អង្គការលីកាដូនឹងចេញផ្សាយជីវប្រវត្តិមន្ត្រីការពារសិទ្ធិមនុស្ស ដែលជាប់ពន្ធនាគារ
នៅថ្ងៃទី២៤ ឧសភា នេះអង្គការលីកាដូបានឲ្យដឹងថាខ្លួនគ្រោងនឹងចេញផ្សាយជីវប្រវត្តិរបស់មន្ត្រីអង្គការការពារសិទ្ធិមនុស្សចំនួន៤នាក់ និងមន្ត្រី គ.ជ.ប ម្នាក់ ដែលត្រូវបានតុលាការចោទប្រកាន់ និងឃុំខ្លួននៅពន្ធនាគារពាក់ព័ន្ធនឹងការចោទប្រកាន់របស់កញ្ញាស្រីមុំ។ ការចេញផ្សាយនេះ គឺក្នុងគោលបំណងបង្ហាញពីស្នាដៃការពារសិទ្ធិមនុស្សរបស់ពួកគាត់។
ចុះផ្សាយនៅថ្ងៃ៖
ស្តាប់ - ០២:២៩
ខណៈពេលដែលមន្ត្រីការពារសិទ្ធិមនុស្សរបស់អាដហុក កំពុងតែជាប់ពន្ធនាគារ ដោយសារការចោទប្រកាន់របស់កញ្ញា ខុម ច័ន្ធដារាទី ហៅស្រីមុំ អង្គការសម្ព័ន្ធខ្មែរជំរឿន និងការពារសិទ្ធិមនុស្សលីកាដូក៏ គ្រោងនឹងចេញផ្សាយជីវប្រវត្តិរបស់មន្ត្រីការពារសិទ្ធិមនុស្សទាំង៥នាក់នោះផងដែរ។ តាមគម្រោង ការចេញផ្សាយនេះ នឹងធ្វើឡើងនៅរសៀលថ្ងៃទី២៤ ខែឧសភានេះ។ នេះបើតាមលោកអំ សំអាត ប្រធានបច្ចេកទេសឃ្លាំមើលការរំលោភសិទ្ធិមនុស្សនៃអង្គការលីកាដូ។
លោកអំ សំអាត បានបន្តថាការចេញផ្សាយនេះ គឺធ្វើឡើងក្នុងគោលបំណងបង្ហាញពីការងាររបស់ពួកគាត់ទាំង៥រូប ក្នុងវិស័យការពារសិទ្ធិមនុស្សនៅក្នុងប្រទេសកម្ពុជា នារយៈប៉ុន្មានឆ្នាំមកនេះ។ លោកបន្ថែមថា មន្ត្រីការពារសិទ្ធិមនុស្សខ្លះ បានបំរើការពារសិទ្ធិមនុស្សប្រមាណជាង២០ឆ្នាំ ហើយការងាររបស់ពួកគាត់គឺការពារប្រជាពលរដ្ឋទាក់ទងនឹងការរំលោភដីធ្លីជាដើម។ លោកបានបញ្ជាក់យ៉ាងដូច្នេះថា ពួកគាត់មិនដែលធ្វើអ្វីខុសច្បាប់ទេ តែទីបំផុតគាត់ត្រូវបានចាប់ខ្លួន។
ក្រៅពីនេះការផ្សព្វផ្សាយពីជីវប្រវត្តិរបស់ពួកគាត់ គឺក្នុងគោលបំណងបង្ហាញពីស្ថានភាពគ្រួសាររបស់ពួកគាត់ក្រោយពេល ដែលអាជ្ញាធរចាប់ និងឃុំខ្លួន គឺបានត្រឹមតែមួយរស់តែប៉ុណ្ណោះ ហើយការឃុំខ្លួននេះនឹងធ្វើឲ្យប៉ះពាល់ដល់ការសិក្សារបស់កូនៗមន្ត្រីទាំងនោះ។ នេះបើតាមលោក អំ សំអាត។
ជីវប្រវត្តិមន្ត្រីការពារសិទ្ធិមនុស្សទាំង៥រូប រួមមានលោក នី ចរិយា អគ្គលេខាធិការរង គ.ជ.ប ជាអតីតមន្ត្រីសមាគមអាដហុក និងមន្ដ្រី៤រូបរបស់សមាគមអាដហុក គឺ លោក នី សុខា ប្រធានផ្នែកឃ្លាំមើលសិទ្ធិមនុស្សនៅសមាគមអាដហុក និងអនុប្រធានពីររូបរបស់លោកគឺ លោក យី សុខសាន្ត និងលោក ណៃ វ៉ង់ដា។ ចំណែកលោកស្រី លឹម មុនី្ន ជាអ្នកស៊ើបអង្កេតជាន់ខ្ពស់នៅអាដហុក។
អ្នកទាំង៥រូបត្រូវបានអង្គភាពប្រឆាំងអំពើពុករលួយឃាត់ខ្លួន និងសាកសួរនៅចុងខែមេសា ពាក់ព័ន្ធនឹងការចោទប្រកាន់របស់ ស្រីមុំ។ ក្រោយបញ្ចប់ការសាកសួរនៅអង្គភាពប្រឆាំងអំពើពុករលួយអ្នកទាំង៥រូប ត្រូវបានអង្គភាពប្រឆាំងអំពើពុករលួយបញ្ជូនមកកាន់សាលាដំបូងរាជធានីភ្នំពេញនៅថ្ងៃទី៣០ មេសា ឆ្នាំ២០១៦។ នៅរសៀលថ្ងៃទី២ ខែឧសភា សាលាដំបូងរាជធានីភ្នំពេញ បានសម្រេចឃុំខ្លួនបណ្តោះអាសន្ន លើមន្ត្រីសមាគមការពារសិទ្ធិមនុស្សអាដហុក និងមន្ត្រីគ.ជ.បម្នាក់ ក្រោយពីព្រះរាជអាជ្ញាបានសម្រេចចោទប្រកាន់លើមន្ត្រីទាំង៥រូបនេះ។
សូមបញ្ជាក់ថាមន្ត្រីទាំង៤រូបរបស់សមាគមអាដហុក ត្រូវបានតុលាការចោទប្រកាន់ពីបទសូកប៉ាន់សាក្សី។ ចំណែកលោក នី ចរិយា ត្រូវបានចោទប្រកាន់ បទសមគំនិតក្នុងអំពើសូកប៉ាន់សាក្សី តាមមាត្រា២៩ និង៥៤៨ នៃក្រមព្រហ្មទណ្ឌ ដែលអាចជាប់ទោសពី៥ ទៅ១០ឆ្នាំ។ បច្ចុប្បនេះ អ្នកទាំង៥ត្រូវបានជាប់ឃុំតាមការចោទប្រកាន់របស់តុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ