គណបក្សខ្មែររួបរួមជាតិរបស់លោកញឹក ប៊ុនឆៃ ចងសម្ព័ន្ធនឹងគណបក្សយុត្តិធម៌ជាតិខ្មែរនៅមុនការបោះឆ្នោត
គណបក្សខ្មែររួបរួមជាតិរបស់លោក ញឹក ប៊ុនឆៃ បានប្រកាសចងសម្ព័ន្ធភាពជាមួយនឹងគណបក្សយុត្តិធម៌ជាតិខ្មែររបស់លោក ហ៊ាង រិទ្ធី ដែលទើបតែបែកចេញ មកពីគណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូ។ បើយោងតាមកិច្ចព្រមព្រៀងនៅថ្ងៃនេះ គណបក្សទាំងពីរនៅមិនទាន់ឈានដល់ការច្របាច់បញ្ចូលគ្នាជាគណបក្សតែមួយនៅឡើយទេ តែសម្ព័ន្ធភាពដែលមើលទៅមានការប្រយ័ត្នប្រយែងរៀងៗខ្លួននេះ នឹងចាប់ដៃគ្នាពង្រឹងខ្លួនត្រៀមចូលរួមការបោះឆ្នោតក្រុមប្រឹក្សាឃុំសង្កាត់ឆ្នាំ២០១៧។ សម្រាប់អ្នកវិភាគនយោបាយនៅកម្ពុជាចាត់ទុកថា សម្ព័ន្ធភាពនេះ គ្មានឥទ្ធិពលទាញការគាំទ្រនោះទេ។
ចុះផ្សាយនៅថ្ងៃ៖
ស្តាប់ - ០៣:០១
សម្ព័ន្ធភាពរបស់គណបក្សទាំងពីរនេះ គឺធ្វើឡើងក្នុងស្មារតីសាមគ្គីភាព ឯកភាព និងផ្អែកលើទស្សនវិស័យនយោបាយស្របគ្នា ដើម្បីផលប្រយោជន៍ជាតិនិងប្រជារាស្ត្រខ្មែរ។ នេះបើយោងតាមសេចក្តីប្រកាសរួមរបស់គណបក្សទាំងពីរនៅព្រឹកថ្ងៃទី ១៨ មករានេះ។ សេចក្តីប្រកាសរួមនេះ ក៏បានបញ្ជាក់ឲ្យដឹងដែរថា តាមរយៈអនុស្សារណៈ ស្តីពី កិច្ចសហប្រតិបត្តិការជាសម្ព័ន្ធភាពជាមួយគ្នា ដែលត្រូវបានចុះហត្ថលេខាដោយលោក ញឹក ប៊ុនឆៃ ប្រធានគណបក្សខ្មែររួបរួមជាតិ និងលោក ហ៊ាង រិទ្ធី ប្រធានគណបក្សយុត្តិធម៌ជាតិខ្មែរនេះ គឺជាលិខិតតូបករណ៍មួយដើម្បីបើកផ្លូវឲ្យគណបក្សទាំងពីរ បង្កើតឡើងនូវក្រុមការងារបច្ចេកទេសចម្រុះមួយ ដើម្បីរៀបចំយន្តការនិងឯកសារគតិយុត្តនានា ក្នុងការជួយគ្នាទៅវិញទៅមក សំដៅដល់ការប្រមូលផ្តុំសំឡេងអ្នកគាំទ្ររបស់គណបក្សទាំងពីរ។ គណបក្សខ្មែររូបរួមជាតិ និងគណបក្សយុត្តិធម៌ជាតិខ្មែរ ក៏រំពឹងដែរថា តាមរយៈកិច្ចសហប្រតិបត្តិការដែលចុះហត្ថលេខានៅថ្ងៃនេះ ក៏នឹងនាំមកនូវលទ្ធផលល្អប្រសើរ សម្រាប់គណបក្សទាំងពីរ នៅក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ ពិសេសការបោះឆ្នោតជ្រើសរើសតំណាងរាស្ត្រនៅពេលអនាគតដ៏ខ្លីខាងមុខនេះ។
លោក ញឹក ប៊ុនឆៃ ប្រធានគណបក្សខ្មែររូបរួមជាតិ ដែលទើបតែបែកចេញមកពីគណបក្សហ្វ៊ុនស៊ិនប៉ិចរបស់ព្រះអង្គម្ចាស់នរោត្តម រណឬទ្ធិ ដែរនោះ បានថ្លែងនៅក្នុងសន្និសីទកាសែតក្រោយពីពិធីចុះអនុស្សារណៈនោះថា ដំបូងឡើយមានគណបក្សតូចៗប្រមាណជា៦ ដែលបានទាក់ទងគ្នា ដើម្បីចងសម្ព័ន្ធភាពគ្នានេះ ក៏ប៉ុន្តែនៅទីបំផុតទៅ មានតែគណបក្សរបស់លោក ហ៊ាង រិទ្ធី មួយប៉ុណ្ណោះ ដែលសម្រេចចងសម្ព័ន្ធភាពគ្នានៅថ្ងៃនេះ។ ប៉ុន្តែទោះជាយ៉ាងនេះក្តី អតីតឧបនាយករដ្ឋមន្ត្រី និងជាអតីតប្រធានស្តីទីរដ្ឋសភាជាតិរូបនេះ បានគូសបញ្ជាក់ថា នៅមានគណបក្សមួយទៀត ដែលត្រៀមចងសម្ព័ន្ធភាពជាមួយនឹងគណបក្សរបស់លោក ហើយពិធីដូចគ្នានេះ នឹងធ្វើឡើងនៅពេលខាងមុខ។
សូមបញ្ជាក់ថា សម្ព័ន្ធភាពរវាងគណបក្សខ្មែររួបរួមជាតិរបស់លោកញឹក ប៊ុនឆៃ នឹងគណបក្សយុត្តិធម៌ជាតិខ្មែររបស់លោក ហ៊ាង រិទ្ធី ដែលទើបតែបែកចេញមកពីគណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូ នៅថ្ងៃនេះ មិនទាន់មានរចនាសម្ព័ន្ធដឹកនាំច្បាស់លាស់នៅឡើយទេ ដោយភាគីទាំងពីររងចាំការធ្វើការរួមគ្នារវាងក្រុមការងារបច្ចេកទេសចម្រុះជាមុនសិន។ ប៉ុន្តែជាជំហានដំបូងនេះ គណបក្សទាំងពីរនឹងជួយគ្នាទៅវិញទៅមក ក្នុងការរៀបចំធនធានមនុស្ស សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ នៅថ្ងៃទី៤ មិថុនា ឆ្នាំ២០១៧ខាងមុខនេះ។ មេដឹកនាំសម្ព័ន្ធមកពីគណបក្សទាំងពីរ បានគូសបញ្ជាក់ដែរថា ការចងសម្ព័ន្ធភាពគ្នានៅថ្ងៃនេះ មិនមានការជួយរៀបចំពីគណបក្ស ឬ អ្នកនយោបាយណាមួយនោះទេ។ ហើយគណបក្សទាំងពីរ ក៏មិនមែនជាគណបក្សប្រឆាំងរដ្ឋាភិបាល ហើយក៏មិនស្របជាមួយរដ្ឋាភិបាលទាំងអស់នោះដែរ តែជាគណបក្សដែលប្រកាន់យកការដឹកនាំតាមផ្លូវកណ្តាល ឬ អព្យាក្រឹត្រនិយម។
សម្រាប់អ្នកវិភាគនយោបាយនៅកម្ពុជា បានកត់សំគាល់ថា សម្ព័ន្ធភាពរវាងគណបក្សនយោបាយទាំងពីរនេះ នឹងមិនមានឥទ្ធិពលខ្លាំង ទៅដល់រចន្តនយោបាយនៅក្នុងប្រទេសកម្ពុជានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ