រយៈពេល២២ឆ្នាំ ច្បាប់កំពូលរបស់កម្ពុជា បានឆ្លងកាត់វិសោធនកម្ម៨លើក
រដ្ឋធម្មនុញ្ញាគឺជាច្បាប់កំពូលរបស់ព្រះរាជាណាចក្រកម្ពុជាដែលត្រូវបានបង្កើតឡើងនៅឆ្នាំ១៩៩៣។ ប៉ុន្តែក្នុងរយៈពេល២២ឆ្នាំមកនេះ ច្បាប់កំពូលរបស់កម្ពុជានៅមិនទាន់ត្រូវបានអនុវត្តឲ្យបានពេញលេញនៅឡើយទេ។ ជាងនេះទៅទៀត ច្បាប់កំពូលនេះ ត្រូវបានឆ្លងកាត់វិសោធនកម្មដល់ទៅ៨លើក គិតទាំងវិសោធនកម្មចុងក្រោយកាលពីឆ្នាំ២០១៤។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
២៤កញ្ញ១៩៩៣-២៤កញ្ញា២០១៥នេះ គឺជាខួប២២ឆ្នាំគត់ នៃទិវាប្រកាសឲ្យប្រើរដ្ឋធម្មនុញ្ញនៃព្រះរាជាណាចក្រកម្ពុជា។ រយៈពេល២២ឆ្នាំមកនេះ ច្បាប់កំពូលរបស់កម្ពុជា ត្រូវបានគេមើលឃើញថា មិនទាន់អនុវត្តឱ្យបានពេញលេញនៅឡើយទេ ខណៈដែលច្បាប់កំពូលនេះ បានឆ្លងកាត់វិសោធនកម្មដល់ទៅ៨លើក។ នេះបើតាមការបញ្ជាក់ពីលោក អេង ឆៃអ៊ាង សមាជិកសភាគណបក្សសង្រ្គោះជាតិ។
ចំណែកឯ លោក អ៊ូ វីរៈ ប្រធានវេទិកាអនាគត និងជាអ្នកតាមដានសង្គមកម្ពុជា បានលើកឡើងថា ក្នុងរយៈពេល២២ឆ្នាំនេះ ការអនុវត្តច្បាប់រដ្ឋធម្មនុញ្ញដែលជាច្បាប់កំពូលនោះ គឺមិន ត្រឹមត្រូវ និងល្អប្រសើរនោះទេ ខណៈដែលស្មារតីនៃរដ្ឋធម្មនុញ្ញមានខ្លឹមសារយ៉ាងល្អប្រសើរ។ លោកបានបន្ថែមថា ច្បាប់ធម្មនុញ្ញត្រូវបានកែប្រែជាញឹកញាប់ដោយសម្លេង ២/៣ ដែលសំឡេងនេះ ងាយនឹងរកបានពីគណបក្សនយោបាយ។ ប៉ុន្តែយ៉ាងណាក៏ដោយ លោក អ៊ូ វីរៈ បានលើកឡើងថា ការកែប្រែរដ្ឋធម្មនុញ្ញមួយចំនួន ក៏សមស្របផងដែរ។
ដូចគ្នានេះដែរ លោក សុខ សំអឿន ប្រធានក្រុមអ្នកច្បាប់ការពារសិទ្ធិកម្ពុជា បានមើលឃើញថា មាត្រាមួយចំនួននៃច្បាប់កំពូលនេះ មិនទាន់ត្រូវបានអនុវត្ត តាំងពីឆ្នាំ១៩៩៣មកម្ល៉េះ។ តួយ៉ាងដូចជា ការបង្កើតសមាជជាតិប្រចាំឆ្នាំជាដើម។
យ៉ាងណាក៏ដោយ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានពន្យល់ថា ក្នុងរយៈពេល២២ឆ្នាំមកនេះ កម្ពុជាបានអនុវត្តយ៉ាងត្រឹមត្រូវទៅតាមក្រឹត្យក្រមរបស់រដ្ឋធម្មនុញ្ញនៃព្រះរាជាណាចក្រកម្ពុជា។ ហើយអ្វីដែលសំខាន់នោះគឺថា រដ្ឋាភិបាលបានធានាឲ្យមានសុខសន្តិភាព និងដំណើរការលទ្ធិប្រជាធិបតេយ្យយ៉ាងពេញលេញ។
យោងតាមគេហទំព័រផ្លូវការរបស់រដ្ឋសភា ច្បាប់រដ្ឋធម្មនុញ្ញនៃព្រះរាជាណាចក្រកម្ពុជា បានឆ្លងកាត់ការធ្វើវិសោធនកម្មចំនួន៧លើក ដោយគិតត្រឹមការឡាយព្រះហស្តលេខាចុងក្រោយរបស់ព្រះករុណា ព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា កាលពីថ្ងៃទី១៥ ខែកុម្ភៈ ឆ្នាំ២០០៨។ ក៏ប៉ុន្តែ បើគិតទាំងការធ្វើវិសោធនកម្មចុងក្រោយ កាលពីឆ្នាំ២០១៤ ច្បាប់រដ្ឋធម្មនុញ្ញនៃព្រះរាជាណាចក្រកម្ពុជា បានឆ្លងកាត់វិសោធនកម្មចំនួន៨លើករួចទៅហើយ។
លោក សុខ សំអឿន បានបញ្ជាក់ថា បើកាលណាច្បាប់រដ្ឋធម្មនុញ្ញនៃប្រទេសមួយ បានធ្វើការកែប្រែជាច្រើនដងក្នុងរយៈពេល៥ឆ្នាំ ឬ១០ឆ្នាំ នោះមានន័យថា ច្បាប់រដ្ឋធម្មនុញ្ញនៃប្រទេសនោះ មិនរឹងម៉ាំនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ