មនុស្សជាង៤ពាន់នាក់ នាំគ្នាជិះកង់ដើម្បីចូលរួមប្រឆាំងនឹងបំរែបំរួលអាកាសធាតុ
នៅព្រឹកថ្ងៃអាទិត្យ ទី១០ ឧសភានេះ ក្រុមប្រជាពលរដ្ឋ យុវជន មន្ត្រីរដ្ឋាភិបាល និងអង្គការសង្គមស៊ីវិលប្រមាណជាង៤ពាន់នាក់ បាននាំគ្នាជិះកង់ ដើម្បីជាបង្ហាញពីចូលរួមប្រយុទ្ធប្រឆាំងនឹងបំរែបំរួលអាកាសធាតុ។ បំរែបំរួលអាកាសធាតុដែលកំពុងក្លាយជាបញ្ហារសើបមួយដែលពិភពលោកកំពុងព្រួយបារម្ភ និង យកចិត្តទុកដាក់យ៉ាងខ្លាំង។ ការជិះកង់នៅព្រឹកនេះបានរៀបចំ និងដឹកនាំដោយប្រតិភូសហភាពអឺរ៉ុបប្រចាំនៅប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០១:៥៧
គឺតាំងពីព្រឹកព្រលឹម ក្រុមអ្នកជិះកង់ទាំងនេះ បានចាប់ផ្តើមជិះកង់ជាក្រុមចេញពីពហុកីឡដ្ឋានជាតិអូឡាំពិកទៅតាមដងមហាវិថីនានានៅក្នុងទីក្រុងភ្នំពេញ។ វាគឺជាការជិះកង់ជាក្រុមទ្រង់ទ្រាយធំលើកទី៣ហើយនៅក្នុងប្រទេសកម្ពុជា ដែលរៀបចំឡើងដោយប្រតិភូសហភាពអឺរ៉ុបប្រចាំនៅប្រទេសកម្ពុជា។ ការជិះកង់នៅឆ្នាំនេះដែលមានការចូលរួមពីមន្ត្រីទូតនានា មន្ត្រីរដ្ឋាភិបាល ក្រុមយុវជន និង ប្រជាពលរដ្ឋជាច្រើននាក់ផងនោះ បានធ្វើឡើងក្រោមប្រធានបទ “ ជិៈកង់ ដើម្បីអាកាសធាតុ” ។
លោកស្រីប៉ុក ពួន មន្ត្រីទទួលបន្ទុកផ្នែកព័ត៌មានរបស់ប្រតិភូសហភាពអឺរ៉ុបប្រចាំនៅកម្ពុជា បានថ្លែងឲ្យដឹងថា មូលហេតុដែលប្រតិភូសហភាពអឺរ៉ុបប្រចាំនៅកម្ពុជា រៀបចំឲ្យមានការជិះកង់ក្រោមប្រធានបទ “ជិះកង់ ដើម្បីអាកាសធាតុ”នេះ គឺ ដើម្បីចង់បង្ហាញថា បញ្ហាបំរែបំរួលអាកាសធាតុ កំពុងត្រូវបានពិភពលោកព្រួយបារម្ភ និង យកចិត្តយកទុកដាក់យ៉ាងខ្លាំងនៅពេលនេះ។ ជាក់ស្តែងនៅខែធ្នូ ចុងឆ្នាំ២០១៥នេះ បណ្តាលមេដឹកនាំនៅលើពិភពលោកនឹងរៀបចំឲ្យមានសន្និសីទមួយស្តីពី ការប្រយុទ្ធប្រឆាំងនឹងបំរែបំរួលអាកាសធាតុ ដែលធ្វើឡើងនៅក្នុងទីក្រុងបារីស ប្រទេសបារាំង។ ក្រៅពីនេះ បើតាមលោកស្រី ប៉ុក ពួន ការជិះកង់នេះ គឺចង់បង្ហាញផងដែរថា ការជិះកង់ គឺជាមធ្យោបាយដ៏ប្រសើរមួយក្នុងចូលរួមទប់ស្តាត់បំរែបំរួលអាកាសធាតុ។
ការជិះកង់ជាក្រុម ក្នុងន័យដើម្បីអាកាសធាតុនេះ បានធ្វើឡើងតែមួយព្រឹកប៉ុណ្ណោះ ដោយបានបញ្ចប់នៅម៉ោងប្រមាណជិត១១ព្រឹក។ គួរជំរាបជូនថា ការជិះកង់នេះ គឺជាផ្នែកមួយនៅក្នុងព្រឹត្តិការសប្តាហ៍សហភាពអឺរ៉ុបឆ្នាំ២០១។ ព្រឹត្តិការសប្តាហ៍សហភាពអឺរ៉ុបឆ្នាំ២០១៥ ត្រូវបានរៀបចំឡើងពេញសប្តាហ៍ គឺចាប់ពីថ្ងៃទី៤ ដល់ទី១០ឧសភា ដើម្បីអបអរទិវាអឺរ៉ុបឆ្នាំ២០១។ ព្រឹត្តិការណ៍នេះ ប្រតិភូសហភាពអឺរ៉ុប បានរៀបចំឲ្យមានកម្មវិធីកម្សាន្ត និង អប់រំជាច្រើននៅកម្ពុជា ដូចជាការប្រគុំតន្ដ្រីនិងការតាំងពិព័រណ៍អឺរ៉ុបនៅសួនច្បារមុខ វត្តបទុមវត្តី ដំណើរទស្សកិច្ចរបស់ឯកអគ្គរដ្ឋទូតនៃសហភាពអឺរ៉ុបទៅកាន់សាកលវិទ្យាល័យមួយចំនួនក្នុងក្រុងភ្នំពេញ និងវេទិកាឧត្តមសិក្សាលើកទី២នៅវិទ្យាស្ថានជាតិអប់រំជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ