គណបក្សប្រជាជននៅតែដើរទៅមុខជាមួយនឹងស្មារតី៧មករា ខណៈក្រុមប្រឆាំងបន្តមិនទទួលស្គាល់សច្ចៈភាពប្រវត្តិសាស្ត្រមួយនេះ
ចុះផ្សាយនៅថ្ងៃ៖
ស្តាប់ - ០៤:៣៤
៧ មករា ១៩៧៩ - ៧ មករា ២០២០ គឺ៤១ឆ្នាំគត់ ដែលប្រទេសកម្ពុជា បានរួចផុតពីរបបប្រល័យពូជសាសន៍។ រយៈពេល៤១ឆ្នាំ មកនេះ ថ្ងៃ៧មករា នៅតែត្រូវបានចាត់ទុកថាជាខួបកំណើតទី២ ដែលប្រជាជនកម្ពុជាបានរស់រានមានជីវិតម្តងទៀត។ ក៏ប៉ុន្តែព្រឹត្តិការណ៍ប្រវត្តិសាស្ត្រនេះ ត្រូវបានគេយកមកបកប្រែផ្សេងគ្នា រហូតមកដល់បច្ចុប្បន្ន អាស្រ័យដោយសង្គមខ្មែរត្រូវគេមើលឃើញថាបានប្រេះស្រាំនិងមានទស្សនៈជំទាស់គ្នាជាពីរផ្នែក ដែលមិនទាន់អាចរកឯកភាពគ្នាបាន។
ទោះជាមានការរិះគន់ថ្ងៃ៧មករា ពីសំណាក់ក្រុមអ្នកប្រឆាំងយ៉ាងណាក៏ដោយ ថ្ងៃ៧មករាឆ្នាំ២០២០ នេះ ដែលនឹងឈានចូលមកដល់នៅថ្ងៃអង្គារស្អែកនេះ ត្រូវបានគណបក្សប្រជាជនកម្ពុជា ដែលអះអាងថាជាអ្នកសង្គ្រោះជីវិតប្រជាជន និងរំដោះប្រទេសពីរបបកាប់សម្លាប់នោះ នៅតែបន្តប្រារព្ធពិធីនេះ ដោយមិនឲ្យខកខានឡើយ។
៧មករា ខួប៤១ឆ្នាំនេះ គណបក្សប្រជាជនកម្ពុជា បានត្រៀមរៀបចំប្រារព្ធមិទ្ទិញដ៏ធំមួយនៅខាងមុខសាលមហោស្រពកោះពេជ្រ ដែលនឹងមានមនុស្សចូលរួមជាង៣ម៉ឺននាក់ ក្រោមកិច្ចការពារយ៉ាងតឹងរឹង ពីសំណាក់កម្លាំងសន្តិសុខចំរុះរាប់ម៉ឺននាក់។
ព្រឹត្តិការណ៍ជាប្រវត្តិសាស្ត្រថ្ងៃ៧មករានេះ ត្រូវបានកំណត់ជាប់ជានិច្ចនៅក្នុងប្រតិទិនខ្មែរ ពីមួយឆ្នាំទៅមួយឆ្នាំ ថាជាថ្ងៃឈប់សម្រាកសាធារណៈរបស់មន្ត្រី រាជការ ដោយតម្លៃនៃថ្ងៃនេះ ត្រូវបានផ្តល់ឲ្យគ្រប់គ្រាន់នូវការអបអរសាទរ ជាទូទៅ ទាំងស្ថាប័នរដ្ឋ និងទាំងវិស័យឯកជន។
គណបក្សប្រជាជនកម្ពុជា បានឆ្លៀតយកថ្ងៃ៧មករានេះ រំលេចឲ្យឃើញនូវគុណបំណាច់របស់ខ្លួនក្នុងការដណ្តើមជីវិតប្រជាជនខ្មែរពីក្រញាំប៉ុលពត។ ផ្តើមចេញពី៧មករានេះ គណបក្សប្រជាជនកម្ពុជា បន្តរំលេចពីប្រវត្តិនៃការ កសាងប្រទេសឡើងវិញ ចាប់តាំងពីបាតដៃទទេ រហូតធ្វើឲ្យមានការអភិវឌ្ឍមកទល់នឹងបច្ចុប្បន្ននេះ។
ទោះថ្ងៃ៧ មករា គឺជានិមិត្តរូបនៃការផ្តួរំលំរបបខ្មែរក្រហមក្តី តែគណបក្សប្រជាជនកម្ពុជាទើបតែប្រកាសសន្តិភាពពិតប្រាកដកាលពីឆ្នាំ១៩៩៨ប៉ុណ្ណោះ ខណៈដើមឆ្នាំថ្មី២០២០នេះ សារនយោបាយ«អរគុណសន្តិភាព»ត្រូវបានបន្លឺឡើងព្រោងព្រាធ ដោយចាប់ផ្តើមពីលោកនាយករដ្ឋមន្ត្រី ហ៊ុន សែន។
ទោះជា ក្នុងអំឡុងពេល ៣០ឆ្នាំ ៤០ឆ្នាំ ឬច្រើនឆ្នាំទៅមុខក្តី ថ្ងៃ៧មករានេះ មើលទៅមិនបានស្ថិតនៅក្នុងបេះដូងក្រុមអ្នកប្រឆាំងរដ្ឋាភិបាល ដែលដឹកនាំដោយគណបក្សប្រជាជនទេ។ ព្រឹត្តិការណ៍ ២៣តុលា ដែលជាថ្ងៃខ្មែរគ្រប់ពណ៌សម្បុរ គ្រប់និន្នាការនយោបាយ ចុះកិច្ចព្រមព្រៀងសន្តិភាពទីក្រុងប៉ារីស បានក្លាយជាកម្មវត្ថុរបស់ក្រុមប្រឆាំងរដ្ឋាភិបាល និងជាទុនក្នុងការជជែកវែកញែក នៅពេលដែលមានការសួរពីថ្ងៃប្រវត្តិសាស្ត្រ និងគុណបំណាច់ទាក់ទងទៅនឹងការសង្គ្រោះ និងនាំមកនូវសន្តិភាពជូនប្រជាជន និងប្រទេសកម្ពុជា។
ក្រុមអ្នកប្រឆាំងនឹងថ្ងៃ៧មករា ជានិច្ចកាលតែចាត់ទុកថាថ្ងៃ៧មករា គឺជាថ្ងៃដែលកងទ័ពវៀតណាមចូលឈា្លនពាន និងកាន់កាប់ប្រទេសកម្ពុជា ហើយពួកគេនៅតែបន្តឃោសនា ស្របពេលដែលបច្ចុប្បន្ននេះ បច្ចេកវិទ្យាកាន់តែឈានទៅរកភាពរីកចំរើន។
ការយល់ឃើញខ្វែងគ្នាដូច្នេះ ធ្វើឲ្យប្រទេសកម្ពុជាមួយ នៅតែបន្តខ្វះឯកភាពជាតិ ដោយជាក់ស្តែងទោះជាទឹកដីកម្ពុជាមានតែមួយមែនពិត ក៏ប៉ុន្តែទស្សនៈបានញែកចេញពីគ្នាជាពីររួចទៅហើយ។ ការដែលបន្តឲ្យតម្លៃព្រឹត្តិការណ៍ប្រវត្តិសាស្ត្រ៧មករាផ្ទុយគ្នាបែបនេះ ត្រូវគេមើលឃើញថា ក៏ព្រោះតែដោយសារឥទ្ធិពលនយោបាយ និងការបែកបាក់រវាងខ្មែរ និងខ្មែរ រកទីបំផុតគ្មាន។ ចំណុចនេះ គឺជាការខាតបង់មួយដ៏ធំ ប្រសិនបើខ្មែរ នៅតែបន្តខ្វែងទស្សនៈគ្នា ក៏ព្រោះតែនយោបាយរៀងៗខ្លួនដូច្នេះ។
ទោះយ៉ាងណាក៏ដោយថ្ងៃ៧មករានេះ គឺជារបៀបវារៈសំខាន់ ដែលអ្នកនយោបាយខ្មែរទាំងអស់គួរតែនាំគ្នាសិក្សាស្វែងយល់ ថាតើហេតុអ្វីបានជាមានថ្ងៃ៧មករាឆ្នាំ១៩៧៩នេះឡើង។ ចំណុចនេះ ខ្មែរគ្រប់និន្នាការនយោបាយ គួរតែរំលឹកឡើងវិញ និងដាក់ជាសំនួរ ជុំវិញការកកើតឡើងនៃរបបខ្មែរក្រហម។
ក៏ប៉ុន្តែ ជម្ល៉ោះរវាងខ្មែរនិងខ្មែរគ្មានទីបញ្ចប់នេះ បានបង្ហាញជាបទពិសោធន៍រួចមកហើយ ចាប់តាំងពីទសវត្សឆ្នាំ៧០មក ដែលរុញប្រទេសកម្ពុជា ឲ្យធ្លាក់ចូលទៅក្នុងរបបវាលពិឃាត ប្រជាជនខ្មែរច្រើនលាននាក់ បានបាត់បង់ជីវិត ទទួលរងទុក្ខវេទនា ព្រាត់ប្រាស់និរាសគ្នា យ៉ាងឈឺចាប់បំផុត។
ដូច្នេះ ការដែលមិនមានឯកភាពគ្នា ទាក់ទងទៅនឹងការទទួលស្គាល់ការពិត ដែលជាសច្ចៈធម៌ប្រវត្តិសាស្ត្រ ខ្មែរគ្រប់និន្នាការគួរតែត្រូវបញ្ចប់ ហើយងាកមករកដំណោះស្រាយរួម គឺការផ្តល់សម្បទានទស្សនៈឲ្យគ្នាទៅវិញទៅមក ដើម្បីរក្សាទុកនូវឯកសារប្រវត្តិសាស្ត្រច្បាស់លាស់នានា សម្រាប់ជាបទពិសោធន៍ និងជាមេរៀនដល់កូនខ្មែរជំនាន់ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ