កងទ័ពកម្ពុជា-ឡាវ កំពុងប្រឈមមុខដាក់គ្នា នៅតំបន់មុំ៣ក្នុងខេត្តព្រះវិហារ
កងទ័ពកម្ពុជា-ឡាវ បានប្រឈមមុខដាក់គ្នាជាថ្មី នៅចំនុចទន្លេរពៅក្នុងតំបន់មុំ៣ ក្នុងខេត្តព្រះវិហារ ឈមនឹងខេត្តចំប៉ាសាក់ប្រទេសឡាវ។ តាមសេចក្តីរាយការណ៍នានា កងទ័ពឡាវនៅមិនទាន់ដកចេញពីចំណុចកើតហេតុ (WA25261-77542) នៅឡើយទេ ខណៈដែលភាគីកម្ពុជា ក៏បានបង្កើនកងទ័ព និងត្រៀមជម្លៀសប្រជាជនចំនួន៤ភូមិ ស្ថិតនៅក្នុងឃុំចំនួនពីរនៃស្រុកជាំក្សាន្ត ក្នុងករណីដែលមានការផ្ទុះអាវុធ។
ចុះផ្សាយនៅថ្ងៃ៖
ស្តាប់ - ០២:២៧
ដំណឹងនៃការប្រឈមមុខដាក់គ្នានេះ ត្រូវបានទម្លាយឲ្យដឹង នៅព្រឹកថ្ងៃទី ២៣ សីហានេះ តាមរយៈរបាយការណ៍របស់មន្ទីរព័ត៌មានខេត្តព្រះវិហារផ្ញើទៅកាន់រដ្ឋមន្ត្រីក្រសួងព័ត៌មានលោក ខៀវ កាញារីទ្ធ។ របាយការណ៍នេះបានឲ្យដឹងថា កងទ័ពឡាវបានបង្កើនកងកម្លាំងរបស់ខ្លួននៅព្រឹកថ្ងៃទី ២៣ សីហានេះ និងកំពុងបន្តឈរជើងនៅចំណុចទន្លេរពៅ ក្នុងតំបន់មុំ៣ (WA25261-77542) នៃខេត្តព្រះវិហារ ឈមនឹងខេត្តចំប៉ាសាក់ប្រទេសឡាវ។ ចំណែកឯភាគីកម្ពុជាឯណេះវិញ ក៏បានដាក់ពង្រាយកងទ័ពនៅតាមគោលដៅរួចជាស្រេចហើយដែរ។ បើតាមរបាយការណ៍ដដែល កាលពីថ្ងៃទី ២២ សីហា លោក ស្រី ឌឹក មេបញ្ជាការកងពលធំលេខ៣ ប្រចាំទិសខេត្តព្រះវិហារ ទើបតែបានប្រជុំផ្សព្វផ្សាយដល់ថ្នាក់ដឹកនាំ និងសមត្ថកិច្ចស្រុកជាំក្សាន្តឲ្យត្រៀមលក្ខណៈជម្លៀសប្រជាជនចំនួន៤ភូមិក្នុងឃុំចំនួនពីរនៃស្រុកជាំក្សាន្ត ខេត្តព្រះវិហារ ក្នុងករណីដែលមានការផ្ទុះអាវុធ។
គួរកត់សម្គាល់ថា ការប្រឈមមុខដាក់គ្នារវាងកងទ័ពកម្ពុជា-ឡាវនេះ បានកើតឡើងតាំងពីថ្ងៃទី ១៤ សីហាមកម្ល៉េះ បន្ទាប់ពីកងទ័ពឡាវបានលើកគ្នាចូលមកកាន់កាប់ទឹកដីខ្មែរក្នុងចំនុចទន្លេរពៅនេះ ដោយសំអាងថា ជាទឹកដីរបស់គេ។ បន្ទាប់មក កាលពីថ្ងៃទី ១៩ សីហា ភាគីទាំងពីរបានជួបចរចារគ្នាចំនួនពីរលើករួចមកហើយ ដោយក្នុងនោះ ភាគីកម្ពុជា បានស្នើសុំឲ្យភាគីឡាវដកចេញពីចំណុចកើតហេតុ (WA25261-77542)។ ប៉ុន្តែភាគីឡាវមិនព្រមដកចេញនោះទេ ហើយថែមទាំងបានអះអាងដោយយោងតាមផែនទីដែលបោះពុម្ពដោយប្រទេសវៀតណាមថា ចំណុចដែលពួកគេបោះទីតាំងនោះ គឺស្ថិតនៅក្នុងទឹកដីឡាវ ដែលមានចំងាយ១គីឡូម៉ែត្រពីព្រំដែន។
គួររំឭកជូនថា បញ្ហាព្រំដែនកម្ពុជា-ឡាវ ធ្លាប់បានជួបភាពតានតឹងខ្លាំងនឹងគ្នាម្តង កាលពីអំឡុងខែសីហា ឆ្នាំ២០១៧ កន្លងទៅ បន្ទាប់ពីយោធាឡាវបានចូលមកឈរជើងនៅតំបន់អូរអាឡៃ និងអូរតាង៉ាវ ស្ថិតក្នុងស្រុក សៀមប៉ាង ខេត្តស្ទឹងត្រែង។ ហេតុការណ៍នេះ បានជំរុញឲ្យប្រមុខរដ្ឋាភិបាលកម្ពុជាលោក ហ៊ុន សែន ហោះទៅកាន់ទីក្រុងវៀងច័ន្ទន៍ជាបន្ទាន់ ដើម្បីបន្ធូរបន្ថយភាពតានតឹងនោះ។ ហើយនៅប៉ុន្មានថ្ងៃក្រោយមក នាយករដ្ឋមន្រ្តីឡាវ លោក ថងលូន ស៊ីស៊ូលីត ក៏បានហោះមកកាន់ទីក្រុងភ្នំពេញវិញដែរ ដើម្បីដោះស្រាយលើបញ្ហាព្រំដែននេះ។ នៅក្នុងជំនួបដែលធ្វើឡើងនៅក្នុងទីក្រុងភ្នំពេញនោះ មេដឹកនាំទាំងពីរ បានឯកភាពគ្នាថា នឹងសរសេរលិខិតផ្ញើទៅកាន់ប្រធានាធិបតីបារាំង ដើម្បីស្នើសុំបញ្ជូនអ្នកជំនាញការព្រំដែនបារាំង ឲ្យមកជួយវាស់វែង និងដោះស្រាយបញ្ហាជម្លោះនៅតាមបន្ទាត់ព្រំដែនរវាងប្រទេសទាំងពីរ ដែលនៅសេសសល់ប្រមាណជា១៦%ទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ