គណបក្សសង្រ្គោះជាតិបន្តរំលឹកព្រឹត្តិការណ៍ថ្ងៃ ៥-៦ កក្កដា ១៩៩៧ ដើម្បីកុំឲ្យកម្ពុជាជាន់ដានចាស់
គណបក្សសង្រ្គោះជាតិដែលជាគណបក្សប្រឆាំង គ្រោងរៀបចំពិធីរំលឹកវិញ្ញាណក្ខន្ធអ្នកស្លាប់បាត់បង់ជីវិតនៅក្នុងព្រឹត្តិការណ៍ថ្ងៃទី ៥-៦ កក្កដា ឆ្នាំ១៩៩៧នៅថ្ងៃស្អែកនេះ។ គឺជាព្រឹត្តិការណ៍បាញ់ប្រហារគ្នានៅចំកណ្តាលទីក្រុងភ្នំពេញ រវាងកម្លាំងយោធាដែលគាំទ្រគណបក្សហ្វ៊ុនស៊ិនប៉ិច និង កងកម្លាំងដែលគាំទ្រគណបក្សប្រជាជនកម្ពុជារបស់លោកនាយករដ្ឋមន្រ្តី ហ៊ុន សែន។ ព្រឹត្តិការណ៍មួយចំអិនកំពិសនេះ បានបណ្តាលឲ្យយោធានិងឧត្តមសេនីយ៍ហ្វ៊ុនស៊ិនប៉ិចជាង៦០នាក់បានពលីជីវិត។
ចុះផ្សាយនៅថ្ងៃ៖
ស្តាប់ - ០២:៤១
ព្រឹត្តិការណ៍ថ្ងៃទី៥-៦កក្កដាឆ្នាំ១៩៩៧ នៅតែស្ថិតនៅក្នុងការចងចាំរបស់ប្រជាពលរដ្ឋកម្ពុជា និងអ្នកនយោបាយជាទូទៅ។ ប៉ុន្តែអត្ថន័យនៃព្រឹត្តិការណ៍ខាងលើនេះ នៅតែមានការបកស្រាយខុសៗគ្នាដដែល។ អ្នកខ្លះបានហៅព្រឹត្តិការណ៍នេះថា គឺជាអំពើរដ្ឋប្រហារយោធា ដើម្បីដណ្តើមអំណាចគ្នារវាងនាយករដ្ឋមន្រ្តីទី១សម្តេចក្រុមព្រះ នរោត្តម រណឬទ្ធិ និងនាយករដ្ឋមន្រ្តីទី២លោក ហ៊ុន សែន។ ប៉ុន្តែអ្នកខ្លះបានត្រឹមចាត់ទុកព្រឹត្តិការណ៍នេះថា គឺជាការប៉ះទង្គិចគ្នាតែប៉ុណ្ណោះ។
លោកព្រឹទ្ធាចារ្យ លឺ ឡាយស្រេង និងជាអតីតមន្រ្តីជាន់ខ្ពស់គណបក្សហ្វ៊ុនស៊ិនប៉ិចបានចាត់ទុកព្រឹត្តិការណ៍នេះថា ការពិត គឺជាការបង្ហូរឈាមគ្នា ដើម្បីអំណាច។
ចំណែកអ្នកនាំពាក្យក្រសួងការពារជាតិ លោកនាយឧត្តមសេនីយ៍ ឈុំ សុជាតិ នៅថ្ងៃនេះ បានបន្តច្រានចោលនូវការចោទប្រកាន់ថា ព្រឹត្តិការណ៍ថ្ងៃទី ៥-៦ កក្កដា ឆ្នាំ១៩៩៧ គឺជាអំពើរដ្ឋប្រហារ។ លោកឧត្តមសេនីយ៍បានចាត់ទុកព្រឹត្តិការណ៍នោះថា គឺជាការបង្រ្កាបចលនាបះបោរ ដែលសម្តេចក្រុមព្រះនរោត្តម រណឬទ្ធិ បានទិញអាវុធទំនើប ហើយនាំកងកម្លាំងខ្មែរក្រហមចូលមករាជធានីភ្នំពេញដោយខុសច្បាប់ ដើម្បីបង្កសង្រ្គាមជាថ្មីនៅក្នុងប្រទេសកម្ពុជា។
លោកនាយឧត្តមសេនីយ៍បានប្រាប់សារព័ត៌មានក្នុងស្រុក Fresh News នៅថ្ងៃនេះដោយចាត់ទុកការនាំទាហានខ្មែរក្រហមចូលទីក្រុងភ្នំពេញកាលណោះ ថាជាទង្វើមួយដែលមិនអាចអត់ឳនឲ្យបានឡើយ ហើយកម្លាំងទ័ពដែលស្មោះត្រង់ជាមួយលោកនាយករដ្ឋមន្រ្តី ហ៊ុន សែន ត្រូវតែចេញអន្តរគមន៍ដោះស្រាយឲ្យទាន់ពេលវេលា។
គួរជំរាបជូនថា ការប៉ះទង្គិចគ្នានៅក្នុងព្រឹត្តិការណ៍ថ្ងៃទី ៥-៦ កក្កដា ឆ្នាំ១៩៩៧ រវាងកងកម្លាំងគាំទ្រលោកនាយករដ្ឋមន្រ្តី ហ៊ុន សែន និងកងកម្លាំងរបស់សម្តេចក្រុមព្រះនរោត្តម រណឬទ្ធិ កាលណោះ បានបណ្តាលឲ្យឧត្តមសេនីយ៍យោធា និងកងយោធាគណបក្សហ្វ៊ុនស៊ិនប៉ិច ជាង៦០នាក់បានស្លាប់បាត់បង់ជីវិត ក្នុងនោះក៏មាន លោកឧត្តមសេនីយ៍ ហូ សុខ, ក្រូច យឿម, ជា ឫទ្ធីឈុត, លោកឧត្តមសេនីយ៏ លី សេងហុង និងលោកឧត្តមសេនីយ៏ ចៅ សម្បត្តិ ជាដើម។
នៅថ្ងៃទី៦កក្កដាស្អែកនេះ គណបក្សសង្រ្គោះជាតិបានប្រកាសថា ខ្លួននឹងរៀបចំប្រារព្ធពិធីបង្សុកូលរំលឹកវិញ្ញាណក្ខន្ធដល់អ្នកស្លាប់បាត់បង់ជីវិតដែលត្រូវនឹងខួបលើកទី២០ នៅឯទីស្នាក់ការរបស់ខ្លួន ស្ថិតនៅក្នុងសង្កាត់ចាក់អង្រែលើ ក្រុងភ្នំពេញ ចាប់ពីវេលាម៉ោង៨ព្រឹកតទៅ។
បើតាមលោក យឹម សុវណ្ណ អ្នកនាំពាក្យគណបក្សនេះបានអះអាងថា គណបក្សប្រឆាំងតែងតែប្រារព្ធពិធីនេះតាំងពីឆ្នាំ១៩៩៨មក ដើម្បីជាការរំលឹកដល់វិញ្ញាណក្ខន្ធអ្នកស្លាប់បាត់បង់ជីវិត និងដើម្បីរំលឹកដល់អ្នកនយោបាយខ្មែរទាំងអស់ កុំឲ្យនាំប្រទេសកម្ពុជា ធ្លាក់ទៅក្នុងព្រឹត្តិការណ៍ថ្ងៃទី ៥-៦ កក្កដា ១៩៩៧ បន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ