បរិយាកាសក្នុងការិយាល័យកាសែតឌឹខេមបូឌា ដេលី នៅថ្ងៃឱសានវាទ
នៅថ្ងៃទី៤ កញ្ញានេះ ជាថ្ងៃឱសានវាទរបស់កាសែតឌឹខេមបូឌាដេលីហើយ ប្រសិនបើកាសែតនេះមិនបានបង់ពន្ធតាមការកំណត់របស់រដ្ឋាភិបាលកម្ពុជា។ នៅថ្ងៃនេះ យ៉ា រសាត់បានចុះទៅពិនិត្យដោយផ្ទាល់ពីស្ថានភាពក្នុងការិយាល័យរបស់កាសែតនេះ។ ចង់ដឹងថា តើស្ថានភាពការិយាល័យរបស់កាសែតនេះយ៉ាងដូចម្ដេច យើងទៅស្ដាប់ការអត្ថាធិប្បាយរបស់ យ៉ា រសាត់។
ចុះផ្សាយនៅថ្ងៃ៖
ស្តាប់ - ០២:៥៧
ស្ថិតនៅជាន់ទី២ក្នុងអតីតអគាររបស់អគ្គនាយកដ្ឋានចំការកៅស៊ូកម្ពុជា ការិយាល័យដែលមានទទឹងប្រមាណ១០ ម៉ែត្រ និងបណ្ដោយប្រហែល៤០ម៉ែត្រ នេះជាការិយាល័យរបស់កាសែតឌឹខេមបូឌា ដេលី។ ការិយាល័យកាសែតនេះ ស្ថិត ក្នុងសង្កាត់ស្រះចក ខណ្ឌដូនពេញ។
មានតុ កៅអី នៅរ៉ាយប៉ាយពាសពេញការិយាល័យ ស្ដ្រីវ័យប្រហែល៤០ឆ្នាំម្នាក់ ពាក់អាវផ្កាដៃខ្លី ខោជើងវែង កំពុងឈររើក្រដាសលើតុរកមើលឯកសារល្អៗទុកម្ខាង និងឯកសារដែលខូចដាក់ចូលក្នុងស្បោងប្លាស្ទិចម្ខាង។ ស្ដ្រីម្នាក់នេះបានញញឹម ហើយឆ្លើយនឹងសំនួររបស់អ្នកកាសែតថា ថ្ងៃនេះគ្មានអ្នកមកធ្វើការទេក្នុងការិយាល័យនេះ មានតែរូបអ្នកស្រីមកបោសសំអាត និងពូៗដែលជាសន្ដិសុខ៣ ទៅ៤នាក់នៅជ្រុងម្ខាងនៃការិយាល័យនេះ កំពុងរើរបស់របរប្រើប្រាស់ផ្សេងៗយកចេញក្រៅ។
ការិយាល័យនេះគ្មានបុគ្គលិកមកអង្គុយធ្វើការទៀតទេនៅថ្ងៃទី៤ សីហា នេះ។ ក្នុងការិយាល័យមានក្រដាសឯកសារសំនេរចាស់ៗ ប៊ិចខូចៗ ថូផ្កា ម៉ាស៊ីនព្រីន កុំព្យូទ័រ កៅអី និងសំភារៈប្រើប្រាស់ក្នុងការិយាល័យផ្សេងៗទៀតស្ថិតនៅរប៉ាត់រប៉ាយពាសពេញបន្ទប់។
ទោះបីមិនមានបុគ្គលិកធ្វើការ ប៉ុន្ដែនៅមានបុគ្គលិកមកមើលសកម្មភាពរុះរើការិយាល័យកាសែតនេះផងដែរ។ មានគ្នាប្រហែល១០នាក់ដែលភាគច្រើនជាស្ដ្រីកំពុងអង្គុយជុំគ្នាក្នុងទឹកមុខស្រពោននៅផ្នែកម្ខាងការិយាល័យនោះ។ ពួកគេមិនបាននិយាយអ្វីឡើយ។
រីឯនៅច្រកចូលខាងក្រោមការិយាល័យនោះវិញ បុគ្គលិកពីររូបរបស់កាសែតនេះកំពុងជជែកគ្នាអំពីគោលដៅបន្ទាប់។ បុរសម្នាក់មានអាយុប្រហែល៣០ឆ្នាំប្លាយបានលើកឡើងថា អំឡុងពេលនេះលោកមិនទាន់សម្រេចចិត្តថាគួរធ្វើអ្វីនៅឡើយទេ។ លោកថា ថ្នាក់លើរបស់លោកប្រាប់អោយនៅស្ងៀមស្ងាត់ រង់ចាំចំនួនពីរសប្ដាហ៍ទៀត នឹងជូនដំណឹងដល់ពួកគេថាត្រូវធ្វើការបន្ដ ឬបញ្ចប់ជាមួយកាសែតនេះ។ បើតាមបុរសម្នាក់នេះ លោកនឹងស្វែងរកការងារផ្សេងទៀត បន្ទាប់ពីកាសែតនេះបិទទ្វារ។ ប៉ុន្ដែលោកបារម្ភចំពោះបរិយាកាស និងប្រាក់ខែនៅកន្លែងការងារថ្មីនោះ។
ចំណែកបុគ្គលិកមួយរូបទៀតអះអាងថា លោកនឹងរកស៊ីខ្លួនឯង ឈប់ធ្វើការឲ្យស្ថាប័នណាមួយហើយ។ លោកថា លោកមានដើមទុនសមល្មមនឹងអាចបង្កើតមុខរបរដោយខ្លួនឯងបាន។ បើតាមបុរសម្នាក់នេះ ថ្នាក់លើរបស់កាសែតឌឹខេមបូឌាដេលីកំពុងចចារជាមួយរដ្ឋាភិបាលកម្ពុជាដើម្បីអាចបន្ដដំណើររបស់កាសែតនេះទៀតបាន។
ក្រៅពីបុគ្គលិកក៏មានដែរអ្នកកាសែតជាតិ និងអន្ដរជាតិមួយចំនួនកំពុងទៅផ្ដិតរូបក្នុងការិយាល័យនោះ។
សូមបញ្ជាក់ថា កាលពីថ្ងៃទី០៣ កញ្ញា កាសែតខេមបូឌាដេលី ដែលមានអាយុកាល២៤ឆ្នាំហើយនោះ បានប្រកាសបិទការផ្សាយរបស់ខ្លួនចាប់ពីថ្ងៃទី៤ ខែកញ្ញា តទៅ។ បើតាមសេចក្ដីប្រកាសនោះ “បន្ទាប់ពីដំណើរការអស់ពេល២៤ឆ្នាំ និង១៥ថ្ងៃ រដ្ឋាភិបាលកម្ពុជាបានបំផ្លាញកាសែតខេមបូឌា ដេលី ដែលជាផ្នែកមួយពិសេសនៃសេរីភាពសារព័ត៌មានរបស់កម្ពុជា»។ កាសែតមួយនេះបញ្ជាក់ថា ការគំរាមចាត់វិធានការផ្លូវច្បាប់ដើម្បីបិទអង្គភាពរបស់ខ្លួន ការបង្កកគណនី និងការកាត់ទោសម្ចាស់ថ្មីចំពោះទង្វើរបស់ម្ចាស់ចាស់ កាសែតខេមបូឌា ដេលី នឹងបិទការបោះផ្សាយចាប់ពីថ្ងៃទី៤ ខែសីហា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ