បញ្ហាព្រំដែនខ្មែរនៅតែបន្តជាចំណាប់ខ្មាំងរបស់អ្នកនយោបាយ
ចុះផ្សាយនៅថ្ងៃ៖
ស្តាប់ - ០៤:៣៧
ការចោទប្រកាន់និងប្រឈមមុខដាក់គ្នារវាងអ្នកនយោបាយខ្មែរនៅក្នុងបញ្ហាព្រំដែន ជាពិសេសរឿងព្រំដែនជាមួយវៀតណាម គឺជាបញ្ហាដែលចោទឡើងមិនចេះចប់នៅក្នុងប្រវត្តិសាស្ត្រខ្មែរ។ ការជជីករកការពិតក្នុងរឿងព្រំដែន ដើម្បីផលប្រយោជន៍ជាតិ គឺជារឿងមួយ។ ប៉ុន្តែពេលខ្លះ គេសង្កេតឃើញថា បញ្ហាព្រំដែននេះ បែរជាត្រូវបានអ្នកនយោបាយ យកទៅធ្វើជាចំណាប់ខ្មាំង ដើម្បីកេងចំណេញផ្នែកនយោបាយទៅវិញ។
បញ្ហាព្រំដែននៅតែជាចំណុចក្តៅសម្រាប់អ្នកនយោបាយខ្មែរ ទោះបីជាបញ្ហានេះតែងដុតរោលឆាកនយោបាយប្រទេសកម្ពុជាឲ្យឆេះសន្ធោសន្ធៅកាលពីអតីតកាល ដែលជួនកាលបានធ្វើឲ្យប្រទេសជាតិធ្លាក់ក្នុងសង្គ្រាមវិនាសអន្តរាយ យ៉ាងណាក៏ដោយ។ ដោយគិតត្រឹមតែរយៈពេលកន្លះសតវត្សរ៍ចុងក្រោយ ការផ្លាស់ប្តូរពីរបបមួយទៅមួយរហូតធ្វើឲ្យប្រទេសជាតិធ្លាក់ចូលក្នុងវាលពិឃាតនៃរបបខ្មែរក្រហម ពិតជាមិនអាចកាត់ផ្តាច់បានឡើយពីបញ្ហាព្រំដែន និងទំនាក់ទំនងជាមួយប្រទេសជិតខាង ជាពិសេសជាមួយវៀតណាម។ ប្រសិនបើក្រឡេកមើលឲ្យឆ្ងាយជាងនេះទៀត គេនឹងសម្គាល់ឃើញថា ក្នុងប្រវត្តិសាស្ត្រប្រទេសកម្ពុជា បញ្ហាព្រំដែន វាស្ទើរតែជាលក្ខណៈសម្គាល់របស់ប្រទេសនេះទៅហើយ។
ការច្បាំងដណ្តើមដីគ្នាជាមួយប្រទេសជិតខាងជារឿងមួយ រីឯការច្បាំងគ្នារវាងផ្ទៃក្នុងខ្មែរគ្នាឯងអំពីបញ្ហាព្រំដែនជារឿងមួយទៀត។ អ្វីដែលគួរឲ្យកត់សម្គាល់ម្យ៉ាងទៀតនោះគឺ ខណៈដែលជម្លោះផ្ទៃក្នុងរវាងអ្នកនយោបាយខ្មែរអំពីបញ្ហាព្រំដែនកើតឡើងឥតឈប់ឈរក្រោមបុព្វហេតុនៃចលនាស្នេហាជាតិដើម្បីការពារបូរណភាពទឹកដី ដែនដីខ្មែរបែរជារួមតូចទៅៗជាលំដាប់។ ពោលគឺរួមពីមហានគរមួយ ទៅជាកូនប្រទេសតូចមួយ ស្ទើរតែបាត់ឈ្មោះចេញពីផែនទីពិភពលោកទៅហើយ។
ជាការពិត បញ្ហាទឹកដីជារឿងរសើបសម្រាប់គ្រប់ជាតិសាសន៍នៅក្នុងលោក។ ជាតិសាសន៍ណាក៏ដោយក៏ប្តូរផ្តាច់ការពារទឹកដីរបស់ខ្លួនដែរ។ ម្យ៉ាងទៀត ក្នុងបរិបទប្រវត្តិសាស្ត្រកម្ពុជា បញ្ហាទឹកដីដូចបានលើកឡើង ខាងដើម គឺជាជំងឺប្រចាំកាយមួយរបស់ប្រទេសនិងប្រជាជាតិខ្មែរទៅហើយ តាំងពីអតីតកាលរហូតដល់បច្ចុប្បន្នកាល។ ដូច្នេះ ភាពរសើបអំពីបញ្ហាទឹកដីរឹតតែមានកម្រិតខ្លាំងថែមទៀត។ បញ្ហារសើបនេះហើយដែលអ្នកនយោបាយចូលចិត្តប្រើដើម្បីផលចំណេញខាងនយោបាយ។ ចំណុចនេះអាចពន្យល់បានអំពីអ្វីដែលកំពុងតែកើតមាននៅកម្ពុជាបច្ចុប្បន្ន។ ប៉ុន្តែ អ្វីដែលគួរពិចារណានោះគឺ តើអ្នកនយោបាយខ្មែរគួរបន្តប្រឈមមុខដាក់គ្នារឿងព្រំដែនតទៅទៀត ឬក៏គួរតែមូលមតិគ្នាដើម្បីរកដំណោះស្រាយជាមួយប្រទេសជិតខាងដោយតម្លាភាពដើម្បីការពារបូរណភាពទឹកដីដែលនៅសេសសល់បច្ចុប្បន្ន?
ពិតណាស់ថា រាល់សកម្មភាពទាំងឡាយដែលមានគោលដៅការពារបូរណភាពទឹកដីឬផលប្រយោជន៍ ប្រទេស និងប្រជាជាតិគឺជាសកម្មភាពគួរឲ្យគោរព និងគួរលើកទឹកចិត្ត។ នៅក្នុងការជាក់ស្តែងដែលយើងបានឃើញនៅពេលនេះ រដ្ឋាភិបាលតែងតែអះអាងអំពីកិច្ចការពារបូរណភាពទឹកដីមិនឲ្យបាត់បង់ សូម្បីតែមួយចំអាម។ កិច្ចខិតខំប្រឹងប្រែងដើម្បីបង្កើតឲ្យមានបន្ទាត់ព្រំដែនមួយ ជាក់លាក់នៅលើដីជាក់ស្តែងជាមួយប្រទេសជិតខាងទាំងអស់គឺជាកិច្ច ការដែលរដ្ឋាភិបាលកំពុងធ្វើ។ ចំណែកឯអតីតគណបក្សប្រឆាំងវិញ ថ្វីត្បិតតែមិនបានចូលរួមដោយផ្ទាល់ក្នុងការងារនេះ ក៏ខ្វាយខ្វល់ជាខ្លាំងអំពីកិច្ចការពារបូរណភាពទឹកដី។
បើស្តាប់ទៅ ទាំងអស់គ្នាសុទ្ធតែស្រឡាញ់ទឹកដី និងមានគោលដៅរួមគឺចង់ឲ្យទឹកដីខ្មែរគង់វង្ស និងចង់មានខ្សែបន្ទាត់ព្រំដែនសន្តិភាព និងកិច្ចសហប្រតិបត្តិការ។ ដូច្នេះ អ្វីដែលនៅសេសសល់គឺបញ្ហានយោបាយតែប៉ុណ្ណោះ។ អ្នកនយោបាយគួរទុកផលប្រយោជន៍សួនតួមួយឡែក ហើយដោះស្រាយបញ្ហាព្រំដែនដោយតម្កល់ផលប្រយោជន៍ជាតិជាធំ។ គឺមានតែវិធីនេះទេ ដែលជាគន្លឹះដ៏សំខាន់នៅក្នុងការដោះស្រាយបញ្ហាព្រំដែនជាមួយប្រទេសជិតខាងបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ