ច្បាប់ស្តីពីសន្ធិសញ្ញាព្រំដែនបន្ថែមរវាងកម្ពុជានិងវៀតណាម ត្រូវបានព្រះមហាក្សត្រប្រកាសដាក់ឲ្យប្រើប្រាស់ជាផ្លូវការ
ច្បាប់ស្តីពី សន្ធិសញ្ញាបំពេ ញបន្ថែមលើសន្ធិសញ្ញាកំណត់ព្រំដែនរដ្ឋឆ្នាំ ១៩៨៥ និងសន្ធិសញ្ញាបំពេញបន្ថែមឆ្នាំ ២០០៥ រវាងកម្ពុជា និងវៀតណាម ត្រូវបានព្រះមហាក្សត្រកម្ពុជា ព្រះបាទ សម្តេចព្រះបរមនាថ នរោត្តម សីហមុនី បានចេញព្រះរាជក្រមប្រកាសដាក់ឲ្យប្រើប្រាស់ជាផ្លូវការហើយ។ ព្រះរាជក្រមចុះថ្ងៃទី៥ខែធ្នូ ឆ្នាំ ២០១៩ តែទើបត្រូវបានផ្សព្វផ្សាយនៅថ្ងៃនេះ គឺត្រូវបានប្រកាសឲ្យប្រើប្រាស់ក្រោយពីរដ្ឋសភាបានអនុម័ត កាលពីថ្ងៃទី៤ខែវិច្ឆិកា ហើយព្រឹទ្ធសភា បានពិនិត្យចប់សព្វគ្រប់លើទម្រង់ និងគតិច្បាប់ទាំងស្រុង កាលពីថ្ងៃទី ១៨ខែវិច្ឆិកា។
ចុះផ្សាយនៅថ្ងៃ៖
ស្តាប់ - ០១:៥៥
មិនខុសពីការរំពឹងទុក ច្បាប់ស្តីពីសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនរដ្ឋឆ្នាំ ១៩៨៥ និងសន្ធិសញ្ញាបំពេញបន្ថែមឆ្នាំ ២០០៥ រវាងប្រទេសកម្ពុជា និងវៀតណាម ត្រូវបានអនុម័ត និងប្រកាសឲ្យប្រើប្រាស់ជាផ្លូវការដោយព្រះមហាក្សត្រ ចាប់ពីថ្ងៃទី ៥ខែធ្នូ ឆ្នាំ ២០១៩តទៅ! យ៉ាងណាមិញ សន្ធិសញ្ញានេះ មិនទទួលបានការពេញចិត្តពីអតីតគណបក្សប្រឆាំង និងអ្នកឃ្លាំមើលមួយចំនួននៅកម្ពុជានោះឡើយ។
សកម្មជនមួយចំនួននៃអតីតបក្សប្រឆាំង លើកឡើងថា សន្ធិសញ្ញាបំពេញបន្ថែមនេះ គឺគ្រាន់តែជាការសម្បទានភាពចំណេញដល់ប្រទេសវៀតណាម និងចិន តែប៉ុណ្ណោះ។ តាមក្រុមប្រឆាំង សន្ធិសញ្ញានេះ មិនគួរត្រូវបានអនុម័តឲ្យប្រើនោះទេ ដោយសារស្ថានភាពនយោបាយ ដែលមិនទាន់មានឯកភាពជាតិនៅឡើយ និងជាពិសេស គឺស្របពេលដែលសភា មានសមាជិកតែមួយគណបក្ស។
ប៉ុន្តែរដ្ឋាភិបាលកម្ពុជា ជាញឹកញយ បានការពារខ្លួនថា សន្ធិសញ្ញាព្រំដែនបន្ថែមនេះ មិនមានភាគីណាមួយបាត់បង់ទឹកដីនោះឡើយ។ មន្ត្រីជំនាញបញ្ហាព្រំដែនកម្ពុជា ក៏ធ្លាប់លើកឡើងថា សន្ធិសញ្ញានេះ មានគោលបំណង ដើម្បីរក្សាការគ្រប់គ្រងដដែលលើដីធ្លី ស្រែចម្ការរបស់ប្រជាជន ដែលបាននិងកំពុងរស់នៅ ដាំដុះ បង្កបង្កើនផលតាមព្រំដែននៃប្រទេសទាំង ២។
សូមរម្លឹកជូនថា រដ្ឋាភិបាលកម្ពុជា និងវៀតណាម បានចុះហត្ថលេខាលើសន្ធិសញ្ញា បំពេញបន្ថែមប្រទេសទាំង២ ទៅលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ នៅទីក្រុងហាណូយ ប្រទេសវៀតណាម កាលពីថ្ងៃទី១០ ខែតុលា ឆ្នាំ២០០៥។ ឈរលើមូលដ្ឋាននៃសន្ធិសញ្ញាបំពេញបន្ថែមនេះ ប្រទេសទាំងពីរ កម្ពុជា និងវៀតណាម បានដំណើរការចុះបោះបង្គោល និងខណ្ឌសីមាព្រំដែនគោក នៅលើដីជាក់ស្តែងពីខេត្តរតនគិរី ដល់ខេត្តកំពត ចាប់ពីខែមិថុនា ឆ្នាំ២០០៦ ដល់ខែកក្កដា ឆ្នាំ២០១៩ សម្រេចបានលទ្ធផល ៨៤ភាគរយ លើដីជាក់ស្តែងតាមបណ្តោយខ្សែព្រំដែនរួម រវាងប្រទេសទាំងពីរ ប្រវែងប្រមាណជាង ១២៧០ គីឡូម៉ែត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ