បណ្ដាញសហគមន៍ ស្នើសុំសិទ្ធិអំណាចពីរដ្ឋាភិបាល ដើម្បីការពារព្រៃឡង់
សហគមន៍ព្រៃឡង់បានសម្ដែងពីក្ដីព្រួយបារម្ភរបស់ខ្លួន ចំពោះវិនាសកម្មនៅតំបន់ព្រៃឡង់ ព្រមទាំងស្នើឲ្យរដ្ឋាភិបាលពន្លឿនការបង្កើតគោលការណ៍ច្បាប់ការពារតំបន់ជីវៈចម្រុះមួយនេះឲ្យបានឆាប់។ សំណើនេះ ធ្វើឡើងនៅក្នុងសន្និសីទកាសែតមួយ នៅព្រឹកថ្ងៃចន្ទនេះ បន្ទាប់ពីប្រជាសហគមន៍រកឃើញថា បទល្មើសព្រៃឈើនៅតំបន់ព្រៃឡង់មានចំនួនកើនឡើងគួរឲ្យកត់សម្គាល់។ ក្រៅពីស្នើឲ្យរដ្ឋាភិបាលបង្កើតគោលការណ៍ច្បាប់ដើម្បីការពារព្រៃឡង់ ប្រជាសហគមន៍ក៏បានទាមទារឲ្យដាក់បញ្ចូលសិទ្ធិអំណាចនិងតួនាទីរបស់សហគមន៍ព្រៃឡង់ ទៅក្នុងគោលការណ៍ច្បាប់នោះផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
បទល្មើសព្រៃឈើនៅតំបន់ព្រៃឡង់ក្នុងរយៈពេល៨ខែដើមឆ្នាំ២០១៥នេះ មានការកើនឡើងគួរឲ្យកត់សម្គាល់។ នេះបើតាមរបាយការណ៍របស់បណ្ដាញសហគមន៍ព្រៃឡង់ ក្នុងខេត្តចំនួនរួមមានខេត្តកំពង់ធំ ព្រះវិហារ ស្ទឹងត្រែង និងខេត្តក្រចេះ។ បើតាមរបាយការណ៍ ប្រជាសហគមន៍បានដកហូតម៉ាស៊ីនអារឈើ និងរណាយន្តសរុបទាំងអស់៤៩គ្រឿង និងបានរកឃើញបទល្មើសកាប់បំផ្លាញចំនួន២ពាន់១៤៥ករណី ព្រមទាំងការកាប់រានព្រៃយកធ្វើជាកម្មសិទ្ធិចំនួន៨០ករណី។ ចំនួននេះ កើនឡើងប្រមាណ១០ភាគរយ បើប្រៀបធៀបទៅនឹងរយៈពេលដូចគ្នាក្នុងឆ្នាំ២០១៤កន្លងទៅ។
ប្រឈមទៅនឹងការកើនឡើងនៃបទល្មើសព្រៃឈើនេះ លោក សេង សុខហេង អ្នកសម្របសម្រួលលេខាធិការដ្ឋានបណ្ដាញសហគមន៍ព្រៃឡង់ បានសម្ដែងពីក្ដីព្រួយបារម្ភរបស់ខ្លួន ចំពោះវិនាសកម្មនៅតំបន់ព្រៃឡង់។ បណ្ដាញសហគមន៍ព្រៃឡង់ ស្នើឲ្យរដ្ឋាភិបាលពន្លឿនការបង្កើតគោលការណ៍ច្បាប់ការពារតំបន់ជីវៈចម្រុះមួយនេះឲ្យបានឆាប់ និងត្រូវដាក់បញ្ចូលសិទ្ធិអំណាចនិងតួនាទីរបស់សហគមន៍ព្រៃឡង់ ទៅក្នុងគោលការណ៍ច្បាប់នោះផងដែរ។ ការផ្ដល់សិទ្ធិអំណាចនិងតួនាទីនេះ គឺជាមធ្យោបាយដែលធ្វើឲ្យបណ្ដាញសហគមន៍ អាចជួយបំពេញកាតព្វកិច្ចការពារព្រៃឡង់ដោយស្របច្បាប់។
ក្រៅពីនេះ លោក សេង សុខហេង អ្នកសម្របសម្រួលលេខាធិការដ្ឋានបណ្ដាញសហគមន៍ព្រៃឡង់ បានស្នើឲ្យរដ្ឋាភិបាលចាត់វិធានការដកហូតរណាយន្តអារឈើជុំវិញតំបន់ព្រៃឡង់ឲ្យបានឆាប់ ដើម្បីបញ្ឈប់ការកាប់បំផ្លាញព្រៃឈើនៅតំបន់ព្រៃឡង់គ្រប់រូបភាព។ លោកក៏បានស្នើឲ្យមានការដាក់ទោសទណ្ឌដល់មន្ដ្រីព្រមទាំងអ្នកពាក់ព័ន្ធក្នុងការកាប់បំផ្លាញព្រៃឈើទាំងអស់ផងដែរ។
គួរជម្រាបជូនថា បណ្ដាញសហគមន៍ព្រៃឡង់ បានផ្ដល់អនុសាសន៍ សំណើ និងបានធ្វើយុទ្ធនាការល្បាតទ្រង់ទ្រាយធំនៅតំបន់ព្រៃឡង់ ជាច្រើនលើកច្រើនសារមកហើយ។ នៅក្នុងយុទ្ធនាការនីមួយៗ បណ្ដាញសហគមន៍តែងតែចាកចេញពីព្រៃឡង់ដោយភស្តុតាងនិងរបាយការណ៍នៃការកាប់បំផ្លាញព្រៃឈើជាច្រើនករណី។ យុទ្ធនាការល្បាតនៅព្រៃឡង់ចុងក្រោយបំផុត ធ្វើឡើងក្នុងអំឡុងថ្ងៃទី១០ ដល់ថ្ងៃទី១៤ខែសីហា ដោយមានអ្នកចូលរួមជាង៣០០នាក់។ អ្នកចូលរួមទាំងជាង៣០០នាក់ ដែលធ្វើដំណើរចេញពីខេត្តកំពង់ធំ ព្រះវិហារ ស្ទឹងត្រែង និងក្រចេះ ដោយម៉ូតូប្រមាណ២០០គ្រឿង ឆ្ពោះទៅកាន់តំបន់ស្នូលនៃព្រៃឡង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ