គ្រួសារសពលោក ឈុត វុទ្ធី នៅតែទទូចទាមទាររកយុត្តិធម៌ នៅថ្ងៃប្រារព្ធខួប៣ឆ្នាំ
ក្រុមគ្រួសារសពរបស់លោក ឈុត វុទ្ធី អតីតប្រធានអង្គការការពារធនធានធម្មជាតិ បានប្រារព្ធខួប៣ឆ្នាំ នៃការស្លាប់បាត់បង់ជីវិតរបស់លោក ឈុត វុទ្ធី នៅថ្ងៃសៅរិ៍ទី២៥ខែមេសានេះ នៅឯគេហដ្ឋាន ស្ថិតនៅភូមិព្រែកឯង ក្នុងសង្កាត់វាលស្បូវ រាជធានីភ្នំពេញ។ នៅចំថ្ងៃប្រារព្ធខួប៣ឆ្នាំនេះ ក្រុមគ្រួសារសពរបស់លោក ឈុត វុទ្ធី នៅតែទទួចសុំឱ្យរដ្ឋាភិបាលបើកការស៊ើបអង្កេតប្រកបដោយភាពត្រឹមត្រូវមួយ ដើម្បីស្វែងរកយុត្តិធម៌ជូនដល់សពលោក ឈុត វុទ្ធី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
លោក ឈុត វុទ្ធី សកម្មជនការពារបរិស្ថាន និងព្រៃឈើនៅកម្ពុជា ត្រូវបានបាញ់សម្លាប់កាលពីថ្ងៃទី២៦ខែមេសាឆ្នាំ២០១២ នៅភូមិវាលបី ឃុំបាក់ខ្លង ស្រុកមណ្ឌលសីមា ខេត្តកោះកុង ក្នុងពេលដែលលោកបានជូនផ្លូវក្រុមអ្នកកាសែត២រូបរបស់កាសែត The Cambodia Daily ចុះយកព័ត៌មាននៅជិតដែនព្រៃការពារក្នុងខេត្តកោះកុង ជាទីកន្លែងដែលលោកធ្លាប់ព្យាយាមជាច្រើនដង ដើម្បីបើកកកាយសំណុំរឿងកាប់ព្រៃឈើខុសច្បាប់ ដែលមានទាក់ទងនឹងមន្ត្រីយោធា។ ៣ឆ្នាំក្រោយនៃមរណភាពរបស់លោក ឈុត វុទ្ធី ក្រុមគ្រួសារនៃសព និងអង្គការសង្គមស៊ីវិល នៅតែទទួចស្វែងរកយុត្តិធម៌ជូនលោក ឈុត វុទ្ធី និងបានហៅរបាយការណ៍ស៊ើបអង្កេតដោយរដ្ឋាភិបាលថា គ្រាន់តែជាឆាកល្ខោនដែលគេបានរៀបចំឡើង។
លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា ដែលត្រូវបានអញ្ជើញឱ្យចូលរួមពិធីបុណ្យខួប៣ឆ្នាំរបស់សពលោកឈុត វុទ្ធី ដែលកំពុងរៀបចំធ្វើឡើងនាថ្ងៃសៅរិ៍ទី២៥មេសា នៅភូមិព្រែកឯង ក្នុងសង្កាត់វាលស្បូវ បានថ្លែងថា ក្នុងនាមអង្គការសង្គមស៊ីវិល លោកស្រី នៅតែទទួចឱ្យរដ្ឋាភិបាលបើកការស៊ើបអង្កេតរកយុត្តិធម៌ជូនលោក ឈុត វុទ្ធី ។ លោកស្រី បានសរសេរនៅលើទំព័រ Facebook របស់លោកស្រីថា «៣ឆ្នាំបានកន្លងផុត តែយុត្តិធម៌មិនទាន់ត្រូវបានទទួលសម្រាប់រូបលោក និងគ្រួសារលោក ឈុត វុទ្ធី ដែលជាសកម្មជនបរិស្ថាន»។
លោក ឆឺយ ឧត្តមរស្មី កូនប្រុសច្បងរបស់លោក ឈុត វុទ្ធី បានថ្លែងថា លោកមិនអាចទទួលយកលទ្ធផលនៃការស៊ើបអង្កេតនោះទេ ហើយយើងនៅតែទទួចឱ្យរដ្ឋាភិបាលស្វែងរកយុត្តិធម៌ជូនដល់សពឳពុករបស់ខ្លួនប្រកបដោយភាពត្រឹមត្រូវ និង យុត្តិធម៌។ ប៉ុន្តែលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តីបានបញ្ជាក់ថា សំណុំរឿងនេះ បានផុតដៃរបស់រដ្ឋាភិបាលហើយ ហើយការស៊ើបអង្កេតមួយក៏បានបញ្ចប់ហើយដែរ។ ដូច្នេះ រដ្ឋាភិបាលមិនមានគម្រោងបើកការស៊ើបអង្កេតជាថ្មីឡើយ។
សូមបញ្ជាក់ថា សពរបស់លោកឈុត វុទ្ធី ត្រូវបានគេយកទៅបញ្ចុះនៅស្រុកកំណើតរបស់លោក ស្ថិតនៅក្នុងភូមិ ស្វាយមាស ឃុំវិហាសួគ៌ ស្រុកខ្សាច់កណ្តាល ខេត្តកណ្តាល។
នៅថ្ងៃប្រាព្ធខួប៣ឆ្នាំ ឆ្នាំ២០១៥នេះ មិនមានការធ្វើពិធីនៅនឹងកន្លែងបាញ់សម្លាប់លោក ឈុត វុទ្ធី ដូចឆ្នាំមុនៗនោះទេ តែប្រជាសហគមន៍ព្រៃឡង់ដែលជាអ្នកគាំទ្រវីរៈភាពរបស់លោក ឈុត វុទ្ធី មានគម្រោង ធ្វើពិធីរំលឹកស្នាដៃរបស់លោក ឈុត វុទ្ធី នៅតំបន់ព្រៃឡង់បន្តទៀត ដែលជាទីកន្លែងធ្វើការរបស់ លោក ឈុត វុទ្ធី។
លោក ឈុត វុទ្ធី ត្រូវបានប្រជាសហគមន៍និងអង្គការសង្គមស៊ីវិលមួយចំនួនឱ្យឈ្មោះថា «ជាវីរៈជនព្រៃឈើ» ហើយកាលពីឆ្នាំទៅ លោកឈុត វុទ្ធី ក៏ត្រូវបានទទួលការកើតសរសើរពីប្រធានាធិបតីអាមេរិក លោក បារ៉ាក់ អូបាម៉ាថា ជាវីរៈជនការពារព្រៃឈើមួយរូបនៅកម្ពុជា និងបានចាត់ទុកការបាញ់សម្លាប់សកម្មជនរូបនេះនៅកណ្តាលព្រៃនៃខេត្តកោះកុងថា ជាការសម្លាប់បំបិទមាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ