គណៈកម្មាធិការព្រំដែន៖ បង្គោលលេខ៧៨ មិនបានបោះចូលដីកម្ពុជា៥គីឡូម៉ែត្រនោះទេ
គណៈកម្មាធិការចម្រុះព្រំដែនកម្ពុជា នៅថ្ងៃសុក្រនេះ បានប្រកាសទាត់ចោលការចុះផ្សាយតាមរយៈការធ្វើអត្ថាធិប្បាយរបស់គណនីហ្វេសប៊ុក ឈ្មោះ «Sila Chey» ទាក់ទងទៅនឹងបង្គោលព្រំដែនកម្ពុជា-វៀតណាម លេខ៧៨។ ការច្រានចោលរបស់គណៈកម្មាធិការព្រំដែនកម្ពុជានេះ ធ្វើឡើងបន្ទាប់ពីអត្ថាធិប្បាយតាមគណនេយ្យហ្វេសបុក Sila Chey នេះ បានធ្វើការចោទប្រកាន់កាលពីថ្ងៃទី២៥ ធ្នូ កន្លងទៅ ថាបង្គោលព្រំដែនលេខ៧៨ បានបោះចូលក្នុងដីកម្ពុជាជាង៥គីឡូម៉ែត្រ។
ចុះផ្សាយនៅថ្ងៃ៖
ក្នុងបំណងបញ្ចៀសនូវការយល់ច្រឡំ គណៈកម្មាធិការចម្រុះកិច្ចការព្រំដែនកម្ពុជា បានធ្វើការពន្យល់ថា បង្គោលព្រំដែនលេខ៧៨ផ្លូវការ គឺជាប្រភេទបង្គោលភ្លោះ រួមមានបង្គោលលេខ៧៨(១) និងបង្គោលលេខ៧៨(២) ដោយបង្គោលលេខ៧៨(១) បោះនៅត្រើយខាងលិចទន្លេចាម លើទឹកដីកម្ពុជាក្នុងភូមិសាស្ត្រឃុំជាំក្រវៀន ស្រុកមេមត់ ខេត្តត្បូងឃ្មុំ។
ដោយឡែកបង្គោលលេខ៧៨(២)វិញ គឺនៅត្រើយខាងកើតទន្លេចាម លើទឹកដីវៀតណាមក្នុងភូមិសាស្ត្រ ស្រុកឡុកនិញ ខេត្តប៊ិញភឿក។ ខ្សែព្រំដែនតំបន់នេះ ដើរតាមពាក់កណ្តាលទន្លេចាម ហើយដែលបង្គោលព្រំដែនផ្លូវការនេះត្រូវបានបោះតាមផែនទីផ្លូវការ ដែលប្រទេសទាំងពីរបានអនុម័តទទួលយក។ នេះបើតាមសេចក្តីថ្លែងការណ៍របស់គណៈកម្មាធិការចម្រុះកិច្ចការព្រំដែន។
សូមរំលឹកថាចាប់តាំងពីច្បាប់ស្តីពីសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនរដ្ឋឆ្នាំ ១៩៨៥ និងសន្ធិសញ្ញាបំពេញបន្ថែមឆ្នាំ ២០០៥ រវាងប្រទេសកម្ពុជា និងវៀតណាម ត្រូវបានអនុម័ត និងប្រកាសឲ្យប្រើប្រាស់ជាផ្លូវការដោយព្រះមហាក្សត្រ កាលពីថ្ងៃទី ៥ខែធ្នូ ឆ្នាំ ២០១៩កន្លងទៅ បញ្ហាព្រំដែនបានក្លាយជាប្រធានបទរិះគន់ វាយប្រហារទៅលើរដ្ឋាភិបាល ពីសំណាក់ក្រុមប្រឆាំង និងអ្នកឃ្លាំមើលបញ្ហាសង្គម និងនយោបាយនៅកម្ពុជា។
ភាពចម្រូងចម្រាស់ជុំវិញបញ្ហាព្រំដែននេះ ត្រូវបានអ្នកតាមដាននយោបាយកម្ពុជានានាមើលឃើញថា បានអូសបន្លាយមកទល់នឹងបច្ចុប្បន្ន និងទៅអនាគត ដោយសារអ្នកនយោបាយ បានឆ្លៀតយកបញ្ហាព្រំដែន និងទឹកដីនេះ កេងយកចំណេញនយោបាយរៀងខ្លួន។
ក៏ប៉ុន្តែសម្រាប់គណៈកម្មាធិការចម្រុះកិច្ចការព្រំដែន យល់ថាការបង្កើតចំណុចព្រំដែនលេខ៧៨ក្លែងក្លាយនៅលើប្រព័ន្ធអាំងទែរណែត Google Map គឺជាការធ្វើឡើងពីក្រុម ដែលមាននិន្នាការប្រឆាំង ដើម្បីវាយប្រហាររដ្ឋាភិបាលក៏ដូចជាគណៈកម្មាធិការព្រំដែនកម្ពុជា។
សូមបញ្ជាក់ថា មកទល់ពេលនេះ កម្ពុជា និងវៀតណាម បានដំណើរការបោះបង្គោលខណ្ឌសីមាព្រំដែនគោក ចាប់ពីឆ្នាំ២០០៦ ដល់ខែកក្កដា ឆ្នាំ២០១៩ សម្រេចបានលទ្ធផល ៨៤% នៃខ្សែព្រំដែនរួម រវាងប្រទេសទាំងពីរប្រមាណ ១២៧០ គីឡូម៉ែត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ