ឃោសនាបោះឆ្នោតឃុំសង្កាត់៖ បក្សប្រជាជននិងសង្គ្រោះជាតិបើកឆាកធំជាងគេ!
យុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់បានចាប់ផ្ដើមហើយនាថ្ងៃសៅរ៍នេះ។ គណបក្សនយោបាយចំនួន១២ ដែលចូលរួមក្នុងការបោះឆ្នោតឆ្នាំនេះ សុទ្ធតែបានចេញឃោសនាតាមមធ្យោបាយរៀងៗខ្លួន។ ជាការកត់សម្គាល់ក្នុងថ្ងៃទី១នេះ មានតែគណបក្ស២ប៉ុណ្ណោះដែលធ្វើសកម្មភាពឃោសនាហ៊ឹកហ៊ាក់ជាងគេ។ នោះគឺគណបក្សប្រជាជនកម្ពុជា និងគណបក្សសង្គ្រោះជាតិ។ គណបក្សគូបដិបក្ខទាំងពីរនេះ សុទ្ធតែជ្រើសយករាជធានីភ្នំពេញ ជាទីតាំងបើកឆាកការឃោសនាដ៏ធំរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
ពិធីបើកយុទ្ធនាការឃោសនាបោះឆ្នោតរបស់គណបក្សប្រជាជនកម្ពុជា ប្រារព្ធធ្វើឡើងក្រោមវត្តមានដ៏កុះករពីសំណាក់សមាជិក សមាជិកា មកពី១០៥សង្កាត់ ក្នុងខណ្ឌទាំង១២ នៅរាជធានីភ្នំពេញ។ លោក ប៉ា សុជាតិវង្ស ប្រធានគណបក្សប្រជាជនរាជធានីភ្នំពេញ បានអានសារលិខិតរបស់លោក ហ៊ុន សែន ដោយលើកឡើងអំពីកិច្ចខិតខំប្រឹងប្រែងក្នុងការរំដោះប្រទេសជាតិឲ្យរួចផុតពីរបបប្រល័យពូជសាសន៍ និងការកសាងសមិទ្ធផលនានាសម្រាប់ប្រទេសជាតិ។
សមិទ្ធផលដែលប្រធានគណបក្សប្រជាជនកម្ពុជា បញ្ជាក់នៅក្នុងសារលិខិតនោះមានជាអាថិ៍ កំណែទម្រង់នៅថ្នាក់ក្រោមជាតិ ដែលបានផ្ដល់សេវាសាធារណៈ និងអភិវឌ្ឍហេដ្ឋារចនាសម្ព័ន្ធនៅ ទូទាំងប្រទេសរាប់ពាន់គម្រោងក្នុងមួយឆ្នាំៗ។ ជាគម្រោងផ្លូវ ស្ពាន អណ្ដូងទឹក ស្រះទឹក សាលារៀន ប៉ុស្តិ៍សុខភាព និងសេវាសង្គមផ្សេងៗ ដែលឆ្លើយតបទៅនឹងសេចក្ដីត្រូវការចាំបាច់របស់មូលដ្ឋាន និងរួមចំណែកកាត់បន្ថយភាពក្រីក្ររបស់ប្រជាជន។
តាមរយៈលិខិតដដែល ប្រមុខគណបក្សប្រជាជនកម្ពុជា បានប្ដេជ្ញាចិត្តថា គណបក្សនឹងប្រឹងប្រែងធ្វើអ្វីៗគ្រប់យ៉ាងឲ្យបានល្អបំផុត ដើម្បីរក្សាស្ថិរភាព សន្តិសុខ សណ្ដាប់ធ្នាប់ សុវត្ថិភាពសង្គម លើកកម្ពស់ការផ្ដល់សេវាសាធារណៈ បង្កើនកិច្ចគាំពារសង្គមជួយជនក្រីក្រ និងអភិវឌ្ឍឃុំសង្កាត់ឲ្យកាន់តែរីកចម្រើនខ្លាំងក្លាឡើងថែមទៀត។
ដោយឡែក គណបក្សសង្គ្រោះជាតិ ដែលជាគណបក្សប្រឆាំងធំជាងគេនៅកម្ពុជាវិញ។ នៅថ្ងៃបើកឆាកឃោសនាបោះឆ្នោតក្រុមប្រឹក្សាឃុំសង្កាត់ ថ្ងៃទី២០ឧសភា គណបក្សសង្គ្រោះជាតិបានជួបជុំអ្នកគាំទ្រនៅមហាវិថីសម្ដេចតេជោហ៊ុនសែន ឬ ផ្លូវ៦០ម៉ែត្រ ក្បែរទីស្នាក់ការកណ្ដាលគណបក្សសង្គ្រោះជាតិ ដោយមានលោក កឹម សុខា ប្រធានបក្ស ជាអ្នកថ្លែងសារដោយផ្ទាល់ទៅកាន់អ្នកគាំទ្រ។
នៅក្នុងសុន្ទរកថា លោក កឹម សុខា បានផ្ដោតសំខាន់លើគោលនយោបាយទាំង៥ចំណុចរបស់ខ្លួន និងការផ្លាស់ប្ដូរ។ ផ្លាស់ប្ដូរមេឃុំ ចៅសង្កាត់ចាស់ ដែលមិនបម្រើពលរដ្ឋ ដាក់មេឃុំចៅសង្កាត់ថ្មីពីគណបក្សសង្គ្រោះជាតិ។ ជាមេឃុំនិងចៅសង្កាត់ ដែល លោក កឹម សុខា អះអាងថា គ្មានការរើសអើង ហើយមានការប្ដេជ្ញាចិត្តយ៉ាងមុតមាំ ក្នុងការអភិវឌ្ឍឃុំសង្កាត់ ផ្ដល់សេវាសាធារណៈល្អដល់ប្រជាពលរដ្ឋ ដោយផ្ដល់ថវិកា៥០ម៉ឺនដុល្លារ ក្នុង១ឃុំសង្កាត់។
ក្រៅពីឃោសនា ស្វែងរកការគាំទ្រសម្រាប់គណបក្សខ្លួន លោក កឹម សុខា ក៏បានសំណូមពរដល់គ្រប់គណបក្សនយោបាយ ឲ្យឃោសនាបោះឆ្នោតដោយអហិង្សា ប្រកាន់យកគោលការណ៍ យុត្តិធម៌ ស្មើភាពគ្នា ដើម្បីឆ្លុះបញ្ចាំងពីឆន្ទៈពិតប្រាកដរបស់ពលរដ្ឋខ្មែរ។
សូមរំលឹកជូនថា យុទ្ធនាការឃោសនាបោះឆ្នោត មានរយៈពេល១៤ថ្ងៃ ចាប់ពីថ្ងៃទី២០ឧសភា ដល់ថ្ងៃទី២មិថុនា។ គណៈកម្មាធិការជាតិរៀបចំការបោះឆ្នោតបានអំពាវនាវដល់គណបក្សនយោបាយទាំងអស់ឲ្យប្រកាន់ក្រមសីលធម៌ និងគោលការណ៍នានា ដែលគជប បានកំណត់ ដើម្បីឲ្យការឃោសនាទាំងអស់ ប្រព្រឹត្តិទៅដោយសន្តិវិធី អហិង្សា សន្តិសុខ និងសុវត្ថិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ