រដ្ឋាភិបាលកម្ពុជាគ្រោងខ្ចីលុយបរទេសប្រមាណ ២ពាន់លានដុល្លារនៅឆ្នាំ២០១៩
គិតត្រឹមខែកញ្ញា ឆ្នាំ ២០១៨ រាជរដ្ឋាភិបាលកម្ពុជា បានជំពាក់បំណុលសាធារណៈពីបរទេស មានទឹកប្រាក់សរុបប្រមាណ ៦.៨ពាន់លានដុល្លារអាមេរិក។ នៅឆ្នាំ ២០១៩ រដ្ឋាភិបាលកម្ពុជា គ្រោងនឹងខ្ចីប្រាក់ពីដៃគូអភិវឌ្ឍន៍បរទេស ក្នុងកម្រិត ១៤០០លាន SDR ឬ ស្មើនឹងប្រមាណជិត ២ពាន់លានដុល្លារបន្ថែមទៀត។ នេះបើតាមការឲ្យដឹងពីស្ថានភាពបំណុលកម្ពុជា ក្នុងសេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០១៩ ដែលទើបត្រូវបានគណៈរដ្ឋមន្រ្តីកម្ពុជា សម្រេចអនុម័ត នៅព្រឹកថ្ងៃសុក្រ ទី ២៦ខែតុលានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩ បង្ហាញថា បំណុលសាធារណៈក្រៅប្រទេសដែលរាជរដ្ឋាភិបាលកម្ពុជា បានជំពាក់បរទេសគិតត្រឹមខែកញ្ញា ឆ្នាំ ២០១៨ រួមមាន ៤៨.៣ភាគរយ បំណុលចិន, ២៩ភាគរយ ជាបំណុលទ្វេភាគីផ្សេងទៀត, ៩.១ភាគរយ ជាបំណុលចាស់ដែលកំពុងចរចាដោះស្រាយ, ៥.២ភាគរយ ជំពាក់កូរ៉េខាងត្បូង, ៤.៤ភាគរយ ជំពាក់ជប៉ុន និង ៤ភាគរយ ជាបំណុលទ្វេភាគី។
ហើយនៅឆ្នាំ ២០១៩ខាងមុខ រដ្ឋាភិបាលកម្ពុជា ក៏គ្រោងកំណត់ពិដានក្នុងការខ្ចីថ្មី ក្នុងកម្រិត ១៤០០លាន SDR ឬ គិតជាទំហំទឹកប្រាក់ប្រមាណ ២ពាន់លានដុល្លារបន្ថែមទៀត។ ទំហំទឹកប្រាក់នេះ គឺដើម្បីឲ្យរាជរដ្ឋាភិបាល អាចចុះហត្ថលេខាខ្ចីប្រាក់ពីគេ បានចំនួន ២៥គម្រោង ក្នុងចំណោមគម្រោងសរុប ៣២ដែលមានលក្ខណៈសម្បត្តិរួចរាល់។
គម្រោងទាំងនោះ ជាគម្រោងដែលបង្កើតឡើងក្នុងគោលដៅទ្រទ្រង់ចីរភាពនៃកំណើនសេដ្ឋកិច្ចរយៈពេលមធ្យម និងវែង ដើម្បីលើកកម្ពស់ភាពប្រកួតប្រជែង និងផលិតភាពសេដ្ឋកិច្ច ដែលរួមមានវិស័យថាមពល ធារាសាស្ត្រ ហេដ្ឋារចនាសម្ព័ន្ធរូបវន្ត និងវិស័យអាទិភាពផ្សេងទៀត តួយ៉ាងវិស័យកសិកម្ម សុខាភិបាល ការផ្គត់ផ្គង់ទឹកស្អាត ហិរញ្ញវត្ថុ បណ្តុះបណ្តាលវិជ្ជាជីវៈ និងអប់រំ។
រាជរដ្ឋាភិបាល បានបញ្ជាក់ថា ការគ្រប់គ្រងបំណុលសាធារណៈ គឺតែងតែប្រកាន់ខ្ជាប់នូវគោលការណ៍គន្លឹះចំនួន ៤ គឺត្រូវខ្ចីឥណទានក្នុងទំហំសមស្រប ដែលស្ថានភាពថវិកា និងសេដ្ឋកិច្ចអាចទ្រាំទ្របាន។ ត្រូវខ្ចីតែឥណទាន ដែលមានកម្រិតសម្បទាន ឬ លក្ខខណ្ឌអនុគ្រោះខ្ពស់។ ត្រូវខ្ចីសម្រាប់តែវិស័យអាទិភាពទ្រទ្រង់ចីរភាពនៃកំណើន និងវិស័យបង្កើនផលិតភាពសេដ្ឋកិច្ច ឬ ផលិតភាពផលិតកម្ម។ និងត្រូវប្រើប្រាស់ឥណទាណទាំងនោះ ប្រកដដោយតម្លាភាព គណនេយ្យភាព និងប្រសិទ្ធភាពខ្ពស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ