បក្សប្រជាជនកម្ពុជា៖ការលុបចោលឬមិនប្រើប្រាស់ពាក្យស្លោកបក្សសង្រ្គោះជាតិ គួរធ្វើឡើងជាលាយលក្ខណ៍អក្សរទើបអាចទុកចិត្តបាន
ថ្នាក់ដឹកនាំបក្សសង្រ្គោះជាតិ នៅតែប្រកាន់ជំហរមិនផ្លាស់ប្តូរពាក្យស្លោក «ដូរមេឃុំបម្រើបក្ស ដាក់មេឃុំបម្រើរាស្រ្ត» ឡើយ ក្រោមហេតុផលថា ពាក្យស្លោកនេះមិនមែនជា គោលនយោបាយបក្ស ហើយថ្នាក់ដឹកនាំបក្សក៏មិនបានប្រើប្រាស់ទៀតដែរ ក្រោយបក្សប្រជាជនកម្ពុជាគំរាមប្តឹង។ យ៉ាងណាក៏ដោយ បក្សប្រជាជនកម្ពុជា ដែលយល់ថា ពាក្យស្លោកនេះ មានន័យញុះញង់ និងប្រមាថមេឃុំ ចៅសង្កាត់ ចង់ឃើញបក្សប្រឆាំងប្រកាសហាមប្រើប្រាស់ជាលាយលក្ខណ៍អក្សរ ទើបអាចទុកចិត្តបាន ឬនឹងប្តឹងទៅតុលាការមុនពេលឃោសនាបោះឆ្នោតឃុំសង្កាត់ ខែឧសភា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
អនុប្រធានបក្សសង្រ្គោះជាតិ លោកស្រី មូរ សុខហួរ បានបញ្ជាក់ប្រាប់វិទ្យុបារាំង នៅថ្ងៃអង្គារនេះ ជាថ្មីម្តងទៀតថា បក្សសង្រ្គោះជាតិ គ្មានហេតុផលគ្រប់គ្រាន់ដើម្បី ផ្លាស់ប្តូរពាក្យស្លោក «ដូរមេឃុំបម្រើបក្ស ដាក់មេឃុំបម្រើរាស្រ្ត» តាមការគំរាមប្តឹងរបស់ បក្សកាន់អំណាចឡើយ។ ក្រៅតែពីសួររក គោលការណ៍ និងច្បាប់ជាក់លាក់ ដែលបក្សប្រជាជនកម្ពុជា បង្ខំឲ្យប្តូរពាក្យស្លោក លោកស្រី មូរ សុខហួរ ឆ្លៀតបកស្រាយថា ពាក្យស្លោកនេះ មិនពាក់ព័ន្ធនឹងគោលការណ៍បក្ស ទាំង ៥ចំណុចរបស់បក្សសង្រ្គោះជាតិទេ ហើយអំឡុងពេលចុះពង្រឹងផ្ទៃក្នុងបក្សក្រោយសមាជ ក៏ថ្នាក់ដឹកនាំបក្ស មិនបានប្រើពាក្យស្លោកនេះទៀតដែរ។
បើយោងសេចក្តីសម្រេច ក្នុងសមាជវិសាមញ្ញគណបក្សសង្រ្គោះជាតិ កាលពីថ្ងៃទី ០២ មីនា គណបក្សសង្រ្គោះជាតិ បានអនុម័តដោយ សំឡេងភាគច្រើនដាច់ខាត (៥០%+១) នៃសមាជិកវត្តមាន ដែលមានសិទ្ធិសម្រេច គាំទ្រគោលនយោបាយអាទិភាព ៥ ចំណុច «ដូរមេឃុំបម្រើបក្ស ដាក់មេឃុំបម្រើរាស្រ្ត» ដើម្បី (១). ពង្រឹងសិទ្ធិអំណាចប្រជាពលរដ្ឋ (២). លើកកម្ពស់ជីវភាពប្រជាពលរដ្ឋ និងអភិវឌ្ឍន៍ (៣). សេវាសាធារណៈ (៤). សន្តិសុខ និង (៥). វិមជ្ឈការ គោលនយោបាយថ្នាក់ជាតិសម្រាប់ឃុំសង្កាត់។
អ្នកនាំពាក្យបក្សប្រជាជនកម្ពុជា លោក សុខ ឥសាន បានយល់ថា ទោះបីជា ថ្នាក់ដឹកនាំ បក្សប្រឆាំង បានប្រកាសផ្ទាល់ម៉ាត់ញយដងថា នឹងមិនយកពាក្យស្លោកទៅប្រើប្រាស់ឃោសនាបោះឆ្នោត ក៏មិនអាចជឿជាក់បានឡើយ។ បក្សកាន់អំណាចចង់ឃើញ លិខិតជាលាយអក្សរជាក់លាក់ ដែលហាមប្រាមអ្នកគាំទ្រប្រើប្រាស់ពាក្យស្លោកដ៏ចម្រូងចម្រាស់នេះ ទើបអាចទុកចិត្តបាន។ យ៉ាងណាក៏ដោយ បក្សប្រជាជនកម្ពុជា នៅតែរក្សាជំហរប្តឹងបក្សសង្រ្គោះជាតិ ទៅកាន់តុលាការ រឿងពាក្យស្លោកនេះ ឲ្យបានមុនពេលឃោសនាបោះឆ្នោតឃុំសង្កាត់ ខែឧសភា ប្រសិនបើបក្សប្រឆាំងមិនផ្លាស់ប្តូរជំហរ។
គួររំលឹកថា តាមប្រតិទិននៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី ៤ ឆ្នាំ ២០១៧ ការឃោសនាបោះឆ្នោត រយៈពេល ១៤ថ្ងៃ នឹងចាប់ផ្តើមរាប់ពីថ្ងៃទី ២០ ឧសភា រហូតដល់ ថ្ងៃទី ០២ ខែមិថុនា។ អំឡុងពេល ស្ថានភាពនយោបាយកំពុងតែតានតឹង ព្រះមហាក្សត្រ នរោត្តម សីហមុនី កាលពីថ្ងៃទី ២០ កុម្ភៈ បានអំពាវនាវឲ្យ ពលរដ្ឋខ្មែរ អញ្ជើញទៅបោះឆ្នោតឲ្យបានគ្រប់ៗគ្នា ដោយប្រើសិទ្ធិសេរីភាព បោះឆ្នោតទៅតាមសតិសម្បជញ្ញៈរបស់ខ្លួន ដែលមានទំនុកចិត្តលើបេក្ខជនណាម្នាក់ ឬបក្សនយោបាយណាមួយ។ បើតាមព្រះរាជលិខិតព្រះមហាក្សត្រ ការបោះឆ្នោតនៅថ្ងៃទី ០៤ មិថុនា ២០១៧ គឺជាការបោះឆ្នោតទូទៅជាសកល ដោយសម្ងាត់ តាមលទ្ធិប្រជាធិបតេយ្យ សេរី ពហុបក្ស ដូចនេះ សូមអ្នកបោះឆ្នោតទាំងអស់កុំឲ្យព្រួយបារម្ភពីការគាបសង្កត់ ការគម្រាមកំហែង ឬសម្លុតពីជនណាម្នាក់ ឬបក្សណាមួយឲ្យសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ