មានការរិះគន់បែបចំអកខ្លាំងៗឲ្យសមាជិកក្រុមប្រឹក្សាឃុំរបស់បក្សប្រឆាំង!
អ្នកប្រើបណ្តាញសង្គមចំនួន ដែលទំនងជាអ្នកគាំទ្របក្សកាន់អំណាច បានប្រើពាក្យពេចន៍រិះគន់ធ្ងន់ៗបែបចំអកយ៉ាងច្រើនចំពោះសមាជិកក្រុមប្រឹក្សាឃុំរបស់បក្សសង្គ្រោះជាតិ។ ខ្លឹមសារនៃពាក្យមាក់ងាយទាំងនោះ គឺផ្តោតទៅលើកម្រិតចំណេះដឹង ទ្រព្យសម្បត្តិ និងបុគ្គលិកលក្ខណៈរបស់សមាជិកក្រុមប្រឹក្សាឃុំរបស់បក្សប្រឆាំង។
ចុះផ្សាយនៅថ្ងៃ៖
ស្តាប់ - ០៣:០៥
ខ្លឹមសារនៃពាក្យរិះគន់មាក់ងាយទាំងនោះ មានដូចជាសម្តីបែបចំអកថាឲ្យសមាជិកក្រុមប្រឹក្សារបស់បក្សប្រឆាំង ជាអតីតអ្នកសុំទាន ជាជនពិការ បេក្ខជនខ្លះជាអ្នកធាក់ស៊ីក្លូ រត់ម៉ូតូឌុប។ ចំណែកបុគ្គលមួយចំនួនទៀត ជាក្មេងស្ទាវ កាប់ដាវ បង្ហោះម៉ូតូ និង មិនបានរៀនសូត្រខ្ពស់ អ្នកខ្លះត្រឹមថ្នាក់ទី២ ដូច្នេះតើឲ្យទៅដឹកនាំបណ្ឌិតៗមកពីបរទេសម្តេចកើត?
ភ្លាមៗ លោក កឹម សុខា ប្រមុខបក្សសង្គ្រោះជាតិ ដែលចុះទៅថ្លែងអំណរគុណម្ចាស់ឆ្នោត នៅស្រុកកៀនស្វាយ ខេត្តកណ្តាល បានឆ្លើយតបចំពោះពាក្យប្រមាថទាំងនោះ ទៅលើពីរចំណុច។ ទី១ ជុំវិញការមើលងាយអ្នកក្រ ហើយទី២ គឺរឿងសញ្ញាបត្រ។
លោក កឹម សុខា ៖
ជាការឆ្លើយតបទៅវិញ លោក សុខ ឥសាន អ្នកនាំពាក្យបក្សកាន់អំណាច ថាសុំឲ្យបែងចែកជាពីរករណី។ ទី១ គឺអាចមកពីបក្សប្រឆាំងខ្លួនឯង ជាអ្នកប្រឌិត ឬបន្លំខ្លួន ហើយរិះគន់ទម្លាក់កំហុសដាក់បក្សប្រជាជនកម្ពុជា។ ទី២ បើទោះបីបេក្ខជនរបស់បក្សសង្គ្រោះជាតិ ជានរណាក៏ដោយ ក៏ជាសិទ្ធិសម្រេចរបស់បក្សរបស់គេតែប៉ុណ្ណោះ។
តំណាងបក្សប្រជាជនកម្ពុជា បានបញ្ជាក់ថា គេពិតជាមិនអាចវាយតម្លៃទៅលើតែកម្រិតចំណេះដឹងសញ្ញាបត្រ ទាំងដែលមេឃុំចៅសង្កាត់ថ្មីមិនទាន់ចូលកាន់ការងារផងនោះទេ។ យ៉ាងណាក៏ដោយ លោក សុខ ឥសាន អះអាងថា ពាក្យពេចន៍ទិតៀនដែលលើកឡើងខាងដើម គឺមិនត្រឹមត្រូវទេ និងជាការរើសអើង ហើយបក្សកាន់អំណាចគ្មានគោលការណ៍ណែនាំអ្នកទ្រឲ្យធ្វើអំពើមិនថ្លៃថ្នូរដូច្នេះឡើយ។
គួរបញ្ជាក់ថា ក្រៅពីការរិះគន់ទាំងឡាយនេះ ក៏មានការទម្លាយឯកសារថា មានបេក្ខនារីចៅសង្កាត់ម្នាក់របស់បក្សសង្គ្រោះជាតិ គឺមានដើមដំណើតវៀតណាមម្នាក់ ដែលបានទទួលសញ្ជាតិខ្មែរ។ ក៏ប៉ុន្តែ បើគេពិនិត្យឈ្មោះ និងថ្ងៃខែឆ្នាំកំណើត គឺខុសគ្នាស្រឡះ។
លើសពីនេះ ក៏មានការតែងចម្រៀងចំអកផងដែរ ដោយខ្លឹមសារថា កាលពីការសន្យាផ្តល់ឲ្យមនុស្សចាស់ៗម្នាក់៤ម៉ឺនរៀល មិនបានផង ឥឡូវនេះ មកឲ្យ៥០ម៉ឺនដុល្លារ ក្នុងមួយឃុំទៀត គឺជាការបោកលុះក្ស័យ។ ត្រង់ចំណុចនេះ បក្សប្រឆាំងបានពន្យល់ច្រើនដងមកហើយថាទាល់តែបក្សនេះ ឈ្នះឆ្នោតជាតិ ទើបអាចអនុវត្តទៅបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ