បក្សសង្រ្គោះជាតិ នឹងចូលរួមប្រជុំសភាវិញ
ផ្ទុយពី ជំហររបស់ ប្រធានគណបក្សប្រឆាំងលោក សម រង្ស៊ី កាលពីថ្ងៃទី២២ កញ្ញា ដែលបានប្រកាសថា លោករក្សាជំហរធ្វើពហិការមិនចូលសភា ទោះបីសភាមានផែនការណ៍អ្វីក៏ដោយ។ នៅថ្ងៃអង្គារនេះ ប្រធានគណៈកម្មការទីបី នៃរដ្ឋសភា លោក ប៉ុល ហំម បានប្រាប់វិទ្យុបារាំងអន្តរជាតិថា លោក នឹងចូលរួមកិច្ចប្រជុំ គណៈកម្មាធិការអចិន្រ្តៃយ៍ នៃរដ្ឋសភា នៅព្រឹកថ្ងៃទី២៨ ខែកញ្ញា ឆ្នាំ២០១៦ តបតាមការអញ្ជើញរបស់រដ្ឋបាលសភា។
ចុះផ្សាយនៅថ្ងៃ៖
ស្តាប់ - ០១:៤៥
ប្រធានគណៈកម្មការទីបី នៃរដ្ឋសភា (គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក) លោក ប៉ុល ហំម បានប្រាប់វិទ្យុបារាំងអន្តរជាតិ នៅថ្ងៃអង្គារនេះ (ថ្ងៃទី២៧ កញ្ញា) ថា លោកនឹងចូលរួម កិច្ចប្រជុំគណៈកម្មាធិការអចិន្រ្តៃយ៍ នៃរដ្ឋសភា នៅព្រឹកថ្ងៃទី២៨ ខែកញ្ញា ឆ្នាំ២០១៦។ លោកបន្ថែមថា ការត្រឡប់មកពីខេត្ត ដើម្បីចូលរួមកិច្ចប្រជុំធម្មតានេះ គឺតបតាមការអញ្ជើញរបស់ គណៈកម្មាធិការអចិន្រ្តៃយ៍ នៃរដ្ឋសភា។
លោក ឡេង ប៉េងឡុង អគ្គលេខាធិការ និងជា អ្នកនាំពាក្យនៃរដ្ឋសភា បានបញ្ជាក់ថា សមាជិកគណៈកម្មាធិការអចិន្រ្តៃយ៍ ទាំង ៥ រូប របស់ បក្សសង្រ្គោះជាតិ បានបញ្ជាក់ប្រាប់ មន្រ្តីរដ្ឋបាល តាមខ្សែទូរស័ព្ទ បន្ទាប់ពីទទួលបានលិខិតអញ្ជើញតាមបែបបទរដ្ឋបាលថា នឹងចូលរួមប្រជុំទាំងអស់គ្នា។ បើតាម អ្នកនាំពាក្យនៃរដ្ឋសភា រូបនេះ កិច្ចប្រជុំនឹងថ្ងៃពុធ នឹង ផ្តោតលើការដាក់របៀបវារៈជាក់លាក់សម្រាប់ គណៈកម្មាធិការអចិន្រ្តៃយ៍ រៀបចំកិច្ចប្រជុំពេញអង្គមួយទៀត មុននឹងឈានដល់ ថ្ងៃកំណត់បើកបវេសនកាល នៃរដ្ឋសភា។
គួរជម្រាប ថា លោក សម រង្ស៊ី បានប្រាប់ កាសែតខេមបូឌាដេលី កាលពី ថ្ងៃទី២២ កញ្ញា ថា លោករក្សាជំហរធ្វើពហិការមិនចូលសភា ទោះបីជា សភាមានផែនការណ៍អ្វីក៏ដោយ។ ការត្រឡប់មកកាន់រដ្ឋសភារបស់បក្សសង្រ្គោះជាតិ គឺនៅពេលស្ថានការណ៍នយោបាយត្រឡប់ ទៅរកសភាពធម្មតាវិញ។ ចំណែកលោក សុន ឆ័យ មន្ត្រីជាន់ខ្ពស់គណបក្សសង្រ្គោះជាតិ បានថ្លែង ក្នុងវេទិកានយោបាយមួយ កាលពីថ្ងៃទី២១ កញ្ញា នៅស្នាក់ការកណ្តាលគណបក្សសង្រ្គោះជាតិ ថា ពីដើមសង្រ្គោះជាតិមិនដែលប្រកាសពហិការអ្វីទេ ! សង្រ្គោះជាតិ គ្រាន់តែបាន បញ្ជាក់នៅក្នុងសេចក្តីថ្លែងការណ៍ របស់គណបក្សថា មិនអាចទៅបំពេញការងារពេញលេញនៅរដ្ឋសភាប៉ុណ្ណោះ។ ក្រុមតំណាងរាស្រ្តគណបក្សសង្រ្គោះជាតិ មិនបានចូលប្រជុំសភាពេញអង្គ រយៈពេលជាង ៤ខែ មកហើយ ចាប់តាំងពីខែឧសភា ឆ្នាំ២០១៦ បន្ទាប់ពីតុលាការមានចំណាត់ការ លើលោក កឹម សុខា ប្រធានស្តីទីគណបក្សសង្រ្គោះជាតិ ជុំវិញករណីមិនចូលខ្លួន ធ្វើជាសាក្សី នៅតុលាការ ទាំងមានអភ័យឯកសិទ្ធិរដ្ឋសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ