ការបោះឆ្នោតឆ្នាំ២០១៨ នឹងក្លាយជាការប្រជែងគ្នាដ៏ស្រួចស្រាល់រវាងគណបក្សធំៗពីរនៅកម្ពុជា
ក្លឹបអ្នកកាសែតកម្ពុជា នៅព្រឹកមិញនេះ បានបើកកិច្ចពិភាក្សាដ៏កម្រមួយ ស្តីពី “អនាគតនយោបាយកម្ពុជាឆ្ពោះទៅរកការបោះឆ្នោត”។ នៅក្នុងកិច្ចពិភាក្សាដែលធ្វើឡើងនៅក្នុងសណ្ឋាគាមួយក្នុងក្រុងភ្នំពេញ ក្រុមអ្នកកាសែតជើងចាស់នៅកម្ពុជា បានវាយតម្លៃថា ការបោះឆ្នោតនៅឆ្នាំ២០១៨ខាងមុខ នឹងក្លាយជាការប្រជែងគ្នាដ៏ស្រួចស្រាល់រវាងគណបក្សនយោបាយធំពីរនៅកម្ពុជា គឺគណបក្សប្រជាជនកម្ពុជា នឹងគណបក្សសង្រ្គោះជាតិ។
ចុះផ្សាយនៅថ្ងៃ៖
ស្តាប់ - ០២:៤០
អ្វីដែលស្ថិតនៅក្នុងក្រសែភ្នែករបស់អ្នកកាសែតជើងចាស់នៅកម្ពុជានាពេលនេះ គឺកម្តៅនយោបាយនៅកម្ពុជាបានកើនឡើងជាបន្តបន្ទាប់។ មានការកត់សម្គាល់ថា ក្នុងរយៈពេលចុងក្រោយនេះ មានការចាប់ខ្លួន ការចោទប្រកាន់ និងការធ្វើទុក្ខបុកម្នេញទៅលើអ្នកនយោបាយគណបក្សប្រឆាំងជាបន្តបន្ទាប់។ ជាការពិត កម្តៅនយោបាយនេះ នឹងជះឥទ្ធិពលទៅដល់ការបំពេញការងារប្រកបដោយវិជ្ជាជីវៈរបស់អ្នកកាសែត។ នេះបើតាមការកត់សម្គាល់របស់លោក ប៉ែន បូណា ប្រធានក្លឹបអ្នកកាសែតកម្ពុជា។ លោក ប៉ែន បូណា បានបញ្ជាក់ថា ថ្វីត្បិតតែពេលនេះ យើងមិនអាចទស្សន៍ទាយពីអនាគតនយោបាយកម្ពុជានឹងទៅជាយ៉ាងណាក៏ដោយ តែសម្រាប់អ្នកកាសែត ថាតើ ត្រូវធ្វើសេចក្តីរាយការណ៍បែបណា ក្នុងកាលៈទេសៈបែបនោះ។
ចំណែកលោក ពុយ គា អគ្គលេខាក្លឹបអ្នកកាសែតកម្ពុជា បានកត់សម្គាល់ថា ការបោះឆ្នោតនៅកម្ពុជានាឆ្នាំ២០១៨ខាងមុខនេះ នឹងក្លាយជាការប្រកួតប្រជែងគ្នាដ៏ស្រួចស្រាល់រវាងគណបក្សនយោបាយធំៗពីរ គឺគណបក្សប្រជាជនកម្ពុជា និងគណបក្សសង្រ្គោះជាតិ។ នោះបើផ្អែកទៅលើលទ្ធផលនៃការបោះឆ្នោតកាលពីខែកក្កដាឆ្នាំ២០១៣ ដែលគេដឹងជាទូទៅថា គណបក្សប្រជាជនកម្ពុជាបានបាត់បង់អាសនៈដល់ទៅ២២កៅអីទៅឲ្យគណបក្សប្រឆាំង។ អ្វីដែលជាការកត់សម្គាល់បន្ថែមរបស់អ្នករាយការណ៍ព័ត៌មានឲ្យទីភ្នាក់ងារព័ត៌មានជប៉ុនក្យូដូនេះ ការបោះឆ្នោតនៅឆ្នាំ២០១៨ខាងមុខ ក៏ទំនងជាការបោះឆ្នោតចុងក្រោយនៃជីវិតនយោបាយរបស់លោក សម រង្ស៊ី ប្រធានគណបក្សប្រឆាំងផងដែរ នោះបើគេផ្អែកលើអាយុ និងប្រជាប្រិយភាពរបស់លោកសម រង្ស៊ី។ បើតាមការកត់សម្គាល់របស់លោក ពុយ គា គណបក្សប្រឆាំងនៅពេលនេះ ហាក់កំពុងចាញ់ប្រៀបខ្លាំង បើធៀបនឹងគណបក្សកាន់អំណាច ហើយគណបក្សប្រឆាំងនៅពេលនេះ ក៏កំពុងសំងំស្ងៀម ខណៈដែលគណបក្សប្រជាជនកម្ពុជាបានបញ្ឆេះម៉ាស៊ីនរបស់ខ្លួនតាំងពីដើមទីមកម្ល៉េះ។ ប៉ុន្តែយ៉ាងណាក៏ដោយ ទឹកល្អក់គេនៅមិនទាន់មើលឃើញត្រីច្បាស់នៅឡើយទេ។
សូមបញ្ជាក់ថា រហូតមកទល់នឹងពេលនេះ កាលបរិច្ឆេទនៃការបោះឆ្នោតឃុំសង្កាត់ និងការបោះឆ្នោតជាតិនៅមិនទាន់មានការកំណត់ច្បាស់លាស់នៅឡើយទេ ពោលគឺគេគ្រាន់តែដឹងថា ការបោះឆ្នោតឃុំសង្កាត់នឹងធ្វើឡើងនៅអំឡុងខែមិថុនាឆ្នាំ២០១៧ ហើយការបោះឆ្នោតជាតិនឹងធ្វើឡើងនៅខែកក្កដាឆ្នាំ២០១៨។
សូមបញ្ជាក់ដែរថា កិច្ចពិភាក្សារបស់ក្លឹបអ្នកកាសែតកម្ពុជា ដែលធ្វើឡើងនៅក្នុងសណ្ឋាគាស៊ាន់វេក្នុងក្រុងភ្នំពេញនៅថ្ងៃនេះ គឺដើម្បីពិភាក្សាពីអនាគតនយោបាយកម្ពុជាឆ្ពោះទៅរកការបោះឆ្នោត ក្រោមការឧបត្ថម្ភរបស់អង្គការអាឡឺម៉ង់ Konrad Adenauer។ កិច្ចពិភាក្សានៅថ្ងៃនេះ ក៏បានលើកឡើងពីកម្លាំងចលកររបស់យុវជនកម្ពុជា ដែលនឹងធ្វើឲ្យមានការប្រែប្រួលនៅក្នុងការបោះឆ្នោតជាតិនៅពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ