កំណែប្រឡងបាក់ឌុប ធ្វើឡើងក្រោមការឃ្លាំមើលពីកាមេរ៉ាសុវត្ថិភាព និង អង្គភាពប្រឆាំងអំពើពុករលួយ
កំណែសន្លឹកកិច្ចការរបស់បេក្ខជនប្រឡងសញ្ញាបត្រមធ្យមសិក្សាទុតិយភូមិ ដែលបានចាប់ផ្តើមពីថ្ងៃទី ៣០ សីហា នឹងត្រូវបានបញ្ចប់នៅថ្ងៃទី ២ កញ្ញា ស្អែកនេះ។ ដំណើរការកំណែកិច្ចការ នៅរាជធានីភ្នំពេញ បានបំពាក់ដោយកាំមេរ៉ាសុវត្ថិភាពនៅគ្រប់មណ្ឌល និងមានការឃ្លាំមើលពីអង្គភាព ប្រឆាំងអំពើពុករលួយ។ យ៉ាងណាក៏ដោយ អ្នកនាំពាក្យក្រសួងអប់រំ នៅមិនទាន់អាចបញ្ជាក់ថា មានបេក្ខជនជាប់ច្រើនឬយ៉ាងណានោះទេ។
ចុះផ្សាយនៅថ្ងៃ៖
ស្តាប់ - ០១:២៧
តាមការគ្រោងទុក ដំណើរការកំណែកិច្ចការសំណេររបស់បេក្ខជនប្រឡងសញ្ញាបត្រមធ្យមសិក្សាទុតិយភូមិ នៅមណ្ឌលទាំង ៩ នៅរាជធានីភ្នំពេញ នឹងត្រូវបញ្ចប់នៅល្ងាច ថ្ងៃទី ២ កញ្ញាស្អែកនេះ។ នេះជាការបញ្ជាក់របស់ លោក រស់ សាលីន អ្នកនាំពាក្យក្រសួងអប់រំយុវជននិងកីឡា នៅថ្ងៃទី ១ កញ្ញា នេះ។
សូមបញ្ជាក់ នៅក្នុងដំណើការកំណែរយៈពេល ៤ ថ្ងៃនេះ ត្រូវបានធ្វើឡើងដោយមានបំពាក់នូវកាមេរ៉ាសុវត្ថិភាព នៅគ្រប់បន្ទប់ នៃមណ្ឌលកំណែទាំង ៩ នៅរាជធានីភ្នំពេញ ដែលមានការឃ្លាំមើលពីអង្គភាពប្រឆាំងអំពើពុករលួយ។
បន្ទាប់ពីដំណើរការកំណែបញ្ចប់រួចរាល់ នៅថ្ងៃទី ៣ កញ្ញា គឺជាដំណើរការប្រជុំនៃគណកម្មការបូកស្រង់។ ដោយឡែក ចាប់ពី ថ្ងៃទី ៤ រហូតដល់ថ្ងៃទី ១៣ កញ្ញា គណៈកម្មការ នឹងចាប់ផ្តើមបូកស្រង់ និង ផ្ទៀងផ្ទាត់ពិន្ទុតាមប្រព័ន្ធកុំព្យូទ័រ។
ពាក់ព័ន្ធនឹងលទ្ធផលជាប់ឬធ្លាក់ មកដល់ដំណាក់កាលនេះ លោក រស់ សាលីន បានបញ្ជាក់ថា មិនទាន់មានការវាយតម្លៃបឋមណាមួយ ដែលអាចបញ្ជាក់ថា មានបេក្ខជនជាប់ច្រើនឬយ៉ាងណានោះទេ។
ដោយឡែក ពាក់ព័ន្ធនឹងករណី បេក្ខនារីស្វ័យរិនម្នាក់ដែលមានអាការៈ ឈឺពោះសម្រាលកូននៅក្នុងម៉ោងប្រឡងថ្ងៃចុងក្រោយ ក្រសួងអប់រំនឹងធ្វើការពិនិត្យនិងកំពុងស្ថិតនៅក្នុងការដំណាក់សម្រេច នៅឡើយ។ កំពុងស្ថិតក្នុងការពិចារណា ដោយសារ ករណីនេះវាជាករណីពិសេស និងដាច់ដោយឡែក។ នេះបើតាមការបញ្ជាក់ពី អ្នកនាំពាក្យក្រសួងអប់រំ យុវជននិងកីឡា។
សូមជម្រាបជូនថា ការប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ នឹងត្រូវធ្វើឡើងនៅថ្ងៃទី ១៥ កញ្ញា ខាងមុខនេះ សម្រាប់មណ្ឌលប្រឡងនៅរាជធានីភ្នំពេញ និង ខេត្តកណ្តាល។ ចំណែក មណ្ឌលប្រឡងនៅតាមបណ្តាខេត្តនានា នឹងត្រូវបានប្រកាស នៅថ្ងៃទី ១៦ កញ្ញា៕
អត្តបទដោយ៖ សរ ពិសី
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ