កម្មកររោងចក្រនៅបាវិតផ្ទុះកូដកម្មជាថ្មីនៅព្រឹកនេះ មានទាំងការគប់ដុំថ្ម និងបំផ្លាញរថយន្តពន្លត់អគ្គីភ័យ១គ្រឿង
កម្មកររោងចក្រនៅតំបន់សេដ្ឋកិច្ចពិសេសមេនហាតធេន ក្នុងក្រុងបាវិត ខេត្តស្វាយរៀង បានផ្ទុះកូដកម្មជាថ្មីនៅព្រឹកថ្ងៃអង្គារ ទី២២ ធ្នូនេះ។ ប៉ុន្តែកូដកម្មនោះក៏ត្រូវបានបំបែកភ្លាមៗ ដោយកម្លាំងអាជ្ញាធរមានសមត្ថកិច្ចនៅក្នុងតំបន់ ប្រើកងកម្លាំងរាជអាវុធហត្ថ ធ្វើការបង្រ្កាប និងការបាញ់ទឹកដាក់ក្រុមបាតុករ។ កូដកម្មនៅព្រឹកមិញនេះ បានកើតឡើងដោយក្រុមបាតុករបានគប់ដុំថ្មដាក់កងកម្លាំង និងអគាររោងចក្រ ហើយកងកម្លាំងក៏បានប្រើរថយន្តពន្លត់អគ្គីភ័យ ដើម្បីបាញ់ទឹកបំបែកហ្វូងកូដករវិញ។
ចុះផ្សាយនៅថ្ងៃ៖
ស្តាប់ - ០២:២៦
ជាថ្មីម្តងទៀត កម្មករនៅក្នុងតំបន់សេដ្ឋកិច្ចពិសេសមេនហាតធេន ក្នុងក្រុងបាវិត ខេត្តស្វាយរៀង បានផ្តុំក្រុមកូដកម្មគប់ដុំថ្ម ទៅលើអគាររោងចក្រ និងកងកម្លាំងរាជអាវុធហត្ថ ដែលត្រូវបានដាក់ពង្រាយ ដើម្បីការពារនៅក្នុងតំបន់នោះ និងបំផ្លាញកញ្ចក់រថយន្តបន្លត់អគ្គីភ័យមួយគ្រឿង នៅព្រឹកថ្ងៃអង្គារ ទី២២ ធ្នូនេះ។ ប៉ុន្តែកូដកម្មនេះត្រូវបានរំសាយវិញភ្លាមៗ បន្ទាប់ពីមានអន្តរាគមន៍ពីកងកម្លាំង ដោយមានការបាញ់ទឹក ដើម្បីបំបែកក្រុមកូដករទាំងអស់នោះ។
លោកអ៊ូ សាខឿន អនុប្រធានមន្ទីរការងារខេត្តស្វាយរៀង បានបញ្ជាក់ប្រាប់វិទ្យុបារាំងនៅព្រឹកនេះថា មានកម្មករមួយក្រុមបាននាំគ្នាផ្ទុះកូដកម្ម ដោយយកដុំថ្មគប់អគាររោងចក្រ និងកងកម្លាំងមានសមត្ថកិច្ច ប៉ុន្តែក៏ត្រូវបានរំសាយវិញភ្លាមផងដែរ។ ហើយកម្មកររាប់ពាន់នាក់ ដែលបានមកធ្វើការងារតាំងពីព្រលឹមនោះក៏បានវិលត្រលប់ទៅផ្ទះ ផ្អាកចង្វាក់ផលិតកម្មនៅថ្ងៃនេះផងដែរ ដោយសារតែមានបញ្ហាកូដកម្មនៅក្នុងតំបន់សេដ្ឋកិច្ចពិសេសមេនហាតធេននោះ។
លោកបានបន្តឲ្យដឹងថា នៅរសៀលថ្ងៃនេះដែរ ក្រុមគណៈកម្មការ ដែលគ្រប់គ្រងលើការងារ និងដោះស្រាយបញ្ហាកូដកម្មរបស់កម្មករ នឹងប្រជុំគ្នា ដើម្បីស្វែងរកដំណោះស្រាយបញ្ហានៅចំពោះមុខនេះ។
ដោយឡែកលោកប៉ាវ ស៊ីណា ប្រធានសម្ព័ន្ធសហជីពចលនាកម្មករ បានបញ្ជាក់ផងដែរថា ក្នុងនាមជាតំណាងសហជីពជួយកម្មករ លោកនឹងរង់ចាំការស្នើសុំនានាពីខាងកម្មករនៅក្នុងតំបន់សេដ្ឋកិច្ចពិសេស ដើម្បីជួយដោះស្រាយបញ្ហាជូនពួកគាត់។ ព្រោះថាកូដកម្មកន្លងទៅថ្មីនេះៗ មិនមែនសហជីពណាមួយ ជាអ្នកដឹកនាំនោះទេ គឺដឹកនាំដោយក្រុមកម្មករខ្លួនឯងផ្ទាល់។ នេះជាការលើកឡើងរបស់លោកប៉ាវ ស៊ីណា។ ហើយបញ្ហាដែលត្រូវតែដោះស្រាយនោះមានការដោះលែងកម្មករទាំង៤នាក់ ដែលត្រូវបានចាប់ខ្លួនកាលពីថ្ងៃទី ១៨ ធ្នូ និងការស្វែងរកថាតើនិយោជករបស់ក្រុមហ៊ុនណាខ្លះនៅក្នុងតំបន់សេដ្ឋកិច្ចពិសេសក្នុងក្រុងបាវិតបានសន្យាថាផ្តល់ប្រាក់ឈ្នួលបន្ថែមចំនួន២០ដុល្លារជូនដល់កម្មករ ដើម្បីយកទៅជជែក និងពិភាក្សារកដំណោះស្រាយបញ្ចប់បញ្ហា។
សូមរំលឹកជូនថា កូដកម្មនៅតំបន់សេដ្ឋកិច្ចពិសេសមេនហាតធេន និងតាយសេងក្នុងក្រុងបាវិត ខេត្តស្វាយរៀង ដែលមានកម្មករនិយោជិតជាង ៣ម៉ឺន បានផ្ទុះឡើងចាប់តាំងពីថ្ងៃទី ១៦ ធ្នូមកម្ល៉េះ។ មូលហេតុគឺដោយសារតែថៅកែរោងចក្រមិនព្រមតម្លើងប្រាក់ឈ្នួល២០ដុល្លារបន្ថែមទៀតសម្រាប់ឆ្នាំ២០១៦ ដូចអ្វីដែលធ្លាប់បានសន្យា ព្រោះថារោងចក្រចង់តម្លើងត្រឹមតែ១២ដុល្លារវិញតាមគោលការណ៍ ដែលរដ្ឋាភិបាលបានប្រជុំសម្រេចជាមួយនឹងភាគីសហជីព និងសមាគមថៅកែរោងចក្រកាត់ដេរកម្ពុជា។ ហើយកូដកម្មនេះ បានបណ្តាលឲ្យកម្មករ៤នាក់ត្រូវបានចាប់ខ្លួន និងបញ្ជូនទៅកាន់តុលាការខេត្តដើម្បីឃុំខ្លួនជាបណ្តោះអាសន្ន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ