គណបក្សសង្រ្គោះជាតិនឹងធ្វើសន្និបាតក្រុមប្រឹក្សាជាតិ នៅសប្ដាហ៍ទី៣ខែមីនា ដោយមិនមានវត្តមានលោក សម រង្ស៊ី
គណបក្សសង្រ្គោះជាតិ នឹងធ្វើសន្និបាតគណបក្ស នៅក្នុងសប្តាហ៍ទី៣នៃខែមីនា ឆ្នាំ២០១៦ខាងមុខនេះ ដើម្បីអនុម័តលើសេចក្តីសម្រេចមួយចំនួន ពិសេសពង្រាងផែនការសកម្មភាពរបស់គណបក្សសម្រាប់ឆ្នាំ២០១៦ និងគោលនយោបាយសម្រាប់ការបោះឆ្នោតឃុំនៅឆ្នាំ២០១៧។ សន្និបាតរបស់គណបក្សសង្រ្គោះជាតិ២ឆ្នាំម្តងនេះ នឹងមានសមាជិកក្រុមប្រឹក្សាជាតិ ប្រមាណ៣ពាន់នាក់ចូលរួម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
សេចក្តីសម្រេចនេះ បានធ្វើឡើង ក្រោយកិច្ចប្រជុំរបស់គណៈកម្មាធិការអចិន្រ្តៃយ៍គណបក្សសង្រ្គោះជាតិ នៅព្រឹកថ្ងៃទី៣០ធ្នូឆ្នាំ២០១៥ ក្រោមការចូលរួមរបស់លោក កឹម សុខា ប្រធានស្តីទីគណបក្សសង្រ្គោះជាតិ។ កិច្ចប្រជុំបានធ្វើឡើងនៅទីស្នាក់ការគណបក្ស ស្ថិតនៅសង្កាត់ចាក់អង្រែលើក្រុងភ្នំពេញ។
លោក កឹម សុខា បានសរសេរនៅលើបណ្តាញសង្គមហ្វេសបុករបស់លោកនៅក្រោយកិច្ចប្រជុំនេះថា គណបក្សសង្រ្គោះជាតិបានសម្រេចថា នឹងធ្វើសន្និបាតក្រុមប្រឹក្សាជាតិ នៅសប្ដាហ៍ទី៣នៃខែមីនាឆ្នាំ២០១៦ខាងមុខនេះ ដើម្បីអនុម័តទៅលើសេចក្តីសម្រេចមួយចំនួន ពិសេសពង្រាងផែនការសកម្មភាពរបស់គណបក្សសម្រាប់ឆ្នាំ២០១៦ និងការកំណត់គោលនយោបាយថ្មីសម្រាប់ការចូលរួមបោះឆ្នោតឃុំសង្កាត់នៅឆ្នាំ២០១៧ខាងមុខ។
មន្រ្តីគណបក្សសង្រ្គោះជាតិបានថ្លែងថា សន្និបាតគណបក្សសង្រ្គោះជាតិ ដែលរៀបចំធ្វើឡើងនៅរាល់២ឆ្នាំម្តងនេះ នឹងមានសមាជិកក្រុមប្រឹក្សាជាតិប្រមាណ៣ពាន់នាក់ចូលរួម រាប់ចាប់តាំងពីសមាជិកក្រុមប្រឹក្សាឃុំសង្កាត់ សមាជិកក្រុមប្រឹក្សានិងប្រតិបត្តិស្រុក និងខេត្ត ផងដែរ។
សន្និបាតក្រុមប្រឹក្សាជាតិគណបក្សសង្រ្គោះជាតិនៅចុងខែមិនាឆ្នាំក្រោយនេះ មានន័យថា នឹងធ្វើឡើងដោយមិនមានវត្តមានរបស់លោក សម រង្ស៊ី ប្រធានគណបក្សនោះទេ ព្រោះថា លោក សម រង្ស៊ី បច្ចុប្បន្នដែលកំពុងប្រឈមនឹងដីការចាប់ខ្លួនរបស់តុលាការក្រុងភ្នំពេញ ក្នុងបណ្តឹងបរិហាកេរ្តិ៍លោកឧបនាយករដ្ឋមន្រ្តី ហោ ណាំហុង និងដីការកោះហៅចំនួនពីរទៀតនោះ កំពុងរស់នៅក្រៅប្រទេស ចាប់តាំងពីបានចាកចេញពីប្រទេសកម្ពុជានៅក្រោយពិធីបុណ្យភ្ជុំបិណ្ឌមកម្លេះ។ ប៉ុន្តែមន្រ្តីគណបក្សសង្រ្គោះជាតិបានបញ្ជាក់ថា លោក សម រង្ស៊ី ទំនងជាអាចថ្លែងបើកសន្និបាតក្រុមប្រឹក្សាជាតិនេះ តាមរយៈវីដេអូខនហ្វឺរ៉ែន (Video Conference) ដូចដែលលោក សម រង្ស៊ី ធ្លាប់បានធ្វើ នៅក្នុងអំឡុងពេលលោកអវត្តមានពីប្រទេសកម្ពុជានៅឆ្នាំ២០១២។
គួរកត់សំគាល់ដែរថា សន្និបាតគណបក្សសង្រ្គោះជាតិ នឹងធ្វើឡើង ក្រោយពីមហាសន្និបាតវិសាមញ្ញរបស់គណបក្សកាន់អំណាច។ គណបក្សប្រជាជនកម្ពុជា ដែលកំពុងកាន់អំណាចបានប្រកាសថា នឹងធ្វើមហាសន្និបាតវិសាមញ្ញបក្សទូទាំងប្រទេសនៅក្រោយថ្ងៃទី៧ មករា ឆ្នាំ ២០១៦ ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ