សង្គមស៊ីវិលជាង ១០០ គាំទ្ររដ្ឋាភិបាលក្នុងការបង្ក្រាបបទល្មើសព្រៃឈើ
នៅថ្ងៃទី៩មេសានេះ ក្រុមសម្ព័ន្ធភាពអង្គការសង្គមស៊ីវិល បានប្រកាសស្វាគមន៍ និងគាំទ្រចំពោះចំណាត់ការដ៏ម៉ឹងម៉ាត់នាពេលថ្មីៗនេះរបស់ រដ្ឋាភិបាលកម្ពុជា អំពី ការលុបបំបាត់បទល្មើសព្រៃឈើនៅកម្ពុជា។ ការបង្ក្រាបបទល្មើសព្រៃឈើ ដែលរដ្ឋាភិបាល បានប្រើវិធានការក្តៅ ចាប់បង្ក្រាបឈើប្រណិតខុសច្បាប់ និងបានចាប់ខ្លួនឈ្មួញរកស៊ីឈើ ព្រមទាំងមេព្រៃមួយចំនួន។
ចុះផ្សាយនៅថ្ងៃ៖ កែប្រែថ្ងៃទី៖
ក្រុមសម្ព័ន្ធភាពអង្គការសង្គមស៊ីវិលប្រមាណ ១១៨ អង្គការសមាគម បានសម្តែងការគាំទ្រចំពោះចំណាត់ការដ៏ជាក់លាក់ និងការចាត់វិធានការតាមផ្លូវច្បាប់របស់រាជរដ្ឋាភិបាល ដើម្បីផ្តន្ទាទោស ចំពោះជនណា ដែលបានប្រព្រឹត្តបទល្មើសព្រៃឈើ នៅពេលបច្ចុប្បន្ននេះ។ ការគាំទ្ររបស់សង្គមស៊ីវិលនេះ បានធ្វើឡើងតាមរយៈសេចក្តីថ្លែងការណ៍រួម និងការប្រកាសផ្ទាល់មាត់នៅក្នុងសន្និសីទកាសែត នៅព្រឹកថ្ងៃទី៩មេសា។
ក្រុមអង្គការសង្គមស៊ីវិល បានចាត់ទុកថា ចំណាត់ការរបស់រដ្ឋាភិបាល លើការបង្ក្រាបបទល្មើសព្រៃឈើពេលនេះ ក្រៅតែពីដើម្បីការពារព្រៃឈើនៅកម្ពុជា, ក៏អាចចូលរួមចំណែកក្នុងការកាត់បន្ថយអំពើពុករលួយផង ដែរ។ សង្គមស៊ីវិល ក៏បានកត់សម្គាល់ថា អ្នកប្រព្រឹត្តបទល្មើសព្រៃឈើ គឺសុទ្ធសឹងតែជាអ្នកមាន និងជាអ្នកមានអំណាចធំៗ ក្នុងជួររាជរដ្ឋាភិបាល។
ចំពោះបញ្ហានេះ មន្ត្រីជាន់ខ្ពស់រដ្ឋាភិបាល លោក ទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័សរបស់ទីស្តីការគណៈរដ្ឋមន្ត្រី បានបញ្ជាក់ថា រដ្ឋាភិបាល បានប្រើប្រាស់នូវវិធានការក្តៅ ដើម្បីទប់ស្កាត់ និងបង្ក្រាបបទល្មើសព្រៃឈើ។ កិច្ចការនេះ ត្រូវការចូលរួមទាំងអស់គ្នា ទាំងអង្គការសង្គមស៊ីវិល ទាំងប្រជាពលរដ្ឋ សហគមន៍ការពារព្រៃឈើ និងទាំងសមត្ថកិច្ចអាជ្ញាធររដ្ឋាភិបាល ដើម្បីឲ្យមានប្រសិទ្ធិភាព។
លោក ទិត សុធា បានបន្ថែមថា រដ្ឋាភិបាល ជាពិសេសលោកនាយករដ្ឋមន្ត្រី ហ៊ុន សែន កំពុងតែបន្តជម្រុញធ្វើកំណែទម្រង់ស៊ីជម្រៅផ្នែកព្រៃឈើ ដើម្បីការពារបរិស្ថាន។ នេះក៏ជាការបង្ហាញឲ្យឃើញយ៉ាងច្បាស់នូវឆន្ទៈនយោបាយរបស់ រដ្ឋាភិបាល ក្នុងការកាត់បន្ថយ និងលុបបំបាត់អំពើពុករលួយ។
នៅ ក្នុងយុទ្ធនាការបង្ក្រាបបទល្មើសព្រៃឈើ ដ៏គគ្រឹកគគ្រេងទូទាំងប្រទេស នាពេលនេះ មិនមានព័ត៌មានលម្អិតពីចំនួនឈើប្រណិតប៉ុន្មាន ដែលត្រូវបានរឹបអូស និងមានជនល្មើសប៉ុន្មាននាក់ ដែលត្រូវជាប់ចោទ ក្នុងយុទ្ធនាការបង្ក្រាបបទល្មើសព្រៃឈើ នាពេលនេះទេ។
ក៏ប៉ុន្តែមន្ត្រីជាន់ខ្ពស់រដ្ឋាភិបាល លោក ទិត សុធា បានបញ្ជាក់ថា រដ្ឋាភិបាល នៅតែបន្តសកម្មភាពបង្ក្រាបបទល្មើសព្រៃឈើ និងបន្តតាមរកចាប់ខ្លួន ចំពោះអ្នកបានរត់គេច ដែលពាក់ព័ន្ធបទល្មើសព្រៃឈើ។ រដ្ឋាភិបាល ក៏បានដឹងច្បាស់អំពីភាពហិនហោចនៃការកាប់បំផ្លាញព្រៃឈើកន្លងមក។ ក្នុងយុទ្ធនាការកន្លងមក មន្ត្រីរដ្ឋាភិបាលព្រៃឈើ និងឈ្មួញរកស៊ីឈើខុសច្បាប់ជាច្រើននាក់ ត្រូវបានចាប់ខ្លួន នាំឡើងតុលាការជាបន្តបន្ទាប់ ដើម្បីចាត់ការតាមនីតិវិធីច្បាប់។
បទ ល្មើសព្រៃឈើថ្នាក់ទី១ ត្រូវជាប់ពន្ធនាគារពីប្រាំឆ្នាំ ទៅដល់ ១០ ឆ្នាំ និងរឹបអូសវត្ថុតាងទាំងអស់នោះ មកជាសម្បត្តិរដ្ឋ។ ចាប់តាំងពីពាក់កណ្តាលខែមីនា មកទល់ពេលនេះ អាជ្ញាធរសមត្ថកិច្ចចម្រុះ បានបើកយុទ្ធនាការបង្ក្រាបបទល្មើសព្រៃឈើយ៉ាងក្តៅគគុក នៅទូទាំងប្រទេស តាមបទបញ្ជារបស់លោកនាយករដ្ឋមន្ត្រី ហ៊ុន សែន។ លោកនាយករដ្ឋមន្ត្រី ក៏បានប្រកាសប្តូរតំណែងមេព្រៃ ដែលជាអ្នកបង្ក្រាបបទល្មើសព្រៃឈើដ៏ធំ របស់ក្រសួងកសិកម្ម កាលពីថ្ងៃទី៦ ខែមេសាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ