មេ PM កម្ពុជា ដាក់បញ្ជាតឹងរឹងឲ្យកងរាជអាវុធហត្ថទាំងអស់ ត្រៀមទប់និងបង្រ្កាបលោក សម រង្ស៊ី គ្រប់ផ្លូវ
មេបញ្ជាការកងរាជអាវុធហត្ថលើផ្ទៃប្រទេសលោកនាយឧត្តមសេនីយ៍ សៅ សុខា បានដាក់បញ្ជាឲ្យមេបញ្ជាការកងរាជអាវុធហត្ថរាជធានីភ្នំពេញ ខេត្តព្រះសីហនុ និងខេត្តសៀមរាប សហការជាមួយកងនគរបាលជាតិ ដើម្បីទប់ទល់ចលនាមាតុភូមិនិវត្តន៍របស់លោក សម រង្ស៊ី។ ក្រៅពីផ្លូវអាកាសនេះ លោកមេបញ្ជាការ ក៏បានដាក់បញ្ជាឲ្យមេបញ្ជាការនៅតាមបណ្តា ជាអ្វីដែលគេមើលឃើញថា ជាវិធានការតឹងរឹងបំផុត ដើម្បីទប់ទល់ចលនាមាតុភូមិនិវត្តន៍របស់លោក សម រង្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
តាមរយៈសារសម្លេងបែកធ្លាយមួយដែលអ្នកកាសែតទើបបានទទួលនៅថ្ងៃអាទិត្យនេះ លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស បានចេញបទបញ្ជាផ្ទាល់មាត់ឲ្យមេបញ្ជាការកងរាជអាវុធហត្ថនៅតាមខេត្តទាំងអស់ ជាពិសសខេត្តនៅជាប់ព្រំដែនកម្ពុជា ថៃ ឡាវ និងវៀតណាម ប្រុងជើងការ២៤ម៉ោងលើ២៤។ ជាវិធានការដើម្បីការពារនិងបង្រ្កាបចលនាមាតុភូមិនិវត្តន៍របស់លោក សម រង្ស៊ី ដែលគ្រោងធ្វើនៅថ្ងៃទី ០៩ វិច្ឆិកា ខាងមុខនេះ។
បើតាមសារសម្លេងនេះ លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាអគ្គមេបញ្ជាការរងនៃកងយោធពលខេមរភូមិន្ទបានណែនាំឲ្យមេបញ្ជាការកងរាជអាវុធហត្ថរាជធានីភ្នំពេញ ខេត្តព្រះសីហនុ និងខេត្តសៀមរាបប្រចាំការនៅព្រលានយន្តហោះទាំងបី ប្រសិនបើចលនារបស់លោក សម រង្ស៊ី ចូលមកតាមផ្លូវអាកាស។ ដោយឡែកមេបញ្ជាការនៅតាមខេត្តជាប់មាត់សមុទ្រដូចជា ខេត្តព្រះសីហនុ កោះកុង ខេត្តកំពត ក៏ត្រូវដាក់កម្លាំងការពារឲ្យតឹងរឹងបំផុត បើក្នុងករណីលោក សម រង្ស៊ី ចូលមកតាមផ្លូវទឹក។ ដោយឡែកសម្រាប់ខេត្តដែលមានព្រំដែនគោកជាប់នឹងថៃ ចាប់ពីខេត្តកោះកុងដល់ខេត្តព្រះវិហារ ដូចជា ខេត្តពោធិ៍សាត់ ប៉ៃលិន ឧត្តរមានជ័យ និងបន្ទាយមានជ័យជាដើម ក៏ត្រូវដាក់កម្លាំងប្រចាំការ២៤ម៉ោងលើ២៤ម៉ោងដែរ ដើម្បីត្រៀមបង្រ្កាបប្រសិនបើចលនារបស់លោក សម រង្ស៊ី ចូលមកតាមផ្លូវគោក។ សម្រាប់ខេត្តខាងលើនេះ លោក សៅ សុខា បានបញ្ជាឲ្យធ្វើសេចក្តីរាយការណ៍ជាប្រចាំពីវត្តមានរបស់ប្រជាពលរដ្ឋចេញនិងចូលនៅតាមច្រកព្រំដែនទាំងអស់។ បន្ថែមលើនេះ ខេត្តដែលជាប់នឹងព្រំដែនកម្ពុជា-ឡាវ និងព្រំដែនកម្ពុជា-វៀតណាម ក៏ត្រូវត្រៀមកម្លាំងនិងវិធានការដូចគ្នានេះដែរ។ បើតាមសម្លេងបែកធ្លាយនេះ លោកមេបញ្ជាការកងរាជអាវុធហត្ថលើផ្ទៃប្រទេស សៅ សុខា បានហាមដាច់ខាតមិនឲ្យមន្ត្រីកងរាជអាវុធហត្ថណាម្នាក់សុំច្បាប់ឈប់សម្រាកនៅក្នុងអំឡុងពេលនេះឡើយ។
គួរជំរាបជូនថា ការដាក់ចេញនូវបទបញ្ជាដ៏តឹងរឹងនេះ គឺស្របពេលដែលរដ្ឋមន្ត្រីទទួលបន្ទុកអាកាសចរស៊ីវិលកម្ពុជា បានហាមផ្តាច់មិនឲ្យក្រុមហ៊ុនហោះហើរណាមួយ ដឹកលោកសម រង្ស៊ីចូលមកកម្ពុជា នៅថ្ងៃទី ០៩ វិច្ឆិកា ខាងមុខនេះឡើយ។ យ៉ាងណាក្តី អតីតគណបក្សសង្រ្គោះជាតិ នៅថ្ងៃទី០២ ខែវិច្ឆិកា បានចេញសេចក្តីថ្លែងការណ៍ថ្កោលទោសចំពោះរដ្ឋាភិបាលកម្ពុជា ដែលកំពុងប្រើប្រាស់កម្លាំងប្រដាប់អាវុធ រួមទាំងអាជ្ញាធរអាកាសចរណ៍ស៊ីវិលផង ក្នុងការរារាំង និងទប់ស្កាត់ការធ្វើមាតុភូមិនិវត្តន៍របស់មេដឹកនាំគណបក្សប្រឆាំង រួមទាំងលោក សម រង្ស៊ី នាថ្ងៃទី០៩ ខែវិច្ឆិកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ