លោក Dmitry MEDVEDEV ទស្សនកិច្ចកម្ពុជា ក្រោមសន្តិសុខកំរិតខ្ពស់
នាយករដ្ឋមន្ត្រីនៃសហម្ព័ន្ធរុស្សី លោក Dmitry MEDVEDEV បានចាប់ផ្តើមដំណើរទស្សនកិច្ចរបស់ខ្លួនជាផ្លួវការហើយនៅកម្ពុជា បន្ទាប់ពីយន្តហោះពិសេសដឹកគណៈប្រតិភូទីក្រុងម៉ូស្គូមួយនេះ បានដាក់ជើងចុះចតនៅខេត្តសៀមរាប កាលពីយប់ថ្ងៃអាទិត្យ ទី២២វិច្ឆិកាម្សិលមិញ។ នៅខេត្តទេសចរណ៍របស់កម្ពុជា លោក MEDVEDEV ធ្វើទស្សនកិច្ចនៅប្រាសាទអង្គរវត្ត ថ្ងៃដំបូង មុនបន្តដំណើរមករាជធានីភ្នំពេញនៅរសៀលថ្ងៃទី២៤វិច្ឆិកានេះ ទីដែលលោកមានជំនួបជាមួយលោកនាយករដ្ឋមន្ត្រីហ៊ុន សែន និងទស្សនកិច្ចព្រះបរមរាជវាំង។
ចុះផ្សាយនៅថ្ងៃ៖
ស្តាប់ - ០២:១៤
សន្តិសុខត្រូវបានរិតបន្តឹងកំរិតខ្ពស់ នៅជុំវិញព្រលានយន្តហោះអន្តរជាតិសៀមរាបនិងភ្នំពេញ។ កងកំលាំងសន្តិសុខក្នុងឯកសណ្ឋានប្រយុទ្ធ បំពាក់ដោយអាវុធវែង ត្រូវបានដាក់ពង្រាយពីរៗនាក់នៅតាមដងមហាវិថី ចន្លោះប្រមាណពី១០ទៅ២០ម៉ែត្រមួយ ចាប់ពីព្រលានយន្តហោះអន្តរជាតិភ្នំពេញទៅកាន់គោលដៅទស្សនកិច្ចនានានៅក្នុងរាជធានីភ្នំពេញ។
តាមផែនការដំណើរទស្សនកិច្ចរបស់គណៈប្រតិភូជាន់ខ្ពស់រុស្ស៊ីចាប់ពីថ្ងៃទី២២ដល់២៤វិច្ឆិកានេះ លោក Dmitry MEDVEDEV នឹងទៅដាក់កំរងផ្កានៅវិមានឯករាជ្យ និងនៅព្រះបរមរូបសម្តេចនរោត្តមសីហនុ មុននឹងមានជំនួបជាមួយលោកនាយករដ្ឋមន្ត្រីហ៊ុន សែន។
យោងតាមសេចក្តីប្រកាសរបស់ក្រសួងការបរទេសកម្ពុជា វត្តមានរបស់លោក MEDVEDEV នៅលើទឹកដីអង្គរនាពេលនេះ គឺមានការពិភាក្សា និងធ្វើជាអធិបតីជាមួយលោកនាយករដ្ឋមន្ត្រី ហ៊ុន សែន ក្នុងពិធីចុះហត្ថលេខាលើឯកសារចំនួន៦។ ឯកសារទាំង៦នោះមាន កិច្ចព្រមព្រៀងស្តីពីការផ្លាស់ប្តូរព័ត៌មានសម្អាតប្រាក់និងហិរញ្ញវត្ថុភេរវកម្ម។
សហប្រតិបត្តិការនិងកិច្ចព្រមព្រៀងបំពេញបន្ថែមរវាងទីភ្នាក់ងារសារព័ត៌មានកម្ពុជានិងទីភ្នាក់ងារសារព័ត៌មានSPUTNIK។អនុស្សរណៈនៃការយោគយល់គ្នារវាងវិទ្យុជាតិកម្ពុជានិងទីភ្នាក់ងារសារព័ត៌មានSPUTNIK។ កិច្ចព្រមព្រៀងស្តីពីកិច្ចសហការនិងសហប្រតិបត្តិការរវាងគណបក្សប្រជាជនកម្ពុជានិងគណបក្ស«រួបរួមរុស្ស៊ី»។ អនុស្សរណៈស្តីពីការយោគយល់គ្នា រវាងក្រុមប្រឹក្សាអភិវឌ្ឍកម្ពុជា និងក្រសួងអភិវឌ្ឍន៍សេដ្ឋកិច្ចសហព័ន្ធរុស្ស៊ីស្តីពីការសម្រួលវិនិយោគទុន និងលក្ខខណ្ឌប្រតិបត្តិរបស់ក្រុមការងារជាន់ខ្ពស់កម្ពុជា-រុស្ស៊ី ស្តីពីគំរោងវិនិយោគអាទិភាពរួម។
សូមបញ្ជាក់ថាដំណើរទស្សនកិច្ចរបស់នាយករដ្ឋមន្ត្រីរុស្ស៊ីលោក Dmitry MEDVEDEV នៅកម្ពុជានាពេលនេះគឺចំពេលដែលរុស្ស៊ីនិងកម្ពុជាមានទំនាក់ទំនងការទូតជាមួយគ្នាគម្រប់៦០ឆ្នាំ។ លើសពីនេះ ប្រទេសរុស្ស៊ីគឺជាអ្នកគាំទ្រកម្ពុជាដ៏សំខាន់មួយដែរ បន្ទាប់ពីការដួលរលំរបបគ្រប់គ្រងខ្មែរក្រហមនៅឆ្នាំ១៩៧៩។ រុស្ស៊ីបានជួយបណ្តុះបណ្តាលធនធានមនុស្សខ្មែរជាច្រើនកាលពីទសវត្សឆ្នាំ៨០និង៩០ ដើម្បីឲ្យកម្ពុជាមានធនធានក្នុងការកសាងជាតិឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ