វីរុសកូរ៉ូណានៅកម្ពុជា៖ ពលរដ្ឋសង្ស័យ ភ័យខ្លាច មិនទុកចិត្ត
ចុះផ្សាយនៅថ្ងៃ៖
ស្តាប់ - ០៩:២២
គិតត្រឹមថ្ងៃទី១៦កុម្ភៈ វីរុសកូរ៉ូណា Covid-19 បានសម្លាប់មនុស្សអស់ជាង១ពាន់៦រយនាក់ នៅទូទាំងពិភពលោក។ ក្រៅពីអ្នកស្លាប់ ចំនួនអ្នកផ្ទុកមេរោគបានកើនឡើងរហូតដល់ជិត៧ម៉ឺននាក់ហើយ។ នៅចំពោះមុខស្ថានភាពនេះ ប្រជាពលរដ្ឋនៅកម្ពុជាមួយចំនួនហាក់ដូចជាមានក្ដីបារម្ភនិងភ័យខ្លាចខ្លាំង។ ម្យ៉ាងដោយសារតែពួកគាត់នៅសង្ស័យ ពុំទាន់ជ្រាបច្បាស់លាស់អំពីមេរោគកូរ៉ូណាថ្មី។ និងម្យ៉ាងទៀត ដោយសារតែពួកគាត់ពុំទុកចិត្តលើអាជ្ញាធរសុខាភិបាលខ្មែរ។ ពុំទុកចិត្តថាគ្រូពេទ្យខ្មែរ មានសមត្ថភាពគ្រប់គ្រាន់ក្នុងការទប់ស្កាត់និងព្យាបាលមេរោគដ៏កាចសាហាវនេះឲ្យបានជាស្រឡះ។
ព័ត៌មានស្ដីពីការផ្ទុះឡើងនៃមេរោគកូរ៉ូណាថ្មី ត្រូវគេផ្សព្វផ្សាយតាំងពីចុងខែធ្នូឆ្នាំ២០១៩មកម្ល៉េះ ប៉ុន្តែនៅកម្ពុជា ការភ្ញាក់ផ្អើលទើបតែកើតមាននៅពាក់កណ្ដាលខែមករាឆ្នាំ២០២០ប៉ុណ្ណោះ។ គេនៅចាំបានថា កាលណោះ ប្រជាពលរដ្ឋខ្មែរនាំគ្នាភិតភ័យ ដោយបានសម្ដែងក្ដីបារម្ភខ្លាចឆ្លងមេរោគកូរ៉ូណាថ្មីនេះគ្រប់ៗគ្នា។ ម្នាក់ៗនាំគ្នាទៅសម្រុកទិញម៉ាសបិទមុខនិងអាល់កុលសម្រាប់លាងដៃ រហូតធ្វើឲ្យទំនិញទាំងពីរប្រភេទនេះឡើងថ្លៃយ៉ាងខ្លាំង រហូតដល់ដាច់ស្តុករកទិញលែងបានថែមទៀត។
មែនទែនទៅ ភាពភ័យខ្លាចដូច្នេះ ពុំមែនកើតមានតែនៅប្រទេសកម្ពុជាឡើយ។ ប្រជាជននៅតាមបណ្ដាប្រទេសដទៃទៀត ក៏ភ័យព្រួយបារម្ភខ្លាចឆ្លងមេរោគកូរ៉ូណាថ្មីនេះដែរ ព្រោះសូមកុំភ្លេចថា កាលណោះ និងសូម្បីតែនៅពេលនេះក៏ដោយ គេនៅមិនទាន់រកឃើញនៅឡើយ ប្រភពច្បាស់លាស់ដែលបង្កឲ្យកើតមានមេរោគកូរ៉ូណាថ្មីនេះ។ វ៉ាក់សាំងបង្ការក៏ពុំទាន់មាន ការចម្លងក៏លឿនរហ័ស ហើយចំនួនមនុស្សស្លាប់ដោយសារតែមេរោគនេះក៏ចេះតែកើនឡើងយ៉ាងគំហុកពីមួយថ្ងៃទៅមួយថ្ងៃ។
យ៉ាងណាក៏ដោយ នៅកម្ពុជា គេសង្កេតឃើញថា ការភ័យខ្លាចរបស់ពលរដ្ឋកើតឡើងដោយសារតែពួកគាត់នៅសង្ស័យ ពុំទាន់យល់ជាក់ច្បាស់អំពីមេរោគកូរ៉ូណាថ្មី។ ដើម្បីឲ្យពលរដ្ឋយល់ច្បាស់អំពីជំងឺឆ្លង និងរបៀបការពារខ្លួនឲ្យចៀសផុតពីការឆ្លង ក្រសួងសុខាភិបាលត្រូវតែជាអ្នកនាំមុខគេ ក្នុងការជូនដំណឹង អប់រំ និងផ្សព្វផ្សាយ។ ប៉ុន្តែនៅក្នុងករណីមេរោគកូរ៉ូណានេះ ក្រសួងសុខាភិបាលខ្មែរបែរជាដើរតាមពីក្រោយបណ្ដាញសង្គមនិងប្រព័ន្ធផ្សព្វផ្សាយទៅវិញ។ គឺទាល់តែពលរដ្ឋខ្មែរចាប់ផ្ដើមភ័យព្រួយជ្រួលច្របល់សម្រុកទៅទិញម៉ាសនិងអាល់កុលលាងដៃទៅហើយ ទើបក្រសួងសុខាភិបាលខ្មែរនាំគ្នាធ្វើការសស្រាក់សស្រាំ។ ផ្ទុយមកវិញ ប្រសិនបើក្រសួងសុខាភិបាល បានជូនដំណឹង និងអប់រំផ្សព្វផ្សាយទៅដល់ប្រជាពលរដ្ឋបានឆាប់រហ័សជាងនេះ យ៉ាងហោចណាស់ ភាពភ័យព្រួយរបស់ពួកគាត់ទំនងជាអាចកាត់បន្ថយបានមួយកម្រិត។
ជាការពិតហើយថា ក្រោយៗមកនេះ មន្ដ្រីនៃក្រសួងសុខាភិបាលបានចេញមុខអប់រំផ្សព្វផ្សាយកាន់តែច្រើននិងញឹកញាប់អំពីមេរោគកូរ៉ូណាថ្មី។ ប៉ុន្តែបើទោះបីជាដូច្នេះក៏ដោយ ការជឿជាក់របស់សាធារណៈចំពោះអាជ្ញាធរសុខាភិបាលកម្ពុជា នៅតែមានកម្រិតនៅឡើយ។
ពលរដ្ឋខ្មែរ ពុំទុកចិត្តលើក្រសួងសុខាភិបាលខ្មែរ និងពុំទុកចិត្តថាគ្រូពេទ្យខ្មែរ មានសមត្ថភាពគ្រប់គ្រាន់ក្នុងការទប់ស្កាត់និងព្យាបាលមេរោគដ៏កាចសាហាវនេះឲ្យបានជាស្រឡះ បើទោះបីជាគ្រូពេទ្យខ្មែរ បានព្យាបាលអ្នកជំងឺជនជាតិចិនម្នាក់ឲ្យជាសះស្បើយពីមេរោគកូរ៉ូណាថ្មីកាលពីដើមខែកុម្ភៈថ្មីៗនេះក៏ដោយ។
ចម្ងល់ ការសង្ស័យ និងលែងទុកចិត្ត មានទំហំកើនឡើងទ្វេដង នៅពេលដែលកម្ពុជានិងម៉ាឡេស៊ី អះអាងផ្សេងគ្នាចំពោះករណីមេរោគកូរ៉ូណាថ្មីលើស្ដ្រីអ្នកដំណើរនៃនាវាទេសចរណ៍ Westerdam ជនជាតិអាមេរិកាំងម្នាក់។ ក្នុងនោះ អាជ្ញាធរម៉ាឡេស៊ីបានប្រកាសពីលទ្ធផលនៃការធ្វើតេស្តន៍ស្តង់ដារពិភពលោករបស់ខ្លួនថា ស្ដ្រីអ្នកដំណើរជនជាតិអាមេរិកាំង ដែលចាកចេញពីនាវា Westerdam រួចហោះហើរពីកម្ពុជាទៅម៉ាឡេស៊ីរូបនេះ មានផ្ទុកមេរោគកូរ៉ូណាថ្មី។ ប៉ុន្តែកម្ពុជាអះអាងម្ដងជាពីរដងថា ការធ្វើតេស្តន៍លើស្ដ្រីរូបនោះមុនពេលចាកចេញពីកម្ពុជា បង្ហាញលទ្ធផលអវិជ្ជមាន ហើយកម្ពុជាបានស្នើឲ្យម៉ាឡេស៊ីត្រួតពិនិត្យនូវលទ្ធផលនៃការធ្វើតេស្តន៍នោះឡើងវិញ ដើម្បីធានាពីសុក្រឹតភាព។
នៅចំពោះមុខភាពចម្រូងចម្រាស់នេះ ក្រសួងសុខាភិបាលបានចេញសេចក្ដីប្រកាសព័ត៌មានចំនួនពីរ។ ប៉ុន្តែសេចក្ដីប្រកាសព័ត៌មានចំនួនពីរនេះ មិនអាចបញ្ចប់ចម្ងល់ និងការសង្ស័យរបស់ពលរដ្ឋខ្មែរបានឡើយ។ ក្រសួងសុខាភិបាលកម្ពុជា គួរតែចេញមុខពន្យល់ដោយផ្ទាល់មាត់ឲ្យបានច្បាស់លាស់ចំពោះករណីនេះ។ ការចេញមុខពន្យល់របស់មន្ដ្រីជំនាញសុខាភិបាល មិនត្រឹមតែអាចស្រាយចម្ងល់របស់ប្រជាពលរដ្ឋទូទៅប៉ុណ្ណោះទេ ប៉ុន្តែវាទំនងជាអាចស្ដារទំនុកចិត្តរបស់ប្រជាពលរដ្ឋចំពោះប្រព័ន្ធសុខាភិបាលខ្មែរផងដែរ ទោះក្នុងកម្រិតតិចឬច្រើនក្ដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ