សំរាមជាបញ្ហាប្រឈមដែលទីក្រុងភ្នំពេញត្រូវយកចិត្តទុកដាក់
ចុះផ្សាយនៅថ្ងៃ៖
ស្តាប់ - ០៦:១១
សំរាមមិនមែនជាបញ្ហាថ្មីអ្វីឡើយសម្រាប់កម្ពុជា និយាយជារួម និងសម្រាប់រាជធានីភ្នំពេញ និយាយដោយឡែក។ ពីមុន សំរាមជាបញ្ហាចោទដោយសារតែកង្វះប្រសិទ្ធភាពនៃការប្រមូលសំរាមរបស់ក្រុមហ៊ុនស៊ីនទ្រី។ បច្ចុប្បន្ន បន្ទាប់ពីដកសិទ្ធិប្រមូលសំរាមពីក្រុមហ៊ុនស៊ីនទ្រីរួចមក បញ្ហាចោទធ្លាក់ទៅលើរដ្ឋាករស្វយ័តគ្រប់គ្រងសំរាមនិងសំណល់រឹងនៃរាជធានីភ្នំពេញវិញម្ដង។ តើស្ថាប័នថ្មីថ្មោងនេះ មានលទ្ធភាព សមត្ថភាព និងបទពិសោធគ្រប់គ្រាន់ដែរឬទេ ដើម្បីគ្រប់គ្រងសំរាមប្រកបដោយប្រសិទ្ធភាព? តើអាជ្ញាធរបានធ្វើអ្វីខ្លះហើយនៅពេលទីលានចាក់សំរាមនៅក្នុងខណ្ឌដង្ហោកំពុងឈានទៅដល់ការពេញហៀរ? ទាំងនេះគឺជាចំណោទដែលសាលារាជធានីភ្នំពេញត្រូវដោះស្រាយជាបន្ទាន់ មុនពេលសំរាមក្លាយជាបញ្ហាចាក់ស្រែះ រកមុខស្រាយលែងរួច។
សំរាមនៅតែជាប្រធានបទនៃការជជែកគ្នាប្រចាំថ្ងៃរបស់ពលរដ្ឋអ្នករស់នៅក្នុងរាជធានី។ វាគឺជាការរអ៊ូរទាំអំពីភាពយឺតយ៉ាវនៃការប្រមូលសំរាមផង និងការបង្ហាញអារម្មណ៍អំពីភាពខ្វះអនាម័យនៅតាមដងផ្លូវ ដែលសម្បូរទៅដោយសំរាម។ សំរាមដែលពេលខ្លះ បានរាយប៉ាយនៅតាមដងផ្លូវ ដោយសារតែពលរដ្ឋមួយចំនួនមិនបានចូលរួមសម្អាត ហើយខ្វះខាតការយល់ដឹងផ្នែកបរិស្ថាន។
នៅរាជធានីភ្នំពេញ សំរាមបានកើនឡើងពីរង្វង់២៦០០តោនក្នុងមួយថ្ងៃនៅឆ្នាំ២០១៨ ដល់រង្វង់២៩០០តោន ក្នុងមួយថ្ងៃនៅក្នុងឆ្នាំ២០១៩កន្លងទៅ។ សាលារាជធានីភ្នំពេញធ្លាប់បានឲ្យដឹងថា ទីលានចាក់សំរាមដែលមានទំហំជាង៣០ហិកតានៅបឹងជើងឯក ក្នុងខណ្ឌដង្កោ នឹងត្រូវពេញហៀរ មិនអាចទទួលយកសំរាមបានទៀតឡើយនៅឆ្នាំ២០២១។ នេះគឺជាបញ្ហាប្រឈមដែលទាមទារឲ្យមានដំណោះស្រាយជាបន្ទាន់។
សំរាម មែនទែនទៅ គឺជាបញ្ហារួមរបស់យើងរាល់គ្នា ហើយវាមិនមែនជាបញ្ហាដាច់ដោយឡែករបស់អាជ្ញាធរតែឯងឡើយ។ ការរួមចំណែកដោះស្រាយបញ្ហាសំរាម វាទាមទារឲ្យមានការចូលរួមពីប្រជាពលរដ្ឋផងដែរ ព្រោះសំរាមកើតចេញពីការរស់នៅរបស់ពលរដ្ឋ។ ដូច្នេះ ការទុកដាក់សំរាមឲ្យត្រឹមត្រូវតាមប្រភេទ និងមានរបៀបរៀបរយ គឺជារឿងចាំបាច់បំផុត ដែលត្រូវផ្តើមដំបូងចេញពីប្រជាពលរដ្ឋតែម្ដង។
អ្វីដែលពលរដ្ឋអាចធ្វើបានទាក់ទងនឹងសំរាម គឺការញែកឲ្យដាច់ពីគ្នា រវាងសំរាមសើម និងសំរាមស្ងួត។ អាជ្ញាធររាជធានីធ្លាប់បានផ្សព្វផ្សាយជាហូរហែរដល់ពលរដ្ឋអំពីការញែកសំរាមនេះ។ មិនតែប៉ុណ្ណោះ ធុងសំរាមជាច្រើនដែលសំដៅប្រាប់ពលរដ្ឋឲ្យបោះចោលសំរាមដាច់ដោយឡែកពីគ្នានោះ ក៏ត្រូវបានដាក់នៅតាមទីសាធារណៈជាច្រើនដែរ។ ប៉ុន្តែការញែកសំរាមនៅតាមគេហដ្ឋានរបស់ពលរដ្ឋ មិនទាន់ត្រូវបានអនុវត្តនៅឡើយទេ។
បន្ទាប់ពីពលរដ្ឋ ដល់វេនអាជ្ញាធរម្តង។ សព្វថ្ងៃនេះ ការងារប្រមូលសំរាមត្រូវធ្លាក់ជាបន្ទុករបស់រដ្ឋាករស្វយ័តគ្រប់គ្រងសំរាមនិងសំណល់រឹងនៃរាជធានីភ្នំពេញ បន្ទាប់ពីរដ្ឋាភិបាលដកសិទ្ធិប្រមូលសំរាមពីក្រុមហ៊ុនស៊ីនទ្រីកាលពីចុងឆ្នាំ២០១៩។ សំណួរដែលត្រូវចោទសួរនោះគឺ ថាស្ថាប័នដែលទើបតែបង្កើតឡើងថ្មីថ្មោងនេះ មានលទ្ធភាព សមត្ថភាព និងបទពិសោធគ្រប់គ្រាន់ដែរឬទេ ដើម្បីគ្រប់គ្រងសំរាមប្រកបដោយប្រសិទ្ធភាព? ប្រសិនបើទេ តើអាជ្ញាធរគួរតែពង្រឹងនិងពង្រីកសក្តានុពលនៃស្ថាប័នរបស់រដ្ឋនេះ ឬបើកផ្លូវឲ្យមានការចូលរួមពីសំណាក់ក្រុមហ៊ុនឯកជនផ្សេងទៀត? និងប្រសិនបើមានការចូលរួមពីសំណាក់ក្រុមហ៊ុនឯកជន តើគេគួរអនុញ្ញាតឲ្យមានប្រតិបត្តិការផ្ដាច់មុខដូចករណីក្រុមហ៊ុនស៊ីនទ្រី ឬគួរបើកឲ្យមានក្រុមហ៊ុនច្រើនរួមគ្នាប្រមូលសំរាមក្នុងរាជធានីភ្នំពេញ?
និយាយអំពីទីលានផ្ទុកសំរាមវិញ។ សព្វថ្ងៃនេះ ទីលានចាក់សំរាមក្នុងខណ្ឌដង្កោ ដែលមានទំហំដល់ទៅជាង៣០ហិកតា កំពុងឈានទៅរកការពេញហៀរ។ បើតាមការព្យាករណ៍របស់អាជ្ញាធរក្រុងភ្នំពេញ នៅឆ្នាំ២០២១ខាងមុខ ទីលានចាក់សំរាមនេះ ទំនងជាលែងអាចទទួលសំរាមបានទៀតហើយ ខណៈដែលសំរាមក្នុងទីក្រុងភ្នំពេញ បានកើនឡើងដល់ជិត៣០០០តោន នៅក្នុងមួយថ្ងៃៗ។ ការស្វែងរកទីតាំងថ្មី ដើម្បីជំនួសទីតាំងចាស់ គឺជារឿងមួយ។ ចំណែកការចាត់ចែងចំពោះទីតាំងចាក់សំរាមចាស់ជារឿងមួយផ្សេងទៀត។ តើអាជ្ញាធរនឹងធ្វើដូចម្ដេចចំពោះសំរាមនៅទីលានចាក់សំរាមបឹងជើងឯក បន្ទាប់ពីទីលាននេះពេញនៅឆ្នាំ២០២១? តើត្រូវដុតចោល កប់ចោល ឬកែច្នៃ?
និយាយដល់ការកែច្នៃសំរាម។ នៅកម្ពុជា មិនទាន់មានការកែច្នៃសំរាមទ្រង់ទ្រាយធំ ដើម្បីផលិតជាថាមពលសម្រាប់ប្រើប្រាស់នៅឡើយទេ។ អាជ្ញាធរសាលារាជធានីភ្នំពេញធ្លាប់គូសបញ្ជាក់ថា កន្លងមក មានក្រុមហ៊ុនឯកជនយ៉ាងតិច៥០ក្រុមហ៊ុន ដែលបានទាក់ទងសាលារាជធានីភ្នំពេញ ដើម្បីសិក្សាទៅលើការវិនិយោគក្នុងការកែច្នៃសំរាម។ ប៉ុន្តែក្រុមហ៊ុនទាំងនោះបានដកខ្លួនទៅវិញនៅពេលរកឃើញថា ពួកគេទំនងជាមិនអាចរកប្រាក់ចំណេញពីការកែច្នៃសំរាមនៅទីក្រុងភ្នំពេញឡើយ។
តាមពិតទៅ ការកែច្នៃសំរាម គឺជាដំណោះស្រាយគន្លឹះដ៏សំខាន់មួយ សម្រាប់បញ្ហាសំរាម។ នៅពេលមានការកែច្នៃសំរាម គេមិនត្រឹមតែអាចកាត់បន្ថយបរិមាណសំរាមនៅលើទីលានចាក់សំរាមប៉ុណ្ណោះទេ ប៉ុន្តែវានឹងអាចផ្ដល់ចំណូល ក៏ដូចជាជួយបង្កើតការងារបន្ថែមដល់ប្រជាពលរដ្ឋខ្មែរថែមទៀត។ ប៉ុន្តែគួរឲ្យសោកស្ដាយដែលការងារនេះមិនអាចធ្វើទៅបាន ដោយសារតែសំរាមនៅភ្នំពេញ មិនទាន់ត្រូវបានបែងចែកទៅតាមប្រភេទច្បាស់លាស់នៅឡើយ។
ការដោះស្រាយបញ្ហាសំរាមនៅទីក្រុងភ្នំពេញ គឺជាដំណើរការដ៏វែងឆ្ងាយមួយ ដែលត្រូវស៊ីសង្វាក់គ្នា ហើយត្រូវតែមានការចូលរួមពីគ្រប់មជ្ឈដ្ឋាន។ ហើយមជ្ឈដ្ឋានដែលសំខាន់ជាងគេនិងមានវិសាលភាពទូលំទូលាយជាងគេ គឺប្រជាពលរដ្ឋម្នាក់ៗតែម្ដង។ ប្រជាពលរដ្ឋ ដែលចង់ឃើញទីក្រុងភ្នំពេញមានបរិស្ថានស្អាត ត្រូវចាប់ផ្ដើមចាត់ចែងសំរាមខ្លួនឯង ដោយការទុកដាក់សំរាមប្រភេទផ្សេងៗឲ្យដាច់ពីគ្នា និងមានរបៀបរៀបរយ។ ចំណែកអាជ្ញាធរ ត្រូវពង្រឹងនិងពង្រីកសមត្ថភាពប្រមូលសំរាមរបស់ខ្លួនឲ្យបានល្អ និងជាពិសេស ត្រូវចាត់ចែងដោះស្រាយបញ្ហាទីលានចាក់សំរាមឲ្យបានលឿនរហ័ស មុនពេលទីលានចាក់សំរាមសព្វថ្ងៃពេញហូរហៀរ លែងទទួលសំរាមទៀតបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ