អាជ្ញាធរ ទាមទារការសហការពីពលរដ្ឋស្វែងរកផលិតផលខូចគុណភាព ខណៈអ្នកស្រាវជ្រាវថា ហាក់យឺតពេលបន្តិច
គណៈកម្មាធិការប្រយុទ្ធប្រឆាំងផលិតក្លែងក្លាយនៃក្រសួងមហាផ្ទៃ បានចេញសេចក្តីជូនដំណឹងអំពាវនាវ ដល់សាធារណជន ឲ្យចូលរួមសហការផ្តល់ព័ត៌មាន អំពីទីតាំងឬជន ដែលផលិតផលិតផលខូចគុណភាព។ ការចូលរួមដែលពលរដ្ឋទូទៅ អាចទៅជូនដំណឹងដោយផ្ទាល់ ឬទាក់ទងតាមលេខទូរស័ព្ទ ដែលអាជ្ញាធរនេះ បានផ្តល់ឱ្យក្នុងសេចក្តីជូនដំណឹង។ យ៉ាងណាមិញ ក្រុមអ្នកស្រាវជ្រាវផ្នែកចំណីអាហារ យល់ថា ចំណាត់ការនេះល្អ ប៉ុន្តែហាក់យឺតពេលបន្តិច ខណៈសារធាតុគីមី និងចំណីអាហារខូចគុណភាព បានជ្រៀតចូល និងបង្កហានិភ័យធ្ងន់ធ្ងន់ដល់សុខភាព និងអាយុជីវិតរបស់ពលរដ្ឋកម្ពុជា រួចទៅហើយ។
ចុះផ្សាយនៅថ្ងៃ៖
ស្តាប់ - ០២:០៨
ប្រសិនបើសាធារណជន បានដឹងពីជន ឬទីតាំងផលិត និងចែកចាយផលិតផលខូចគុណភាព ដែលអាចបង្កគ្រោះថ្នាក់ ដល់សុខភាព និងសុវត្ថិភាពសង្គម គឺអាចទាក់ទងដោយផ្ទាល់ទៅកាន់លេខាធិការដ្ឋាន នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ នៅទីស្តីការក្រសួងមហាផ្ទៃ ឬតាមលេខទូរស័ព្ទ ០៨១ ៩៩៩ ៨០៨។ លើសពីនេះ ក៏អាចផ្ញើរព័ត៌មានតាមអ៊ីម៉ែល cccc.gov@gmail.com និងតាមទំព័រហ្វេសប៊ុកផ្លូវការរបស់គណៈកម្មាធិការនេះផងដែរ។ រាល់ព័ត៌មានរបស់សាធារណៈជន ដែលបញ្ជូនមកគណៈកម្មាធិការ នឹងត្រូវរក្សាការសម្ងាត់ និងតាមសំណូមពររបស់សាមីខ្លួន។ នេះគឺជាខ្លឹមសារនៃសេចក្តីជូនដំណឹងរបស់គណៈកម្មាធិការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃ ចេញផ្សាយនៅថ្ងៃទី ០២ខែមិនា ឆ្នាំ២០១៦។
គណៈកម្មាធិការនេះ បានអះអាងថា ខ្លួនបានចុះត្រួតពិនិត្យ តាមដានផលិតផលខូចគុណភាព ដែលបានចរាចរជាប្រចាំ នៅលើទីផ្សារក្នុងប្រទេសកម្ពុជាហើយ។ ប៉ុន្តែបញ្ហាត្រង់ថា មានផលិតផលខូចគុណភាព បន្លំគុណភាព ផលិតផលហួសសុពលភាព និងផលិតផលដែលគ្មានការអនុញ្ញាតពីក្រសួង ឬសា្ថប័នមានសមត្ថកិច្ចជាដើមនោះ បានយកមកដាក់លក់បន្លំ ជាមួយនឹងផលិតផលដែលមានច្បាប់អនុញ្ញាតត្រឹមត្រូវទៅវិញ។ ដូច្នេះទើបគណៈកម្មាធិការ មានការពិបាក និងទាមទារការចូលរួមបន្ថែមពីពលរដ្ឋ ដើម្បីតាមដាន ស៊ើបអង្កេត ឲ្យកាន់តែលម្អិតបន្ថែមទៀត។
លោកស្រីសៀង ហ៊ុយ អនុប្រធាននៃវិទ្យាស្ថានវិទ្យាសាស្ត្រ និងបច្ចេកវិទ្យានៃរាជបណ្ឌិតសភាកម្ពុជា ដែលធ្វើការស្រាវជ្រាវផ្នែកគីមីចំណីអាហារផងនោះ បានសាទរចំពោះចំណាត់ការទាមទារការចូលរួមពីពលរដ្ឋនេះ។ ប៉ុន្តែលោកស្រី បានបញ្ជាក់ថា ចំណាត់ការនេះ វាហាក់ដូចជារៀងយឺតពេលបន្តិចទៅហើយ។ យឺតពេលព្រោះថា កន្លងមកមានពលរដ្ឋមិនតិចទេ បានពុល ក្អួតចង្អោរ រហូតមានខ្លះស្លាប់ទៀតផង ដោយសារតែការបរិភោគផលិតផលខូចគុណភាព ឬផលិតផលដែលគ្មានការអនុញ្ញាតត្រឹមត្រូវ។ ក្នុងនាមជាអ្នកស្រាវជ្រាវ លោកស្រីសៀង ហ៊ុយ យល់ថា ចំណាត់ការរបស់សមត្ថកិច្ចនាពេលបច្ចុប្បន្ន ហាក់តឹងរ៉ឹងដោយអន្លើរ នៅខ្វះចន្លោះ ជាពិសេសចំពោះការផ្សព្វផ្សាយ អប់រំ ពីលទ្ធផលរកឃើញរបស់ខ្លួន។
ចំពោះប្រជាពលរដ្ឋវិញ ក៏រីករាយនឹងសហការជាមួយអាជ្ញាធរ ប៉ុន្តែពួកគេទាមទារឲ្យការអន្តរាគម ត្រូវប្រកបដោយតម្លាភាព កុំយកដំណឹងដែលទទួលបាន ជាថ្នូរនឹងការដោះដូរប្រាក់កាស ជាមួយជនខិលខូច ដើម្បីកែប្រែលទ្ធផលនៃផលិតផលខូចគុណភាពទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ