កម្ពុជា៖ សេដ្ឋកិច្ចរីកចម្រើន តែមិនទាន់អាចកាត់បន្ថយគម្លាតរវាងអ្នកមាននិងអ្នកក្របាននៅឡើយ
ចុះផ្សាយនៅថ្ងៃ៖
ស្តាប់ - ០៤:៥៥
ចូលមកដល់ឆ្នាំ២០២០ រដ្ឋាភិបាលបានបន្តអះអាងពីការរីកចម្រើននៃសេដ្ឋកិច្ចកម្ពុជា ដោយរំពឹងថានឹងអាចសម្រេចបានកំណើនក្នុងរង្វង់៧ភាគរយ។ ការអះអាងរបស់រដ្ឋាភិបាលដូច្នេះ មិនសូវខុសគ្នាពីការវាយតម្លៃរបស់ស្ថាប័នអន្ដរជាតិនានាប៉ុន្មានឡើយ។ ប៉ុន្តែ នៅលើទិដ្ឋភាពជាក់ស្តែង កំណើនសេដ្ឋកិច្ចនេះ ពុំបានផ្ដល់ភាគផលស្មើគ្នាដល់ពលរដ្ឋខ្មែរជាទូទៅឡើយ។ គម្លាតរវាងអ្នកមាននិងអ្នកក្រនៅកម្ពុជា ដែលកាន់តែរីកធំឡើងៗជាលំដាប់ គឺជាសញ្ញាគ្រោះថ្នាក់មួយសម្រាប់សង្គមដែលទាមទារឲ្យមានការយកចិត្តទុកដាក់ដោះស្រាយពីសំណាក់រដ្ឋាភិបាលនិងស្ថាប័នពាក់ព័ន្ធ។
វត្តមាននៃរថយន្តទំនើបៗតម្លៃខ្ពស់កប់ពពកដែលកំពុងតែ ចរាចរណ៍ព្រោងព្រាតនៅលើដងផ្លូវក្នុងទីក្រុងគឺជាភស្តុតាងដែល បង្ហាញថាក្រុមអ្នកមានកាន់តែមានឡើងៗហើយសេចក្តីត្រូវការរបស់ ពួកគេកាន់តែខ្ពស់ជាលំដាប់។ ក្រៅពីនោះ ការរីកដុះដាលព្រោងព្រាតនៃសំណង់អាគារខ្ពស់ៗ ផ្ទះវីឡា ក្លឹបរាត្រី ខារ៉ាអូខេ និងក្លឹបកម្សាន្តសប្បាយផ្សេងៗទៀតនៅក្នុងរាជធានីនិងទី ប្រជុំជននានាក៏ជាសក្ខីភាពនៃតម្រូវការសប្បាយចាយលុយមិន ចេះអស់របស់ពួកអ្នកមាន។
ប៉ុន្តែ នៅឯជ្រុងម្ខាងទៀត ពលរដ្ឋខ្មែរជាច្រើនដើរត្រាច់រង្គាត់គ្រប់ច្រកល្ហកដើម្បី ស្វែងរកប្រាក់ចិញ្ចឹមជីវិតដោយលំបាក។ អ្នកខ្លះត្រូវប្រថុយជីវិតឆ្លងដែនខុសច្បាប់ទៅស៊ីឈ្នួលគេ នៅក្នុងប្រទេសជិតខាង។ នេះសបញ្ជាក់ថា គម្លាតរវាងអ្នកមាននិងអ្នកក្រកំពុងផុសត្រដែតឡើងហើយកំពុង ញែកពលរដ្ឋខ្មែរទាំងពីរក្រុមឲ្យស្ថិតនៅក្នុងពិភពពីរខុសគ្នា ដាច់ស្រឡះរហូតហៅគ្នាមិនលឺ។
ជាការពិតណាស់ ក្នុងសង្គមមនុស្សតែងមានអ្នកមាននិងអ្នកក្រជារឿងធម្មតា។ គ្មានសង្គមណាមួយនៅលើលោកយើងនេះដែលមនុស្សរស់នៅស្មើ ភាពគ្នាទាំងស្រុងនោះឡើយ។ ការស្រមើស្រម៉ៃចង់កសាងសង្គមមួយស្មើភាពរបស់ពួកខ្មែរ ក្រហមដើម្បីលុបបំបាត់វណ្ណៈសង្គមនោះ ទីបំផុតបាននាំប្រទេសជាតិឲ្យធ្លាក់ក្នុងវាលពិឃាតដ៏ វិនាសកម្មមួយ។ ដូច្នេះ អ្នកមាននិងអ្នកក្រគឺជាធាតុផ្សំរបស់សង្គមមនុស្សដែលមិន អាចចៀសវាងបាន។ ម្យ៉ាងទៀត ការកើនឡើងនៃចំនួនអ្នកមានឬក៏កើនឡើងនៃទ្រព្យសម្បត្តិរបស់ពួកគេឆ្លុះបញ្ចាំងពីកំណើនសេដ្ឋកិច្ចរបស់ប្រទេស។
ប៉ុន្តែ អ្វីដែលគួរឲ្យកត់សម្គាល់សម្រាប់សង្គមខ្មែរបច្ចុប្បន្ន គឺ ក្រោយសម័យប៉ុលពតខ្មែររាល់រូបបានចាប់ផ្តើមកសាងជីវភាព គ្រួសារពីបាតដៃទទេដូចៗគ្នា។ ស្រាប់តែ៤ទសវត្សរ៍ក្រោយមក គម្លាតរវាងអ្នកមាននិងអ្នកក្របានចែកភពពីរឲ្យនៅឆ្ងាយពីគ្នាស្រឡះ។ បញ្ហានេះបណ្តាលមកពីកត្តាចៃដន្យផង កត្តាសេដ្ឋកិច្ចផង និង កត្តានយោបាយផង។ កត្តាចៃដន្យមានន័យថា មានគ្រួសារខ្មែរជាច្រើនបានក្លាយខ្លួនជាអ្នកមានដោយមិន ដឹងខ្លួនដោយសារអចលនទ្រព្យដូចជាដីធ្លីឬផ្ទះសម្បែងជា ដើម ជាពិសេសអ្នកដែលមានផ្ទះសម្បែងក្នុងទីក្រុងភ្នំពេញតែម្តង ។
ចំណែកឯកត្តាសេដ្ឋកិច្ចវិញ អ្នកដែលពូកែខាងធ្វើជំនួញក៏អាចក្លាយជាថៅកែបានយ៉ាង ស្រួលដោយសារតែក្រោយរបបខ្មែរក្រហមខ្មែរដែលចេះធ្វើជំនួញ ពិតប្រាកដមានចំនួនតិចតួចប៉ុណ្ណោះ។ ប៉ុន្តែ គេក៏មិនត្រូវភ្លេចដែរថា ក៏មានអ្នកជំនួញខ្លះបានឆ្លៀតឳកាសដែលសង្គមមានអំណោយផល ដល់អ្នកមានដើម្បីរកផលប្រយោជន៍ផ្ទាល់ខ្លួនដោយប្រើប្រាស់ វិធីមិនសុចរិតផងដែរ។ វិធីមិនសុចរិតមានប្រសិទ្ធភាពដោយសារតែអំណាចទឹកប្រាក់ជួយពួក គេឲ្យរួចផុតពីសំណាញ់ច្បាប់បាន។
កត្តានយោបាយក៏ជាអ្វីដែលគេមិនត្រូវមើលរំលងដែរពោលគឺការប្រើ ប្រាស់ឥទ្ធិពលនៃអំណាចដែលគ្មានអ្នកណាហ៊ានប៉ះពាល់គឺជាវិធី ដ៏ងាយស្រួលក្នុងការរកផលប្រយោជន៍ផ្ទាល់ខ្លួន។
កត្តាចុងក្រោយនេះបានធ្វើឲ្យមនុស្សជាច្រើនក្លាយជា អ្នកមានដោយស្រួលបំផុត។ ដោយសារតែទ្រព្យសម្បត្តិបានមកដោយស្រួលបែបនេះហើយបានជា ពួកគេចាយវាយប្រាក់ដូចក្រដាសខណៈដែលអ្នកក្រីក្រត្រូវចំណាយ កម្លាំងញើសឈាមដោយលំបាកលំបិនបំផុតទម្រាំបានប្រាក់បន្តិចបន្តួច សម្រាប់ចិញ្ចឹមជីវិត។
ដូច្នេះ ស្របពេលដែលប្រទេសកំពុងមានកំណើនសេដ្ឋកិច្ចល្អ រដ្ឋាភិបាលគួរប្រើប្រាស់កំណើនសេដ្ឋកិច្ចនេះដើម្បីដោះស្រាយ គម្លាតរវាងអ្នកមាននិងអ្នកក្រ។ បញ្ហាដែលត្រូវដោះស្រាយចំពោះមុខគឺការកែតម្រូវគោលនយោបាយអភិវឌ្ឍ សង្គមដោយធ្វើយ៉ាងណាឲ្យសង្គមមានអំណោយផលចំពោះអ្នក ក្រីក្រដើម្បីឲ្យពួកគេចាកចេញពីភាពក្រីក្រឲ្យបានឆាប់តាមដែល អាចធ្វើបាន។
បច្ចុប្បន្ន សង្គមខ្មែរមានអំណោយផលយ៉ាងខ្លាំងដល់អ្នកមាន។ អំណោយផលនៅត្រង់ថា អ្នកមានប្រាក់និងមានអំណាចអាចបង្កើនទ្រព្យធនរបស់ខ្លួនបាន យ៉ាងងាយខណៈដែលអ្នកក្រ អាចបង្កើនជីវភាពរបស់ខ្លួនដោយលំបាក។ ស្ថានភាពនេះហើយដែលជំរុញឲ្យគម្លាតរវាងអ្នកមាននិងអ្នកក្រ កាន់តែរីកធំឡើងជាលំដាប់។ ដើម្បីលុបបំបាត់គម្លាតដ៏គ្រោះថ្នាក់នេះ ការបែងចែកកំណើន សេដ្ឋកិច្ចដោយសមធម៌ដល់ពលរដ្ឋខ្មែរគ្រប់គ្នាគឺជាមធ្យោបាយដែល រដ្ឋាភិបាលត្រូវផ្តោតការយកចិត្តទុកដាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ