ការបង្កបង្កើនផលថយចុះជាងឆ្នាំមុន ខណៈតំបន់ខ្លះគ្មានទឹកគ្រប់គ្រាន់នៅឡើយ
ការបង្កបង្កើនផលឆ្នាំ២០១៥ថយចុះ បើគិតត្រឹមខែកញ្ញា ហើយនៅតាមតំបន់មួយចំនួនមានភ្លៀងធ្លាក់តិចតួច និងពុំទាន់មានទឹកគ្រប់គ្រាន់នៅឡើយ។ នេះបើតាមរបាយការណ៍ចុងក្រោយរបស់ក្រសួងកសិកម្ម រុក្ខាប្រមាញ់ និងនេសាទ កាលពីខែកញ្ញា។ លោកនាយករដ្ឋមន្ត្រីហ៊ុន សែន នៅព្រឹកថ្ងៃទី១៩ តុលានេះ ក៏បានអំពាវនាវជាថ្មីទៀត ឲ្យប្រជាកសិកររៀបចំរក្សាទឹកទុក ក្នុងការបង្កបង្កើនផលផងដែរ។
ចុះផ្សាយនៅថ្ងៃ៖
ស្តាប់ - ០២:១០
នៅក្នុងរបាយការណ៍របស់ក្រសួងកសិកម្ម ដែលដាក់ជូនលោកនាយករដ្ឋមន្ត្រីហ៊ុន សែន កាលពីថ្ងៃទី១០ ខែកញ្ញា បានឲ្យដឹងថា ការបង្កបង្កើនផលដំណាំស្រូវឆ្នាំ២០១៥នេះ មានការថយចុះជាងឆ្នាំមុន។ រហូតដល់សប្តាហ៍ទី២ ខែកញ្ញានេះ ការបង្កបង្កើនផលដំណាំស្រូវទូទាំងប្រទេសសម្រេចបានចំនួន ២.២៩៣.៦០១ ហ.ត ដែលស្មើនឹង៨៩,៣៤ភាគរយនៃផែនការឆ្នាំ២០១៥ ពោលគឺតិចជាងឆ្នាំមុនប្រមាណ២៥.១៥៦ហ.ត ក្នុងរយៈពេលដូចគ្នា។
ការធ្វើស្រែកសិកម្មប្រវាស់ មេឃបានធ្វើឲ្យប្រជាកសិករមួយចំនួនមិនអាចបង្កបង្កើនផលបាន នៅពេលគ្មានភ្លៀងធ្លាក់គ្រប់គ្រាន់។ បើយោងតាមរបាយការណ៍នោះ បានឲ្យដឹងទៀតថា ការខ្វះខាតទឹកបានធ្វើឲ្យប៉ះពាល់លើផ្ទៃដីសរុបចំនួន ២០៥.៧៣១ហ.ត ហើយខេត្តដែលបានរងគ្រោះដោយសារការខ្វះខាតទឹកជាងគេនោះគឺមានដូចជាខេត្តបន្ទាយមានជ័យ បាត់ដំបង ពោធិ៍សាត់ តាកែវ និងស្វាយរៀង។
លោកនាយករដ្ឋមន្ត្រីហ៊ុន សែន ក្នុងពិធីចែកសញ្ញាបត្រដល់និស្សិតថ្នាក់បរិញ្ញាបត្រ បរិញ្ញាបត្ររង បរិញ្ញាបត្រជាន់ខ្ពស់ និងថ្នាក់បណ្ឌិត នាព្រឹកថ្ងៃទី១៩ ខែតុលា ឆ្នាំ២០១៥នេះ ក៏បានអំពាវនាវជាថ្មីម្តងទៀតឲ្យប្រជាកសិករទាំងអស់ត្រៀមខ្លួនរក្សាទឹកទុក ដោយសារតែទឹកភ្លៀងនៅឆ្នាំនេះជិតអស់។ លោកនាយករដ្ឋមន្ត្រីបានបញ្ជាក់ថា ឆ្នាំនេះទឹកទន្លេមេគង្គទាបណាស់ ព្រោះភ្លៀងមិនត្រូវចំទន្លេមេគង្គទេ ទាំងប្រទេសកម្ពុជា និងទាំងប្រទេសឡាវ។
លោក ឡោ រស្មី អ្នកនាំពាក្យក្រសួងកសិកម្មបានបញ្ជាក់ប្រាប់វិទ្យុបារាំងថា ដោយសារតែទឹកទន្លេឆ្នាំនេះ ក៏មានលក្ខណៈតិច ដែលមិនអាចហូរចូលបឹងធម្មជាតិផ្សេងៗសម្រាប់ស្រោចស្រប់ដំណាំកសិកម្មបាន ដូច្នេះក្រសួងកសិកម្មនឹងធ្វើបច្ចេកទេសកសិកម្មសមស្របមួយ ដែលមានភាពធនទៅនឹងការប្រែប្រួលអាកាសធាតុនេះ។ លោកបានបន្ថែមថាកន្លងមកមន្ទីរកសិកម្មខេត្តក៏បានត្រៀមខ្លួនជាមួយនឹងអាជ្ញាធរខេត្ត ដើម្បីរៀបចំដោះស្រាយក្នុងការស្រោចស្រង់លើផ្ទៃដីកសិកម្មស្រូវ ដែលជួបបញ្ហាខ្វះទឹកនេះដែរ។
សូមបញ្ជាក់ថាកាលពីថ្ងៃទី១០ ខែតុលានេះ លោកញឹម វណ្ណដា អនុប្រធានទី១ គណៈកម្មធិការជាតិគ្រប់គ្រងគ្រោះមហន្តរាយ ថាឆ្នាំនេះគឺជាឆ្នាំអាក្រក់ ដោយសារតែភ្លៀងមិនទៀតទាត់ បង្កឲ្យមានគ្រោះរាំងស្ងួត។ បើតាមលោក វណ្ណដា រហូតមកដល់ពេលនេះ កម្ពុជាមិនមានទឹកជំនន់ទន្លេមេគង្គទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ