ក្បាលម៉ាស៊ីនសំខាន់ៗរបស់បក្សប្រឆាំងខ្លះបានមកដល់ប្រទេសថៃ មុនមាតុភូមិនិវត្តន៍របស់លោក សម រង្ស៊ី
គិតត្រឹមថ្ងៃទី ១៩ តុលានេះ ថ្នាក់ដឹកនាំសំខាន់ៗមួយចំនួននៃអតីតគណបក្សប្រឆាំង បានធ្វើដំណើរមកដល់ប្រទេសថៃហើយ ហើយមួយចំនួនទៀតកំពុងស្ថិតនៅក្នុងប្រទេសតំបន់អាស៊ី។ ដំណើរនេះ គឺនៅមុនមាតុភូមិនិវត្តន៍របស់លោក សម រង្ស៊ី នៅថ្ងៃទី ០៩ វិច្ឆិកា ខណៈដែលអាជ្ញាធរកម្ពុជាវិញ បានប្រកាសត្រៀមចាត់វិធានការច្បាប់គ្រប់បែបយ៉ាង។
ចុះផ្សាយនៅថ្ងៃ៖
ស្តាប់ - ០១:៥០
តាមរយៈគណនីយហ្វេសបុករបស់លោកស្រី មួរ សុខហួរ អតីតអនុប្រធានគណបក្សប្រឆាំង បានអះអាងថា លោកស្រី រួមជាមួយនឹងថ្នាក់ដឹកនាំនៃអតីតគណបក្សប្រឆាំង ដែលក្នុងនោះរួមមានលោក អេង ឆៃអ៊ាង ផង បានធ្វើដំណើរមកដល់ប្រទេសថៃហើយ នៅព្រឹកថ្ងៃទី ១៩ តុលានេះ។ លោកស្រីបានសរសេរដោយភ្ជាប់នឹងរូបថតមួយសន្លឹកថា «អ្នកទោសរបបលោក ហ៊ុន សែន បានជួបគ្នាហើយ និងកំពុងត្រៀមខ្លួនវិលចូលប្រទេសកម្ពុជាវិញ នៅថ្ងៃទី០៩ វិច្ឆិកា ខាងមុខនេះ។ សូមបញ្ជាក់ថា លោក អេង ឆៃអ៊ាង និងលោកស្រី មួរ សុខហួរ គឺស្ថិតនៅក្នុងចំណោមថ្នាក់ដឹកនាំអតីតគណបក្សប្រឆាំង០៩រូប ដែលត្រូវបានតុលាការកម្ពុជាចេញដីកាចាប់ខ្លួន និងចោទប្រកាន់ពីបទ «ឧបឃាត» ឬប៉ុនប៉ងធ្វើរដ្ឋប្រហារ ដើម្បីផ្តួលរំលំរដ្ឋាភិបាលកម្ពុជា។
គួរជំរាបជូនថា ដំណើរមកដល់ប្រទេសថៃ ដែលមានព្រំដែនជាប់នឹងប្រទេសកម្ពុជានេះ គឺនៅមុនផែនការមាតុភូមិនិវត្តន៍របស់លោក សម រង្ស៊ី ដែលគ្រោងធ្វើនៅថ្ងៃទី ០៩ វិច្ឆិកា ខាងមុខ ស្របពេលដែលអាជ្ញាធរកម្ពុជាឯណេះវិញ បានប្រកាសថា នឹងត្រៀមចាត់វិធានការតាមផ្លូវច្បាប់គ្រប់បែបយ៉ាងទៅលើមាតុភូមិនិវត្តន៍របស់លោក សម រង្ស៊ី។ ជាអ្វីដែលរដ្ឋាភិបាលកម្ពុជាបានចាត់ទុកថា ជាផែនការធ្វើរដ្ឋប្រហារដើម្បីផ្តួលរំលំរដ្ឋាភិបាលកម្ពុជា។
តាមរយៈបទសម្ភាសន៍មួយជាមួយវិទ្យុអាស៊ីសេរីកាលពីយប់ថ្ងៃទី ១៨ តុលា លោក សម រង្ស៊ី បានអះអាងថា ផែនការមាតុភូមិនិវត្តន៍របស់លោកនឹងមិនផ្លាស់ប្តូរឡើយ។ បើតាមលោក សម រង្ស៊ី លោកនិងដឹកនាំកម្លាំងអ្នកគាំទ្ររបស់លោកធ្វើដំណើរចូលមកកាន់ប្រទេសកម្ពុជាដោយថ្មើរជើង នៅថ្ងៃទី ០៩ វិច្ឆិកា ខាងមុខនេះ ដែលត្រូវនឹងខួបលើកទី៦៦នៃទិវាបុណ្យឯករាជ្យជាតិ កម្ពុជា។ ចំណែកពីខាងកម្ពុជាវិញ ក្រៅពីដាក់ចេញនូវវិធានការរារាំងផែនការវិលត្រលប់របស់លោក សម រង្ស៊ី ហើយ លោកនាយករដ្ឋមន្ត្រីហ៊ុន សែន បានប្រកាសថា នឹងយកថ្ងៃទី ០៩ វិច្ឆិកា ជាថ្ងៃអកអំបុកនៅទូទាំងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ