ប៉ុស្តិ៍ «ព្រះអាទិត្យ» ត្រូវការទុនវិនិយោគជិត៤លានដុល្លារ
ស្ថានីយ៍ទូរទស្សន៍ថ្មី ដែលមានសមានចិត្តចំពោះគណបក្សសង្គ្រោះជាតិ និងដែលអាចមានឈ្មោះថា ប៉ុស្តិ៍ទូរទស្សន៍ព្រះអាទិត្យ នឹងដំណើរការនៅក្នុងឆ្នាំ២០១៥នេះ។ មន្ដ្រីជាន់ខ្ពស់គណបក្សសង្គ្រោះជាតិ មានប្រសាសន៍ប្រាប់វិទ្យុបារាំងអន្ដរជាតិនៅព្រឹកនេះថា ប៉ុស្តិ៍ទូរទស្សន៍ព្រះអាទិត្យនេះ ត្រូវការទុនវិនិយោគជិត៤លានដុល្លារ។ ប្រាក់ជិត៤លានដុល្លារ ដែលនឹងបានមកពីការចូលរួមរបស់ប្រជាពលរដ្ឋខ្មែរទាំងក្នុង និងក្រៅប្រទេស។
ចុះផ្សាយនៅថ្ងៃ៖
ស្តាប់ - ០២:០១
ប៉ុស្តិ៍ទូរទស្សន៍ដែលអាចមានឈ្មោះថា ព្រះអាទិត្យ កំពុងតែស្វែងរកការវិនិយោគ ទាំងផ្នែកបច្ចេកទេស និងផ្នែកហិរញ្ញវត្ថុ។ ដោយក្នុងនោះ ដើម្បីចាប់ផ្ដើម ប៉ុស្តិ៍ព្រះអាទិត្យនេះ ត្រូវការទុនវិនិយោគជិត៤លានដុល្លារ ដែលជាការចូលរួមរបស់ប្រជាពលរដ្ឋខ្មែរ ទាំងក្នុងនិងក្រៅប្រទេស។ នេះបើតាមការឲ្យដឹងពីលោក យ៉ែម បុញ្ញាឫទ្ធិ មន្ដ្រីជាន់ខ្ពស់គណបក្សសង្គ្រោះជាតិ នៅថ្ងៃចន្ទ ទី២០ ខែមេសានេះ។ បើតាមមន្ដ្រីជាន់ខ្ពស់រូបនេះ ស្ថានីយ៍ទូរទស្សន៍ ដែលឆ្លុះបញ្ចាំងពីទស្សនៈគណបក្សសង្គ្រោះជាតិ និងទស្សនៈឯករាជ្យ ត្រូវបានកំណត់ជាគោលការណ៍ ឲ្យដំណើរការនៅមុនដំណាច់ឆ្នាំ២០១៥នេះតែម្ដង។
លោក សម រង្ស៊ី ប្រធានគណបក្សសង្គ្រោះជាតិ កាលពីថ្ងៃទី១៩ខែមេសា បានលើកឡើងតាមបណ្ដាញសង្គមរបស់ខ្លួនថា ស្ថានីយ៍ទូរទស្សន៍ថ្មីនេះ គឺជាលទ្ធផលមួយទៀតនៃវប្បធម៌សន្ទនា បន្ទាប់ពីការបង្កើត គជប ថ្មីមួយ ដែលអាចជឿទុកចិត្តបាន និងបន្ទាប់ពីការដោះលែងពីពន្ធនាគារនូវសកម្មជនសិទ្ធិមនុស្ស សកម្មជនដីធ្លី និងសកម្មជនគណបក្សសង្គ្រោះជាតិ។
ស្ថានីយ៍ទូរទស្សន៍ថ្មីនេះ ថ្វីត្បិតតែមានសមានចិត្តចំពោះគណបក្សសង្គ្រោះជាតិក៏ដោយ ក៏លោកយ៉ែម បុញ្ញាឫទ្ធិ គូសបញ្ជាក់ច្បាស់ៗថា កម្មវិធីផ្សាយរបស់ប៉ុស្តិ៍ទូរទស្សន៍ថ្មីនេះ នឹងដើរតួជាកញ្ចក់ឆ្លុះបញ្ចាំងពីបញ្ហាសង្គម និងការអប់រំល្អៗ។ ជាងនេះទៅទៀត បើតាមលោក យ៉ែម បុញ្ញាឫទ្ធិ កម្មវិធីផ្សាយនៅក្នុងប៉ុស្តិ៍ទូរទស្សន៍ថ្មីនេះ នឹងគោរពឲ្យខាងតែបាននូវក្រមសីលធម៌ វិជ្ជាជីវៈសារព័ត៌មាន។
សូមរំលឹកថា ក្រសួងព័ត៌មានបានសម្រេចកាលពីថ្ងៃទី២៧ខែវិច្ឆិកា ឆ្នាំ២០១៤ អនុញ្ញាតឲ្យក្រុមហ៊ុន Cambodian Independent Media Co, Ltd ដំណើរការស្ថានីយទូរទស្សន៍តាមប្រព័ន្ធ Analog នៅរាជធានីភ្នំពេញ ដែលមានកំលាំងផ្សាយ ១០ គីឡូវ៉ាត់ កម្ពស់បង្គោលអង់តែន ១២០ម៉ែត្រ ដោយប្រើ Channel UHF-E41 និងស្ថានីយទូរទស្សន៍ប្រព័ន្ធ Analog ផ្សាយតាមបណ្តាខេត្តទូទាំងប្រទេសដែលមានកម្លាំងផ្សាយ ១គីឡូវ៉ាត់ កម្ពស់បង្គោលអង់តែន ១០០ម៉ែត្រនិងប្រើ Channel ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ