ជាការបារម្ភជ្រុល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
ផ្លូវនានាក្នុងរាជធានីភ្នំពេញ ដែលត្រូវបញ្ចៀស ក្នុងការហែក្បួនឃោសនា សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់រួមមាន៖ កំណាត់ផ្លូវនរោត្តមចាប់ពីវិមានឯករាជ្យដល់ស្តុបពេទ្យអង្គឌួង។ ផ្លូវសហព័ន្ធរុស្ស៊ី និងកំណាត់ផ្លូវព្រះមុនីវង្ស ចាប់ពីស្តុបបេកាសេដល់ស្តុបពេទ្យចិន។ ក្រៅពីនេះនៅមានកំណាត់ផ្លូវទេពផន ចាប់ពីកែងស្តុបផ្លូវព្រះមុនីវង្សដល់ស្តុបនាងគង្ហីង។ ផ្លូវម៉ៅសេទុង ផ្លូវព្រះសុរាម្រិត កំណាត់ផ្លូវព្រះសីហនុ កំណាត់ផ្លូវព្រះសីហនុ ចាប់ពីនាគបាញ់ទឹក និងផ្លូវសុធារសដល់ស្តុបពេទ្យចិន។ ចុងក្រោយផ្លូវជុំវិញព្រះបរមរាជវាំង។
ក្រៅពីផ្លូវសំខាន់ៗត្រូវហាមឃាត់ហើយនោះទីប្រជុំជនសំខាន់ៗក៏មិនត្រូវអនុញ្ញាតឲ្យហែឆ្លងកាត់ដែរគឺរួមមាន៖ ផ្លូវជុំវិញផ្សារថ្មី ផ្លូវជុំវិញផ្សារអូរឬស្សី ផ្សារអូឡាំពិក ផ្លូវទួលទំពូង ផ្សារដើមគ និងផ្សារដេប៉ូជាដើម។ បន្ថែមពីលើនេះទៀត ទីសាធារណៈដែលត្រូវចៀសវាងក្នុងការប្រមូលផ្ដុំឃោសនារួមមាន៖សួនច្បារព្រះបរមរាជវាំង ទីធ្លាព្រះមេរុ សួនច្បារមុខវត្តបទុមវត្តី ទីធ្លារូបសំណាក់លោកយាយពេញ សួនច្បារព្រះភិរម្យ អ៊ូ ហៅង៉ុយ និងសួនច្បារ សម្ដេច ហ៊ុន សែន ។
គិតរហូតមកដល់ពេលនេះគជបនៅមិនទាន់ធ្វើការឆ្លើយតបបែបណានៅឡើយទេជុំវិញការហាមឃាត់នេះ។ ប៉ុន្តែសម្រាប់អង្គការស៊ីវិលធ្វើការងារផ្នែកបោះឆ្នោតចាត់ទុកបម្រាមរបស់សាលារាជធានីភ្នំពេញជាការព្រួយបារម្ភជ្រុល។
លោក សម គន្ធាមី ប្រធានអង្គការនិចហ្វិកបានផ្ដល់យោបល់ថា សាលារាជធានីភ្នំពេញគួរតែពិចារណាឡើងវិញចំពោះបម្រាមនេះ ព្រោះការឃោសនាធ្វើឡើងត្រឹមរយៈពេលខ្លីប៉ុណ្ណោះមិនមែនរាល់ថ្ងៃនោះទេ។ ហើយចំពោះក្ដីបារម្ភពីកកស្ទះចរាចរ ឬបារម្ភបញ្ហាសន្តិសុខនោះលោក សម គន្ធាមី មើលឃើញថា ប៉ូលីសចរាចរណ៍ពួកគាត់អាចជួយសម្រួលបាន។ បន្ថែមពីលើនេះទៀតលោកបានចោទជាសំណួរថា ប្រសិនបើការហាមឃាត់នេះធ្វើឡើងចំពោះតែផ្លូវសំខាន់ៗឬកន្លែងទីប្រជុំជននោះតើឃោសនាធ្វើឡើងដើម្បីឲ្យអ្នកណាស្ដាប់ឬដឹងលឺពីគោលនយោបាយរបស់បក្សនោះ។
តែយ៉ាងណាក៏ដោយសម្រាប់អ្នកនាំពាក្យសាលារាជធានីភ្នំពេញ លោក មាស ម៉េតភក្ដីបានឆ្លើយតបថានេះមិនមែនជាការបារម្ភជ្រុលរបស់សាលាក្រុងទេ ប៉ុន្តែជាការគិតគូរទុកជាមុនព្រោះដើម្បីកុំឲ្យកើតមានបញ្ហានៅផ្លូវសំខាន់ៗក្នុងក្រុង។ លោកថា គណបក្សនយោបាយនៅតែអាចធ្វើសកម្មភាពនយោបាយរបស់ខ្លួនបាននៅផ្លូវផ្សេងទៀតដែលមិនបានហាមឃាត់។ លោកបានថ្លែងការពារថា ការហាមឃាត់នេះក៏មិនមែនជាការបន្ទុចបង្អាក់ដល់សកម្មភាពឃោសនាដែរ។
សូមបញ្ជាក់ថា យុទ្ធនាការឃោសនាបោះឆ្នោតក្រុមប្រឹក្សាឃុំសង្កាត់នឹងចាប់ផ្ដើមនៅថ្ងៃទី ២០ឧសភាដល់ថ្ងៃទី ២មិថុនា។ ការឃោសនាជាលក្ខណៈទ្រង់ទ្រាយធំធ្វើឡើងបានតែពីរដងប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ