បក្សប្រឆាំងនឹងចូលប្រជុំសភាពេញអង្គនៅសប្តាហ៍ក្រោយ
គណបក្សសង្គ្រោះជាតិ នឹងបើកកិច្ចប្រជុំគណៈអចិន្ត្រៃយ៍របស់ខ្លួន ដើម្បីសម្រេចពីការវិលចូលសភាវិញបន្ទាប់ពីពហិកាអស់រយៈពេលកន្លះឆ្នាំ។ យ៉ាងណាក៏ដោយ ប្រធានក្រុមតំណាងរាស្ត្រគណបក្សសង្គ្រោះជាតិ បានបញ្ជាក់ថាបក្សប្រឆាំងនឹងចូលប្រជុំសភា ព្រោះថាបក្សត្រូវពិភាក្សាពីបញ្ហាផលប្រយោជន៍ជាតិដូចជាច្បាប់ថវិកាជាតិ និងការកោះហៅមន្ត្រីជាដើម។
ចុះផ្សាយនៅថ្ងៃ៖
ស្តាប់ - ០២:២៣
មានមូលហេតុយ៉ាងហោចចំនួន ៣ ដែលគណបក្សសង្គ្រោះជាតិព្រមចូលប្រជុំសភាវិញនៅថ្ងៃទី ២២ វិច្ឆិកា បន្ទាប់ពីពហិកាអស់រយៈពេលកន្លះឆ្នាំ។ លោក សុន ឆ័យ ប្រធានក្រុមតំណាងរាស្ត្រសមាជិកសភាតិចបានបញ្ជាក់ពីមូលហេតុទាំងនោះថា ការពិភាក្សាច្បាប់ថវិកាជាតិឆ្នាំ២០១៧ ការស្នើផ្លាស់ប្តូរសមាសភាពតំណាងរាស្ត្រមណ្ឌលកំពង់ស្ពឺ ជំនួសលោកប៉ែន សុវណ្ណដែលទទួលមរណៈ និងការកោះហៅរដ្ឋមន្ត្រីរបស់រដ្ឋាភិបាលចំនួន ៦ក្រសួងមកសាកសួរ។ បើតាមលោក សុន ឆ័យ ដដែល សមាជិកសភាទាំង ៥៥រូប មិនបានព្រួយបារម្ភពីការកាត់ប្រាក់បៀវត្ស ដែលជាវិធានផ្ទៃក្នុងរបស់សភានោះទេ។
ទន្ទឹមនឹងនេះ អ្នកវិភាគ និងគណបក្សកាន់អំណាចថា មូលហេតុនោះ គឺគ្រាន់តែជាលេះ និងជាការដល់ចំណុចទាល់ច្រករបស់គណបក្សប្រឆាំង ដែលវណ្ឌករដោយបណ្តឹងតុលាការតែប៉ុណ្ណោះ។ គណបក្សប្រជាជនកម្ពុជាបានបញ្ជាក់ជាញ៉យដងថា ទ្វារបស់សភាមិនដែលបិទ ឬហាមមិនឱ្យបក្សប្រឆាំងចេញចូលនោះទេ ប៉ុន្តែបក្សប្រឆាំងខ្លួនឯង ដែលដើរចេញពីសភាហើយថាស្ថានការណ៍នយោបាយកំពុងជួបភាពតានតឹង។ លោក សុខ ឥសាន អ្នកនាំពាក្យគណបក្សកាន់អំណាចថា របៀបវារៈរបស់បក្សប្រឆាំងគ្រាន់តែជាលះ ដើម្បីចូលប្រជុំសភាវិញ។
លោកបណ្ឌិត ច័ន្ទ វិបុល អ្នកតាមដានសង្គម និងជាអ្នកវិភាគនយោបាយនៅកម្ពុជា បានវាយតម្លៃថាការចូលប្រជុំសភាវិញនេះ គឺជាការទាល់ច្រកនៅពេល ដែលការទាមទារទាំងឡាយរបស់បក្សប្រឆាំងមិនមានទទួលបានផល ហើយក៏មិនបានការសម្រួលសម្រួលណាមួយពីគណបក្សប្រជាជនកម្ពុជានោះទេ ប៉ុន្តែថែមទាំងមានបណ្តឹងវណ្ឌករថែមទៀតផង។
ប៉ុន្តែលោក សុន ឆ័យ បានឆ្លើយថាការចូលសភារបស់គណបក្សសង្គ្រោះជាតិ គឺជាកាតព្វកិច្ច។ សូមបញ្ជាក់ថា គណបក្សសង្គ្រោះជាតិបានផ្តើមពហិកាតាំងពីខែឧសភាមក បន្ទាប់ពីមានការប៉ុនប៉ងចាប់ខ្លួនលោកកឹម សុខា។ ហើយបក្សទាំងពីរបានមើលមុខគ្នាលែងចំ និងឈានដល់ការប្រឈមមុខគ្នាខ្លាំងបំផុតដោយ ម្ខាងប្រកាសធ្វើបាតុកម្ម និងម្ខាងទៀតប្រកាសបង្ក្រាបបាតុកម្ម។
បើទោះបីជាបក្សប្រឆាំងអះអាងពីមូលដ្ឋាន ដើម្បីចូលរួមប្រជុំសភាពេញអង្គវិញក៏ដោយ ប៉ុន្តែសមាជិកសភាទាំង ៥៥រូបនឹងប្រជុំសម្រេចនៅថ្ងៃស្អែកទី ១៨ វិច្ឆិកា។ ហើយគណបក្សសង្គ្រោះជាតិក៏បានបញ្ជាក់ថាតើ លោក កឹម សុខា ប្រធានស្តីទីគណបក្ស និងជាអនុប្រធានសភានឹងចូលប្រជុំសភាពេញអង្គនៅថ្ងៃទី ២២វិច្ឆិកាវិញដែរឬយ៉ាងណាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ